1 SAMUEL 13 - Quichua Chimborazo Bible

Filisteocunahuan israelcuna macanacushcami

1Saulca israelcunataca ñami shuj huatata mandarca. Ña ishqui huatata israelcunata mandacushpaca,

23.000 Israel runacunatami agllarca. Micmas pueblopi, Bet-el urcupica 2.000 runacunami Saulhuan carca. Gabaapi caj Benjaminpaj aillupi caj Jonatanhuanca 1.000 runacunami carca. Shujtajcunataca paicunapaj carpa huasiman richunmi cacharca.

3Jonatanca lomapi cuidaj filisteocunatami yallitaj llaquichirca. Chaita tucui filisteocuna yachaj chayajpimi Saulca, tucui hebreocuna chaita yachashpa macanacunalla tucuchun tucui Israel llajtapi trompetapi tocachirca.

4Cuidaj filisteocunata Saúl huañuchishcatapish, chaimanta filisteocuna israelcunata yallitaj p'iñacushcatapishmi paicunaca yachaj chayarcacuna. Chaimi tucui israelcunaca, Gilgalpi Saulhuan tandanacurcacuna.

5Filisteocunapish israelcunahuan macanacungapajmi, 30.000 carrocunahuan, caballocunapi tiyarishca 6.000 runacunahuan, chaquillahuan purij soldadocunahuancarin t'iyu allpa shina mana yupaipaj achcacuna tandanacurcacuna. Bet-avén pueblomanta inti llujshin ladoman caj Micmas puebloman huichiyashpami, chaipi carpa huasicunata shayachishpa tiyarircacuna.

6Israelcunaca mana mishaipaj cashcata yuyashpami, tucuicuna ña llaqui tucugrinchijmi nishpaca jutcucunapi, sanja huashacunapi, jatun rumi chaupicunapi, peñacunapi, yacu tandarichun rurashca jutcucunapipish miticurcacuna.

7Maijan hebreocunaca, Jordán yacuta ch'imbashpami Gad, Galaad llajtacunaman rircacuna. Saulca Gilgallapitajmi saquirirca. Soldadocunaca manchaihuan cashpapish Saulhuanmi saquirircacuna.

8Saulca Samuel nishca shinallatajmi, Gilgalpica canchis punllacunata shuyarca. Ashtahuanpish Samuel mana chayajpimi, Gilgalmantaca tucuicuna caita chaita ricurcacuna.

9Chaimi Saulca:

–Diosman cushpa tucui rupachinatapish, Dioshuan alli cangapaj cuna cashcatapish apamuichij– nishpaca, tucuita cushpa rupachirca.

10Diosman cushpa ña tucui rupachicushpami Saulca, Samuel chayagricujta ricushpa, Samuelta allillachu cangui ningapaj tupanaman llujshirca.

11Chaipimi Samuelca:

–¿Imatataj rurarcangui?– nijpi Saulca:

–Tucui israelcuna caita chaita ri callarijpi, canpish shamushami nishca punllapi mana chayamujpi, filisteocunapish Micmas pueblopi ñucanchijhuan macanacunalla tucushpa tandanacujpimi,

12ñucaca cashna nircani: “Mandaj Diosta ayudahuai nishpa manaraj mañajpi filisteocuna ñucahuan macanacungapaj Gilgalman uriyamugrinca” nishpami, Mandaj Diosman ñucallataj cushpa tucui rupachina tucurcani– nirca.

13Samuelca Saultaca:

–Canca upa shinamari rurashcangui. Mandaj cambaj Dios mandashcatamari mana huaquichishcangui. Chaita huaquichishca cajpica, israelcunata can mandanataca Mandaj Diosca huiñaicamami saquinman carca.

14Cunanca canca mana unita mandanguichu. Mandaj Dios mandashcata canllataj mana huaquichishcamantami, Mandaj Diosca pai agllashcacunata mandachunca, pai munashcata ruraj runa mandachun pai agllashca runata churanga– nircami.

15Chaimantaca Samuelca, jatarishcahuan rishpami, Gilgalmantaca Benjamín aillupaj Gabaa puebloman huichiyarca. Saúl paihuan chaipi cajcunata yupajpica, 600 runacuna shinami carca.

16Saulhuan, paipaj churi Jonatanhuanca paicunahuan caj runacunandijmi Benjamín llajtapi caj Gabaa llajtallapitaj carcacuna. Filisteocunaca Micmas pueblopi carpa huasicunata shayachishcallapitajmi carcacuna.

17Imatapish shuhuashpa apangapajmi filisteocunaca carpa huasicunamantaca quimsa mirgapi chaupishca llujshircacuna. Shuj mirgaca Ofra puebloman rina ñanta rishpami, Sual llajta ladoman rirca.

18Caishuj mirgaca, Bet-horonman rina ñantami rirca. Chaishuj mirgaca, Zeboim pugru pamba ch'imbapuratami shitashca pambaman rirca.

19Filisteocunaca israelcuna espadata, lanzata ama rurachun tucui Israel llajtapi fierromanta imatapish rurajcuna tiyachun mana saquijpimi, tucui Israelpi fierromanta imatapish rurajca maipi mana tiyarca.

20Chaimi tucui israelcuna paicunapaj yapuna rejata, azadonta, hachata, hocestapish filojllata rurachinaman filisteocunapajman rijcuna carca.

21Yapuna rejacunata tacashcamanta, azadoncunata filojllata rurashcamantaca shuj pim nishcatami cobrajcuna carca. Hachacunata filojllata rurashcamanta, garrochacunata allichishcamantaca shuj siclomanta quimsapi chaupishca cullquitami cobrajcuna carca.

22Macanacunaman rina punllaca Saulhuan, Jonatanhuan cajcunaca paicunapaj maquipica espadatapish, lanzatapish shujllapish mana charircacunachu. Saulhuan paipaj churi Jonatanllahuanmi charircacuna.

23Cuidaj filisteocunamanta shuj mirgaca Micmas puebloman rinacamami shamurcacuna.