1Jatun mandaj Nabucodonosormi cai pacha tucui gentecunata, llajtacunata, ch'ican ch'ican rimaita rimajcunataca: “Sumaj causai cancunapi mirarishca cachun” nini.
2Ñucaca jahua pacha Taita Dios ñucaman ricuchishca señalcunata, milagrocunatami huillasha nini.
3¡Pai rurashca milagrocunaca ashtahuan yallitaj jatunmi. Mancharinacunata pai rurashcaca yallitaj jatunmi! Pai mandanaca huiñaipajmi. Paica huahua huahuata mandacungallami.
4Nabucodonosor ñucaca, ñuca huasipimi cushijlla sumajta causacurcani. Ñuca mandana huasipipish ashtahuan ashtahuan allitami ruracurcani.
5Shuj cutinmi ñucaca yallitaj mancharinata muscurcani. Chai muscuipi ricushcata camapi siricushpa yuyarishpaca, musparircanimi.
6Chai muscui imata nisha nishcata huillachunmi, Babiloniapi causaj tucui adivinocunata ñucapajman shamuchun mandarcani.
7Chaipica jatun yachajcunapish, luzerocunamanta yachajcunapish, caldeocunapish, adivinocunapishmi ñucapajman shamurcacuna. Paicunaman ñuca muscushcata parlajpipish chai imata nisha nishcataca, mana huillai tucurcacunachu.
8Chai q'uipami Danielca ñucapajman yaicurca. Paipaj shutica ñuca diospaj shuti shinallataj cachun ñuca shutichishca Beltsasarmi. Paipica jucha illaj dioscunapaj espiritumi causan. Paimanmi ñuca muscushcataca cashna parlarcani:
9“Jatun yachajcunata mandaj Beltsasar, canpica jucha illaj dioscunapaj espíritu tiyajtami yachani. Cambajca pi mana yachashcacunapish ima mana pacallachu. Chashna cashcamanta muscuipi shina ñuca ricushcata, chai imata nisha nishcata huillahuai.
10Ñuca camapi siricushpa muscuipi shina ricushcacunaca caimi:
Cai pacha chaupipica shuj yura shayacuj shinatami ricurcani.
Chaica yallitaj jatunmi carca.
11Chai yura huiñashpaca sinchimi tucurca.
Chai yura puntaca, jahua pachacamami carca.
Chaitaca tucui cai pacha maimantapish ricunallami carca.
12P'angacunaca sumajmi carca.
Granopish yallitaj achcami carca.
Paipi tiyaj micunaca tucuicunapaj pajtami carca.
Chai yura llandupica, tucui laya animalcunami llanduricurca.
Ramacunapica, huairata purij alasyuj animalcunami tazinta rurarcacuna.
Causaita charij tucuicunaca paimantami micushpa causacurca.
13Camapi ñuca siricushpallatajmi muscuipi shina cashnatapish ricurcani: Jucha illaj shuj cuidaj jahua pachamanta uriyamujtami ricurcani.
14Paica cashna nishpami sinchita caparirca:
Chai yurata urmachichij, ramacunatapish p'itichij.
P'angacunatapish anchuchichij, granocunatapish tsirapashpa shitaichij.
Chai yura ucupi caj animalcunapish, ramacunapi caj alasyuj animalcunapish maita richij.
15Chai yurapaj sapicunataca asha troncondij chaillapitaj saquichijlla.
Fierro cadenacunahuan, bronce cadenacunahuan huatashpa q'uihua chaupipi saquichij.
Jahua pacha garhua shutujyachichun.
Animalcunahuan q'uihua chaupipi causashpa q'uihuata micuchun.
16Paipaj shungutaca shujtajyachishpa animal shina yuyacuj shunguta rurachun.
Canchis huatacama chashna cachun.
17Chaitaca jucha illaj cuidajcunami chashna tucuchun nishpa parlanacushpa chashna rurashca.
Cai pachapi causajcunaca runacuna mandacun jahuapica jahua pacha Taita Dios mandacushcata yachachunmi chashna rurashca.
Mandaj cachunca Taita Diosca pita pai churasha nishcata churaj cashcata yachachun, mandaj canapica tucuicunamanta yalli manataj jatun tucujta churaj cashcata yachachunmi chashna rurashca nircami.
18Jatun mandaj Nabucodonosor ñucaca, muscuipica chaitami ricurcani. Chai imata nisha nishcataca ñuca mandacun llajtapi tiyaj jatun yachajcunapish mana huillai tucurcacunachu. Beltsasar canmi chai imata nisha nishcataca huillai tucungui. Canpica, jucha illaj dioscunapaj espiritumari tiyan, chaimi chaitaca huillai tucungui” nircanimi.
19Shina nijpica, Beltsasar nishca Danielca paipaj yuyaipi musparishpa achcata mancharishpami shuj horas shinata upajlla saquirirca. Chaimi jatun mandajca: “Beltsasar, ñuca muscushcata, chai imata nisha nishcata huillanataca ama manchaichu” nirca. Shina nijpimi Beltsasarca cashna nirca: “Ñuca amito, can muscushcaca canta p'iñajcunapaj cashpachari alli canman. Chai imata nisha nishcapish canta imapish tucuchun nicujcunapaj cashpachari alli canman.
20Canca shuj yura jatunta huiñajta, sinchi cajta, yura puntaca jahua pachacama cajta, chaitaca tucui cai pacha maimantapish ricunalla cajtami ricurcangui.
21Yurapaj p'angacunapish sumaj cajta, achca granocunayujta, chaipi caj micunaca tucuicunapaj pajtana cajta, chai yura ucupica tucui laya animalcuna cajta, ramacunapipish huairata purij alasyuj animalcuna tazinashcatami ricurcangui.
