MATEO 20 - Quichua Chimborazo Bible

Uvasta chagrajcunamanta yuyachishpa parlashcami

1Jahua pachamanta mandacunca, chagrayuj shuj runa paipaj chagrapi uvascunata pallachun mashcanaman utca llujshij shinami.

2Pallajcunahuanca shuj punlla trabajashcamantaca shuj denario cullquitami pagasha nishpa ari ninacushpaca paicunataca, paipaj uvas chagramanmi cacharca.

3Chagrayujca iscun horas tucucujpi cutin rishpaca, imata mana ruranata charijcuna plazapi tiyacujta ricushpami,

4paicunatapish: “Ñuca chagrapi uvascunata pallagrichij. Mashnata pagana cashcata pagashallami” nijpimi, paicunapish rircacuna.

5Cutin chaupi punllata, quimsa horas chishita rishpapish, chashnallatajmi rurarca.

6Shinallataj pichca horas chishita rishpapish, ima rurana illajllata ricushpami paicunatapish: “¿Ima nishpataj tucui punlla imata mana rurashpa cainacunguichij?” nirca.

7Chaimi paicunaca: “Imata rurachun pi mana cunchu” nijpi, chagrayujca: “Cancunapish ñuca uvas chagraman richij, cancuna japina cashcata cushallami” nishpa cacharca.

8Ña tutayajpimi, chagrayuj amoca paipaj mayordomota cayashpaca: “Pallajcunata cayai, tucuicunapaj q'uipa shamujcunamanta callarishpa, punta shamujcunacama pallashcamanta pagai” nirca.

9Pichca horas chishita pallai callarijcunaraj cayajpi shamushpaca, tucuicunami shuj denario, shuj denario chasquircacuna.

10Shinallataj tucui punlla pallajcuna chayashpaca, ñucanchijcarin yallitami chasquishun yuyarcacunami. Ashtahuanpish paicunapish tucuicunami shuj denario, shuj denariollatataj chasquircacuna.

11Chasquishca q'uipaca, chagrayujhuan p'iñarishpami paitaca:

12“Pichca horas chishita shamujcunaca shuj horasllatami pallarcacuna. Ashtahuanpish ñucanchijca, rupaipimari tucui punlla llaquita aparcanchij. Chashna cajpipish paicunamanca, ñucanchijman shinallatajmi pagangui” nircacuna.

13Chaipimi chagrayujca, chashna nijcunapuramanta shujtaca: “Riqui, amigo. Cantaca mana imata llaquichicunichu. ¿Manachu shuj denariota cusha nijpica, ari nircangui?

14Can japina cashcata japishpa ri. Ashtahuanpish cambaj q'uipa shamujmanpish, canman shinallatajmi cusha nini.

15Ñucapaj cashcataca ¿manachu imatapish rurai tucuni? Ñuca alli cashpa chashna cushcamantaca ¿ima nishpataj p'iñaringui?” nircami.

16Shinallatajmi puntapi cajcunaca huashayachishca cangacuna, huashaman cajcunaca puntapimi cangacuna. Achcacunaca cayashcacunalla cashcamanta, ashtahuanpish agllashcacunaca ashacunalla cashcamantami– chashna tucunga nishpami parlarca.

Jesusca caihuanca pai huañuna cashcataca quimsa cutinmi huillarca(Mr 10.32-34; Lc 18.31-34)

17Jesusca, Jerusalenman rina ñanta huichiyacushpami, paipaj chunga ishqui yachacujcunallata cayashpa cashna nirca:

18“Cunanca Jerusalenmanmi huichiyacunchij. Chaipimi Runa Aichayujtaca, curacunata mandajcunaman, mandashcata quillcajcunaman cungacuna. Paicunaca huañunami cangui nishpa,

19mana israelcunaman cujpimi, chaicunaca chanzata rurangacuna, azotingacuna, chacatangacuna. Ashtahuanpish huañuchijpipish quimsa punllapica causaringallami” nircami.

Santiagopaj Juanpaj mama mañashcami(Mr 10.35-45)

20Chaipica Zebedeopaj huarmimi, paipaj ishqui churicunandij imata cashpaca mañangapaj Jesuspajman c'uchuyashpa paipaj ñaupajpi cungurijpi.

21Jesusca:

–¿Imatataj ningui?– nijpi, chai huarmica:

–Can mandacushpaca, ñuca cai ishqui churicunata shujtaca alli ladoman, caishujtaca lluqui ladoman tiyachingui– nirca.

22Chaimi Jesusca:

–Imata mañacushcatapish mana yachanguichijchu. ¿Ñuca ubyana cashca vasomantaca ubyai tucunguichijchari, ñuca imahuan bautizarishcapipish bautizari tucunguichijchari?– nijpi paicunaca:

–Ari, chashna rurai tucunchijmi– nircacuna.

23Chaimi Jesusca:

–Ari, vasomantaca ñuca ubyashca shina ubyanguichijmi, ñuca imahuan bautizarishcapipish bautizaringuichijmi. Chashna cajpipish ñuca alli ladoman, lluqui ladoman maijanta tiyachinaca mana ñucapajchu. Chaitaca ñuca Yayami maijancunapaj allichishca cashpaca, chaipica tiyachinga– nircami.

24Caishuj chunga yachacujcuna uyashpaca, chai ishqui huauquindijcunahuanmi p'iñarircacuna.

25Chaimi Jesusca paicunata cayashpaca:

–Llajtacunata mandajcunallami paicuna yuyashca shina madancuna. Paicunallami paicuna jatun tucushcahuan mandancuna. Chaitaca yachanguichijmi.

26Ashtahuanpish cancunapurapica, mana chashnachu canga. Cancunapuramanta maijanpish puntapi casha nijca, cancunapajta rurajraj tucuchun.

27Cancunapuramanta maijanpish puntapi casha nishpaca, cancunapajta rurajraj tucuchun.

28Runa Aichayujca, servishca cangapajca mana shamurcachu. Ashtahuanpish servingapaj, paipaj causaita cushpa tucuicunata randishpa cacharichingapajmi shamurca. Puntapi casha nijca Runa aichayuj shinallataj cachun– nircami.

Mana ricuj ishqui runacunata Jesús alliyachishcami(Mr 10.46-52; Lc 18.35-43)

29Jericomanta paicuna llujshishpa ricujpica, achcacunami catishpa rircacuna.

30Paicuna chai ñanta ricujpica, mana ricuj ishqui runacunami ñan c'uchullapi tiyacurcacuna. Paicunami Jesús pasacun nijta uyashpaca:

–¡Amito, Davidpaj Churi, ñucanchijta llaquihuai!– nishpa caparircacuna.

31Chaimi chaipi cajcunaca, upalla caichij nishpa jarcarcacuna. Ashtahuanpish paicunaca:

–¡Amito, Davidpaj Churi ñucanchijta llaquihuai!– nishpami, ashtahuan caparircacuna.

32Chaipi Jesús shayarishpa cayashpaca:

–¿Imatataj rurachun ninguichij?– nijpi,

33paicunaca:

–Amito, ñucanchij ñahuicunamari ricuj cachun ninchij –nircacuna.

34Chaimi Jesusca paicunata llaquishpa, paicunapaj ñahuicunapi tuparijpi, paicunapaj ñahuicuna ricujpi, paita catircallacuna.