LEVÍTICO 22 - Quichua Chimborazo Bible

Diosman cushcacunataca chuya cashpalla micunami

1Mandaj Diosca Moisesta mandashpaca:

2“Aarontapish, paipaj churicunatapish cashna mandai: Jucha illaj ñuca shutita ama yanganchichun. Israelcuna ñucapajlla ch'icanchishpa ñucaman cushcacunataca ama yangata rurachun. Ñucami Mandaj Dios cani.

3Aaronpaj huahua huahua curacunaca cunan punllacunapish, shamuj punllacunapipish cashna cachun mandai: Israelcuna ñucapajlla ch'icanchishpa apamushcacunata maijan cura imapi mapayashca cashca jahua ñucaman cungapaj cuchuyajpica ñuca ñaupajmanta anchuchishcami canga. Ñucami Mandaj Dios cani.

4Aaronpaj huahua huahuacunamanta maijanpish lepra ungüihuan cashpa, mana cashpaca quiya shina yacu cachariricuj cashpaca, ima mapa illajlla tucungacama Diospajlla ch'icanchishcacunataca ama micuchun.

Maijanpish ima huañushcapi tuparishca cashpa, mana cashpaca yuraj yacu cachariricuj cashpa,

5mana cashpaca huijsahuan llucashpa purij ima animalpi tuparishcamanta mapayashca cashpa, imapi tuparishpa mapayashca runapi tuparishpa mapayashca cashpaca,

6chaicunapi tuparishcamantaca tutayangacama mapami saquiringa. Paipaj cuerpota yacuhuan manaraj armashpaca, Diospajlla ch'icanchishcacunataca ama micuchun.

7Ña inti huashicushca q'uipami, paica ima mapa illajlla saquiringa. Chai q'uipami Diospajlla ch'icanchishcacunataca paipaj micuna cashcamanta micui tucunga.

8Huañushca animalta cashpa, sacha animal huañuchishpa mirga mirgata rurashcata cashpapish ama micuchun. Chaicunata micushpaca mapayangami. Ñucami Mandaj Dios cani.

9Ñuca mandashcacunata huaquichinguichij. Chai mandashcacunata, yanganchishpaca cancunallataj juchayuj tucushpami chaimantaca huañunguichij. Ñucami cancunata ima jucha illajta ruraj Mandaj Dios cani.

10Manapish cura cajcunaca Diospajlla ch'icanchishcacunataca mana micungachu. Curapaj huasipi pozaj cashpapish, paipajta trabajaj cashpapish, Diospajlla ch'icanchishcacunataca ama micuchun.

11Ashtahuanpish Diospajlla ch'icanchishcacunataca curapajtaj ruraj cashpapish cullquihuan randishca cajllami micui tucun. Shinallataj curapaj huasipi huacharishca cajcunallami, paipaj micunamantaca micui tucun.

12Curapaj ushushi cashpapish, manapish cura cajhuan cazarashpaca Diospajlla ch'icanchishcacunataca mana micungachu.

13Ashtahuanpish curapaj ushushica viuda saquirishca cashpa, mana cashpaca cusa shitashca cashpa, mana huahuacunayuj cashpaca paipaj yayapaj huasiman tigrashpaca, manaraj cazarashpa micuj cashca shinallataj paipaj yayapaj micunataca micui tucunmi.

Shina cajpipish Diospajlla ch'icanchishcataca pi shujtajca mana micungachu.

14Diospajlla ch'icanchishcacunataca pipish mana micunalla cashcata mana yachashcamanta micushpaca, pichcapi chaupishca shuj partehuan Diospajlla ch'icanchishcandij curaman tigrachichun.

15Mandaj Diospaj cachun ch'icanchishpa israelcuna cushcacunataca ama yanganchichuncuna.

16Diospajlla ch'icanchishcacunata pipish micuchun saquishpaca, paicunataca juchayujtami ruranguichij. Mandaj Dios ñucami cancunata ima jucha illajllata ruraj cani ni” nircami.

Ima laya animalcunata Diosman cuna cashcami

17Mandaj Diosca Moisesta mandashpaca:

18“Aarontapish, paipaj churicunatapish, tucui israelcunatapish cashna mandai: Israelcunapuramanta maijan cashpapish, Israelpi causaj mana israelcuna cashpapish ñucaman cusha nishcata pajtachingapaj cucushpaca, cusha nishcamanta Mandaj Diosman tucuita cushpa tucui rupachinapaj cushca,

19chasquinalla cachunca ima mana tucushca c'ari animalta apamuchun. Huagrata cashpa, ovejata cashpa, chivota cashpa c'ari animalta apamuchun.

20Imapish tucushca animalcunataca ama apamunguichijchu. Chaicunataca mana chasquishcachu canga.

21Chashnallataj sumaj causaimanta cushami nishcata pajtachingapaj, mana cashpaca cushca cashpapish cuna cashcata cujpi chasquishca cachunca vacacunamanta cashpa, ovejacunamanta cashpapish ima mana tucushca animalta apamuchun.

22Mandaj Diosmanca ñahui mana ricuj cajpi, chaqui p'aquirishca cajpi, ima utu cajpi, carachayashca cajpi, sisu sisu cajpi, sipu sipu cajpica mana cunachu canguichij. Chaicunamanta maijantapish Mandaj Diosman rupachishpa cunapajca altar jahuapica ama churanguichijchu.

23Huagrata cashpa, carnerota cashpa cusha nishcallamanta cucushpaca ima shina cajpipish, uchilla cajpipish cunguilla. Ashtahuanpish cushami nishcata pajtachingapaj cucushpa chashna cunata cujpica mana chasquingachu.

24Cancuna Mandaj Diosman cushpaca, lulun chugri cajpi, lulun llapirishca cajpi, capashca cajpi, p'itishca cajpica ama cunguichijchu. Cancunapaj llajtapipish ama cunguichijchu.

25Mana israelcunapajtaca chai shina animalcunata cancunapaj Taita Diosman cungapaj apamujpica ama japinguichijchu. Imapish tucushca animalcunataca imapish tucushca cashcamanta mana chasquingachu ninmi ni” nircami.

26Mandaj Diosca Moisesta mandashpaca:

27“Bizita cashpa, bachujta cashpa, chivota cashpa ñucaman cusha nishpaca huacharishcamanta canchis punllacama paipaj mamata chuchuchun saquingui. Ña pusaj punllayuj cajpi cujpimi, Mandaj Diosman cushpa rupachishca cajpi chasquishca tucunga.

28Vacata cashpa, ovejata cashpapish, chai punllallataj huahuandijtaca ama huañuchichun.

29Mandaj Diosta pagui nishpa, paiman rupachishpa cuna cashcata cushpaca pai chasquinallata cunguichij.

30Chai cushcacunataca cayandijpaj ama saquishpa, chai punllallataj micunguichij. Ñucami Mandaj Dios cani.

31Ñuca mandashcacunata huaquichishpa, chaitataj pajtachinguichij. Ñucami Mandaj Dios cani.

32Ñucapaj jucha illaj shutitaca ama yangata ruranguichij. Chashna cashpami, ñucataca israelcunapaj chaupipica ima jucha illajlla cashcata ricuchinguichij. Ñucami cancunata ima jucha illajta ruraj Mandaj Dios cani.

33Ñucami cancunataca cancunapaj Taita Dios cangapaj Egiptomanta llujshichimurcani. Ñucami Mandaj Dios cani ninmi ningui” nircami.