22Jatun mandajlla chai yuraca canllatajmi cangui. Canca jatunyashpami sinchi tucushcangui. Can yallitaj jatun tucushcaca umahuan jahua pachaman tupajta shinami tucushcangui. Chashnami cai pachapi tiyaj tucui llajtacunataca mandacungui.
23Jatun mandaj canca, jucha illaj shuj cuidaj jahua pachamanta uriyamucujtapishmi ricurcangui. Paica cashnami nirca: Chai yurata p'itishpa chingachichij. Ashtahuanpish chai yurapaj asha troncondij sapicunandijca chaillapitaj saquichijlla. Fierro cadenacunahuan, bronce cadenacunahuan huatashpa q'uihua chaupipi saquichij. Jahua pacha garhua shutujyachichun. Animalcunahuan q'uihua chaupipi causashpa q'uihuata micuchun. Canchis huatacama chashna cachun saquichij nijtami uyarcangui.
24Jatun mandajlla, jahua pacha Taita Diosca jatun mandaj ñuca amollatataj llaquichinatami chashna ricuchishca. Chaica caitami nisha nin:
25Cantaca gentecunapuramanta anchuchishpa animalcunahuan churajpimi paicunahuan causangui. Huagracunata shinami q'uihuacunapi michinga. Jahua pacha garhuami armachinga. Runacuna mandacun jahuapica jahua pacha Taita Dios mandacushcata yachangacama, mandaj cachunca Taita Dios pita pai churasha nishcata churaj cashcata yachangacamami canchis huatacama chashna puringui.
26Chai yurapaj asha troncota sapicunandijta chaillapitaj saquichijlla nishcaca caimi: Jahua pachamanta tucuita mandaj cashcata can rijsishca q'uipaca, can mandacushcataca canllataj japina cashcata, chaitaca pi mana cuyuchipaj cashcatami ricuchin.
27Chaimanta jatun mandajlla ñuca cunashcata uyai: Cashcata rurashpa juchata ruracushcamantaca llujshi. Llaquichishca causacujcunata llaquishpa millaita ruracushcamantaca llujshi. Chashna rurashpaca cushi causaita, alli causaita charinguipishchari” nirca.
28Daniel tucui nishcacunaca Nabucodonosorpaj jahuamanmi shamurca.
29Chaimantami huata junda shinapica, Babiloniapi pai mandana huasipi caiman chaiman puricushpa,
30jatun mandajca cashna nishpa rimarirca: “Babilonia yallitaj jatun pueblotaca ñucamari shayachircani. Mandashpa tiyana huasita chaipi shayachingapajmari ñuca tucuita rurai tucuj fuerzahuan rurarcani. Ñuca mandanaca tucuicuna ricuna jatun cachunmari rurarcani” niricurcami.
31Jatun mandaj chashna rimaricujpirajmi, jahua pachamanta rimashca uyarishpaca: “Jatun mandaj Nabucodonosor, cantami cashna nini: “Can mandanataca ñami quichurcani.
32Gentecunapuramanta anchuchishpa animalcunahuan chagrutami churanga. Paicunahuanmi causangui. Huagrata shinami michingacuna. Runacuna mandacun jahuapica jahua pacha Taita Dios mandacushcata yachangacama, mandaj cachunca Taita Dios pita pai churasha nishcata churaj cashcata yachangacama canchis huatacunacamami chashna causangui” nircami.
33Nabucodonosor ima tucuna cashcata huillashcaca chai horasllatajmi pajtarca. Paitaca gentecunapuramanta anchuchishpami shitarcacuna. Huagracuna shinami q'uihuata micurca. Paipaj cuerpotapish jahua pacha garhuami shutujyachirca. Paipaj ajchapish aguilapaj plumacuna shina tucungacamami huiñarca. Sillucunapish, alasyuj animalcunapaj shina tucungacamami huiñarca.
34Shina cashpapish, ñucata llaquichishca huatacuna ña tucuricuipimi, Nabucodonosor ñucaca jahua pachata huichilla ricurcani. Chaimi ñucamanca gente yuyaillatataj tigrachirca. Jahua pacha Taita Diostaca allimari cangui nircanimi. Huiñai causaiyujtaca alabashpa jatunyachishpami cashna nircani:
Quiquin mandanaca mana tucurij huiñaita mandanami.
Quiquinca huahua huahuata mandacunguillami.
35Quiquinpaj ñaupajpica, cai pachapi causajcunaca tucuicuna ima mana canchu.
Paica jahua pacha soldadocunatapish, cai pachapi causajcunatapish pai munashca shinami ruran.
Paipaj maqui imata ruracujtaca pi mana jarcai tucunchu.
¿Imatataj ruracungui? ninallatapish, pi mana ni tucunchu” nircanimi.
36Chai punllallatajmi ñuca yuyaitaca gente yuyaiman tigrachirca. Ñuca mandanatapish, alli nishca canatapish, jatun nishca canatapish ñucallamantajmi cutin curca. Llajtacunata mandajcunapish, ñucaman yuyaita cujcunapish ñucatami mashcarcacuna. Ñucaca cutinllataj mandai callarishpami, tucui imapipish ñaupata yalli alli mandarcani.
37Chaimi cunanca Nabucodonosor ñucaca jahua pacha Jatun Mandajta alabani. Jatunyachini. Sumajyachini. Pai rurashcacunaca ima mana pandachu, cashcatataj rurashpa yachachijmi. Jatun tucushcacunataca cumurichijmi.
Who We AreWhat We EelieveWhat We Do
2025 by iamachristian.org,Inc All rights reserved.
