ISAÍAS 42 - Quichua Chimborazo Bible

Mandaj Diospajta rurajmi

1Caimi ñucapajta ruraj.

Paitaca ñucami charirasha.

Paica ñuca agllashcami.

Paipimi ñuca almaca cushicun.

Ñuca Espiritutaca paipaj jahuapimi churarcani.

Paimi llajtacunamanca cashcata ruranata apamunga.

2Mana capariringachu.

Mana jatun shimihuan rimangachu.

Pai huillashcaca ñancunapica mana uyaringachu.

3P'aquirinalla carrizotapish mana p'aquingachu.

Huañunalla cushnicuj mechatapish mana huañuchingachu.

Mana llullashcahuanmi cashcata ruranataca apamunga.

4Cai pachapi cashcata rurana callaringacama mana shaicuringachu mana urmaringachu.

Mama cucha c'uchupi caj llajtacunapi causajcunapish, paipaj yachachinatami shuyangacuna.

5Jahua pachata linsota chutaj shina ruraj Dios, cai pachapipish tucuipi granocunata jundachij Dios, tucui cai pachapi causajcunaman causaita cuj Dios, pai nishca shina purijcunaman espirituta cuj Mandaj Diosca cashnami nin:

6“Mandaj Dios ñucami cantaca cashcata ruraj cachun cayarcani.

Ñucallatajmi cantaca cuidasha, cambaj maquimantami pushasha.

Cantami ñuca agllashcacunahuan ñuca ari ninacushcata rurachun churasha.

Llajtacunapaj luz cachunmi churasha.

7Mana ricujcunapaj ñahuita pascachunmi churasha.

Carcelmanta prezucunata llujshichichunmi churasha.

Prezuna huasicunapi causacujcunata, amsapi causacujcunata llujshichichunmi churasha.

8Ñucaca, Mandaj Diosmi cani.

Ñuca shutica chaimi.

Ñuca jatun canataca, pi shujtajman mana cushachu.

Ñucata alabanapaj randi, rurashcalla dioscunata alabachun mana saquishachu.

9Riquichij, puntaman imalla tucunacunaca ñami pajtashca.

Cunanca q'uipata imalla tucuna mushujcunatami huillacuni.

Cancuna manaraj luzman llujshijpimi, cancunamanca yachaj chayachisha.

Mandaj Diosca tucuita rurai tucuj cashpa quishpichijpi alabashcami”.

10Mandaj Diosta cantaichij.

Shuj mushuj cantota cantaichij.

Paitaca tucui cai pachamanta cajcuna alabaichij.

Mama cuchaman uriyajcunapish alabaichij.

Chaipi imalla tiyajcunapish alabaichij.

Cucha c'uchupi tucui causajcunapish alabaichij.

11Shitashca pambacunapish caparichigari.

Chaicunapi causajcunapish caparichigari.

Cedarcuna causan muyundij llajtacunapish caparichigari.

Selapi causajcunapish cantaichigari.

Urcucuna puntamanta cushicushpa caparichigari.

12Mandaj Diostaca sumajyachichigari.

Mandaj Diosta alabanataca cucha c'uchupi causajcunaman huillaichigari.

13Mandaj Diosca, yallitaj jatun runa shinami llujshinga.

Alli macanacuj runa tucuchina yuyailla rijcharij shinami llujshinga.

Caparingami, macanacuiman llujshina caparitami caparinga.

Paita p'iñajcunataca mishangami.

14Ñucaca achca huatacunatami upalla carcani.

Imata mana nishpa upalla carcanillami.

Cunanca huachacuj huarmi shinami caparigrini.

Chashnami tucuita chingachigrini, tucuita millpugrini.

15Urcucunatapish, lomacunatapish shitashcatami saquigrini.

Chaipi tiyaj q'uihuacunatapish tucuitami chaquichigrini.

Jatun yacucunatapish chaquishca allpatami ruragrini.

Yacu tandanapi tiyaj yacucunatapish chaquichishami.

16Ñahui mana ricujcunataca, paicuna mana rijsishca ñantami pushasha.

Paicuna mana rijsishca ñancunatami purichisha.

Paicunapaj ñaupajpimi amsataca, luzman tigrachisha.

Mana puripaj cashcatapish llambu pambacunatami ruragrini.

Caicunataca rurashatajmi, chashnataca manataj saquishachu.

17Rurashcalla dioscunapi shunguta churashpa yacuyachishpa imamanpish rijchajcunata rurashcacunata:

“Cancunami ñucanchij dioscuna canguichij” nijcunataca tucuitaj muspachishpa huashaman tigrachishcami cangacuna.

Israelcunaca Dios llaquichicujpipish manataj yuyaita japincunachu

18Mana uyajcuna uyaichij.

Mana ricujcuna ricungapaj alli ricuichigari.

19¿Pitaj ñahui mana ricuj tucushca?

Ñucapajta rurajcunamari chashna tucushca.

Ñuca cachashca huillaj shina yallitaj mana uyajca ¿pitaj cangari?

Ñuca agllashca shina yallitaj mana ricujca ¿pitaj cangari?

Mandaj Diospajta ruraj shina yallitaj mana ricujca ¿pitaj cangari?

20Chai tucuita ricushpapish ima cashcataca mana entendinchu.

Rinrinta pascashpapish manataj uyanchu.

21Mandaj Diosca cashcata ruraj canata c'uyashcamantami pai mandashcataca sumajyachichun jatunyachichun curca.

22Ashtahuanpish cai gentecunaca ima charishcacunata quichushca sarushcacunamari tucushca.

Tucui paicunataca jutcucunapimi prezu japimurcacuna.

Carcelcunapimi pacarcacuna.

Llaquichishca causachun prezu apajpi paicunata cacharichijpish pi mana tiyanchu.

“Quichushcacunatapish trigrachichij” nijca pi mana tiyanchu.

23Cai tucuita uyashpapish, pi mana cazunguichijca.

Caya mincha ima tucunata huillajpipish, mana yuyaita japinguichijca.

24Jacobpaj huahua huahuacunata macanacuipi japishcacunata shina apachunca ¿pitaj saquircari?

Israelcunataca imalla charishcacunata quichujcunapaj maquipica ¿pitaj churarcari?

Mandaj Diosta p'iñachishpa juchallishcamanta ¿manachu pai chashna churarca?

Paipaj ñancunapi mana purishcamanta, pai mandashcacunata mana uyashcamantami chashna churarca.

25Chaimantami nina sindirij shina p'iñarishpa israelcunapaj jahuapi paipaj p'iñarishcata tallishpa yallitaj jatun macanacuita jatarichishpa tucui Israelpi ninata japichirca.

Ashtahuanpish paicunaca mana entendircacunachu.

Nina lunyashpa tucuchicujpipish mana cazurcacunachu.