JUECES 21 - Quichua Chimborazo Bible

Benjamín aillu cutin mirarishcami

1Israelcunaca Mizpa pueblopica Diospaj shutipimi: “Ñucanchij ushushicunataca Benjamín aillu runacunapaj huarmi cachunca manataj cushunchu” nishcacuna carca.

2Chai q'uipaca tucuicuna Diospaj huasiman rishpami, Taita Diospaj ñaupajpi tutayangacama chaipi carcacuna. Chaipi caparishpa achcata huacashpaca:

3“Israelcunapaj Mandaj Dios, ¿ima nishpataj Israelpica cashna tucunyari? Israelpica shuj aillu illajllamari tucunchij” nircacuna.

4Cayandij tutamanta tucuicuna utca jatarishpa, shuj altarta shayachishpami, Diosman cushpa tucui rupachircacuna, paihuan alli cangapajpish curcacunami.

5Chaipimi israelcunaca: “Tucui Israel aillucunapuramantaca ¿maijan aillutaj Mandaj Diospaj ñaupajpi tandanacunamanca mana huichiyamurca? nishpa tapunacurcacuna. Paicunaca Mizpa pueblopi Mandaj Diospajman maijanpish mana huichiyamujca huañuchishcami canga” nishpami Diospaj shutipi ninacushca carca.

6Israelcunaca paicunapaj huauqui Benjamín ailluta huañuchishcamantaca: “Cunan punllamari israelmanta shuj ailluta chingachina tucushca” nishpami achcata llaquirircacuna.

7Ñucanchijca Mandaj Diospaj shutipimari Benjaminpaj aillumanca: “Ñucanchij ushushicunataca paicunapaj huarmi cachunca manataj cushunchu” nishca jahuaca ¿ima shinataj ñucanchij ushushicunataca paicunaman cushunri?

8“Mandaj Diospaj ñaupajpi Mizpa pueblopi tandanacui punllaca, ñucanchij Israel aillupuramanta ¿maijan mana shamuj tiyanchu imashi?” nishpami tapunacurcacuna.

Chaimi Jabes-galaad pueblopi causajcuna chai tandanacuiman shujllapish mana shamushcata yuyarircacuna.

9Shuticunata quillcashcapi cayajpica, chai Jabes-galaad pueblopi causajcunaca shujllapish mana uyarircachu.

10Chaimantami chai tandanacushca runacunapuramanta ashtahuan c'ari c'ari, 12.000 runacunata cashna nishpa cacharcacuna: “Jabes-galaad pueblopi causaj runacunataca huarmicunandij huahuacunandijta espadahuan huañuchigrichij.

11C'arihuan chayarinacushca huarmicunatapish, c'aricunatapish tucuicunata huañuchinguichij” nircacuna.

12Chashna nijpi rishpaca, chai Jabes-galaad pueblopi causajcunapuramantaca c'arita manaraj rijsij, 400 solteracunatami tandachircacuna. Paicunataca Canaanpi caj Silo pueblo carpa huasicunamanmi pushamurcacuna.

13Chai q'uipami, tucui israelcunaca Rimón peñapi tiyacuj Benjaminpaj aillumanca ña mana macanacushunchu shamuichijlla nishpa shuj huillanata cacharca.

14Benjaminpaj aillu, caishuj israelcunapajman tigramujpica, Jabes-galaad pueblopi mana huañuchishpa pushamushca huarmicunatami paicunapaj huarmicuna cachun curca. Ashtahuanpish huarmicunaca mana tucuicunapaj tiyarcachu.

15Mandaj Diosca Israel aillucunapurapica Benjaminpaj ailluta anchuchishpaca, mirga patata t'unishca shinatami saquirca. Chaimi israelcunaca Benjaminpaj aillumantaca shungu p'aquirishpa llaquirircacuna.

16Chai tandanacushcapi caj cunaj yuyajcunaca: “Benjaminpaj aillupi caj huarmicunaca tucuimari huañushcacuna. Benjaminpaj aillu saquirishcacunaman paicunapaj huarmi cachun cungapajca ¿imatataj rurashunri? nishpami tapunacurcacuna.

17Ñucanchij Israel aillucunapurapi shuj aillu tucui chingarichunca mana munanchijchu. Benjaminpaj aillu japishcacunapica cai saquirij runacunallapish tiyachuntaj ninchijmi.

18Maijanpish Benjaminpaj ailluhuan paipaj ushushita cazarachijtaca: “Dios jatunta llaquichishca cachun” nishpami Diospaj shutipi nircanchij. Chaimanta ñucanchij ushushicunataca paicunapaj huarmi cachun manataj cui tucunchijchu.

19Cashnapish nircami: Mandaj Diosta yuyarina fiestamari huatanta Silo pueblopi tiyan. Chai puebloca Bet-el pueblomantaca janajmanmi. Bet-elmanta Siquem puebloman rina ñanmantaca inti llujshinmanmi. Shinallataj Lebona pueblomantaca uranijmanmi” ninacurcacunami.

20Chaimi chai mandajcunaca, Benjaminpaj aillutaca: “Uva chagracunaman rishpa chaipi miticushpa,

21chaparacugrichij. Silo pueblopi causajcunapaj ushushicuna mirga mirga tandanacushpa tushunaman llujshijta ricushpaca, uva chagrapi miticushpa tiyacushcamanta llujshishcahuan tucuicuna chai solteracunataca shuj shuj aisashcahuan, Benjamín llajtaman tigranguichij.

22Chaimanta paicunapaj yayacuna cashpa, turicuna cashpa ñucanchijman imata ninaman shamujpica, ñucanchijca cashnami nishun: Cancunapaj ushushicunahuan cazarachun saquipaichijlla. Ñucanchijmi macanacuimantaca mana tucuicunapaj pajtata huarmicunata apamurcanchij. Cancunapaj ushushicunata mana cancunataj cushcamantaca, ima juchachina illajllami canguichij nishunmi” nircacunami.

23Paicuna nishcata ari nishpami, Benjaminpaj ailluca tushucujcunapuramanta solteracunata mashnacunapaj illashcapajtaj shuj shuj shuhuashpa aparcacuna. Chai q'uipaca paicunapaj llajtallamantaj tigrashpami, chai pueblota cutinllataj shayachishpa chaipi causarcacuna.

24Caishuj israelcunapish chaimanta rishpaca, tucuicunami quiquin aillupurapajman, quiquin familiapajman, quiquin llajtaman tigrarcacuna.

25Chai punllacunaca Israelpica jatun mandajca manaraj tiyarcachu. Chaimantami paicunapaj ima shina alli cashca shina rurashpa causarcacuna.