1 SAMUEL 18 - Quichua Chimborazo Bible

Jonatanhuan Davidhuan ari ninacushcami

1Davidhuan Saúl ña tucui parlanacujpica, Jonatanpaj yuyaihuan Davidpaj yuyaihuanca shuj shinallami tucurca. Jonatanca Davidtaca pai quiquinta shinallatajmi c'uyarca.

2Chai punllamantami Saulca Davidtaca paihuan cachun japishpa, paipaj yayapaj huasimanca mana cacharca.

3Jonatanhuan Davidhuanca caishujmanta chaishujmanta quiquinta shinallataj c'uyanacushcamantami tucui causaipi alli apanacungapaj ari ninacurca.

4Jonatanca paipaj jahua churanata llujshichishpami Davidman curca. Caishuj paipaj churanacunatapish, espadatapish, arcotapish, chumbillirina caratapishmi curca.

5Davidca Saúl maiman cachajpipish, rijllami carca. Imata ruranapipish allimi llujshij carca. Chaimi Saulca paipaj soldadocunata mandaj cachun churarca. Paica tucui soldadocunapish, Saulpajta rurajcunapish alli nishcami carca.

Davidta tucuicuna c'uyajpi Saúl p'iñashcami

6Chai filisteota David huañuchishca q'uipa tucuicuna tigracujpimi, Israelpi tiyaj pueblocunamantaca tucui huarmicuna cantashpa tushushpa jatun mandaj Saulta tupanaman llujshircacuna. Paicunaca panderocunapi tocashcahuan, cushicushpa cantashcahuan, shujtaj tocanacunapi tocashcahuanmi tuparcacuna.

7Chai huarmicunaca:

“Saulca, 1.000 gentecunatami huañuchishca, Davidca, 10.000 gentecunatami huañuchishca” nishpami cantashpa tushurcacuna.

8Chashna nishca shimicuna Saulta p'iñachijpimi, pai yallitaj p'iñarishpaca:

–Davidtaca, 10.000 gentecunatami huañuchishca nincunami. Ñucataca, 1.000 gentecunata huañuchishcallatamari nincuna. Davidmi jatun mandajca ninallami illan– nirca.

9Chai punllamantami Saulca, Davidtaca p'iña ñahui ricui callarirca.

10Chaipaj q'uipa punllami llaquichichun Taita Dios saquishca millai espíritu Saulta japijpi paipaj huasi ucupi musparicurca. Chaimi Davidca ñaupaman tocaj cashca shinallataj paipaj arpapi tocacurca. Saulca, paipaj maquipi lanzata aisashcami carca.

11Chaipimi Saulca Davidtaca, pataman pasajta lanzahuan shitasha nishpa, lanzahuan shitarca. Ashtahuanpish Davidca ishqui cutinmi mana japichirca.

12Saulca Mandaj Dios paimanta anchushcata ricushpa, Davidhuan cashcata ricushpami Davidtaca mancharca.

13Saulca Davidtaca, 1.000 soldadocunata mandaj cachun churashpami, paipaj c'uchumanta anchuchirca. Chaimi Davidca, soldadocunata ñaupashca llujshij carca. Ñaupashca tigraj carca.

14Davidca imata ruranapipish, pushanapipish alli yachai sapami carca. Mandaj Diosca paihuanmi carca.

15Davidca imatapish yachai sapa cashcahuan rurajta ricushpami, Saulca paitaca ashtahuan mancharca.

16Ashtahuanpish soldadocunaca Davidca rinapipish tigranapipish alli pushajpimi tucui israelcunapish, judacunapish Davidtaca ashtahuan c'uyarcacuna.

17Chaimi Saulca Davidtaca:

–Canmanca ñuca punta ushushi Merabtami cambaj huarmi cachun cusha. Ashtahuanca Mandaj Diospaj macanacuipi c'ari c'ari macanacunguilla– nirca.

Saulca Davidtaca ñuca maquihuanca mana huañuchishachu, ashtahuanpish filisteocuna huañuchichun yuyashpami chashna nirca.

18Chaimi Davidca Saultaca:

–Jatun mandajpaj yerno cangapajca ñucapish, ñuca yayapaj familiapish israelcunapurapica ima mana canchijchu– nirca.

19Saulca paipaj ushushi Merabta Davidman cusha nishca punlla pajtajpica, Davidmanca mana curcachu. Ashtahuanpish Mehola pueblomanta caj Adrielmanmi paipaj huarmi cachun curca.

20Ashtahuanpish Saulpaj q'uipa ushushi Micalmi, Davidtaca c'uyarca. Saulman chaita parlajpica paipica allimi ricurirca.

21Chaimi Saulca: Micalca Davidpajca filisteocunapaj maquipi churangapaj sipina huasca shinami tucugrin yuyashpami, cunantajca paiman cushami nij tucushpa, Davidtaca cutinllataj:

–Cunantajca ñuca yerno tucunguitajmi– nirca.

22Saulca, paipajta rurajcunataca:

–Davidhuanca paillahuan cashna nishpa parlaichij: Jatun mandajca cantaca c'uyanmari, tucui paipajta rurajcunapish canta munancunami. Jatun mandajpaj yerno tucuillari– nichunmi mandarca.

23Saulpajta rurajcunaca pai mandashca shinallataj shimicunahuan Davidman nijpimi, Davidca:

–¿Jatun mandajpaj yerno tucunaca cancunapica jahualla cashcatachu yuyanguichij? Ñucaca shuj huajcha runa. Pipish mana alli nipajmari cani– nirca.

24Saulpajta rurajcunaca, David ima shinalla cutichishcata Saulman tucuita huillajpimi,

25Saulca, paipajta rurajcunataca:

–Davidmanca cashna nichij: Jatun mandajca paipaj ushushimanta imata cuna cashcataca mana mañanchu. Ashtahuanpish jatun mandajta p'iñaj filisteocunata patsajta huañuchishpa, paicunapaj charishca mirga aicha carata p'itishpa apamuchunmi munan– nichunmi mandarca.

Saulca Davidta filisteocunapaj maquipi urmachinata yuyashpami chashna nirca.

26Saulpajta rurajcuna Saúl nishca shimicunata Davidman huillajpica, Davidpica chaicunallata cushpa jatun mandajpaj yerno canaca alli cashcami ricurirca. Chaimi Davidca manaraj chai punlla pajtajpi,

27jatarishcahuan paipaj soldadocunahuan rishpa, 200 filisteocunata huañuchirca. Jatun mandajpaj yerno tucusha nishpami, filisteocuna charishca aicha mirga caracunataca tucuita apamushpa jatun mandajman curca. Chaimi Saulca paipaj ushushi Micaltaca Davidman paipaj huarmi cachun curca.

28Saulca chaita ricushpami, Mandaj Dios Davidhuan cashcata, paipaj ushushi Micalpish Davidta c'uyacujta ricurca.

29Chaimi Saulca Davidtaca ashtahuan manchashpa, paipaj tucui causaipi p'iñarca.

30Filisteocunata mandajcunaca cutin cutinmi israelcunahuan macanacunaman llujshij carca. Chaipica, Davidmi ashtahuan ashtahuan Saulpajta rurajcunata yalli alli imapipish llujshirca. Chashnami paipaj shutica tucuicuna alli nishca tucushpa catirca.