1Mandaj Diosta alabaichigari.
Paipaj shutipi mañaichigari.
Pai imalla rurashcacunataca,
shujtajcunaman yachaj chayachichigari.
2Cantaichigari,
salmocunata cantaichigari.
Mancharinacunata pai rurashcacunata huillaichigari.
3Jucha illaj Diospaj shutipi cushicuichigari.
Mandaj Diosta mashcajcunapaj shungu cushicuchun.
4Mandaj Diostapish, pai tucuita rurai
tucuj cashcatapish mashcaichigari.
Punllanta paipaj ñahuita
mashcaichigari.
5Mancharinacunata pai
rurashcata yuyarichigari.
Pi mana rurai tucuipajta rurashcatapish yuyarichigari.
Pai mandashca shimicunatapish yuyarichigari.
6Cancunaca paipajta ruraj Abrahampaj huahua huahuacunamari canguichij.
Jacobpaj huahua huahuacunamari canguichij.
Pai agllashcacunamari canguichij.
7Paica Mandaj Dios, ñucanchij Taita Diosmari.
Paipaj shimicunaca tucui cai pachapimari.
8Pai ari nishcapish huiñaita mana cungaripajmi.
Pai mandashca shimicunapish huaranga huaranga huahua huahuacunapaj shamucungallami.
9Chaitaca Abrahammanmi cusha nirca.
Isaacmanpish pajtachishatajmi nircami.
10Jacobpaj huahuacunamanmi mandashcata curca.
Israelcunapaj ari nishcaca huiñaipajmi canga,
11nishpaca: “Canaán llajtataca canmanmi cusha.
Cancunapaj allpa cachunmi cusha” nircami.
12Paicunaca, ashacunalla cai punllapimi chashna nirca.
Chai llajtapica pasajcunalla shina cai punllacunapimi chashna nirca.
13Paicunaca llajtan, llajtanmi purircacuna.
Llajtan llajtanmi pasarcacuna.
14Paicunata pi
llaquichichunca Diosca mana saquircachu.
Paicunata llaquichij jatun mandajcunataca llaquichircami.
15“Ñuca
agllashcacunataca ama tuparinguichij.
Ñuca profetacunataca, ama llaquichinguichij” nircami.
16Chai llajtamanca jatun yaricaitami apamurca.
Paicunapaj tucui micunatami chingachirca.
17Paicunata ñaupashpa richunca shuj runatami cacharca.
Shujtajpajta huatashca shina ruraj cachun c'atushca Josetami ñaupashpa richunca cacharca.
18Paipaj chaquipica grillocunata churachishpami llaquichirca.
Paica carcelpi churashcami carca.
19Pai huillashca shimi pajtangacamami
chashna carca.
Mandaj Dios rimashcami Josetaca alli cajta mana alli cajta ricuchicurca.
20Jatun mandajmi paita pushamuchishpa carcelmantaca llujshichirca.
Chai llajtapi causajcunata mandajmi prezumantaca llujshichirca
21Paipaj huasipi mandaj cachunmi churarca.
Paipaj imallami carca chaita mandaj cachunmi churarca.
22Pai churashca mandajcunataca paipaj ima shinami alli can chashna yachachishpa mandachunmi churarca.
Paipaj cunaj yuyajcunatapish yachaj cachun yachachichunmi churarca.
23Chai q'uipaca yaya Israelmi Egiptoman yaicurca.
Chaipica Cam nishca llajtapimi Jacobca causarca.
24Chaipimi, Taita Diosca pai agllashcacunataca yallitaj mirachirca.
Paicunata p'iñajcunata yalli c'ari c'aricunatami rurarca.
25Chai llajtapi causajcunapaj shungupica pai agllashcacunata p'iñana yuyaitami churarca.
Paipajta rurajcunata llaquichinata yuyarichunmi chashna yuyaita churarca.
26Chaimanca paipajta ruraj Moisestami cacharca.
Pai agllashca Aarontapishmi cacharca.
27Pi mana rurai tucuipajtapish rimashpalla ruranatami churarca.
Cam llajtapica, pi mana rurai tucuipajcunata rurashpami ricuchircacuna.
28Amsatami cacharca, tucuitami amsayachirca.
Pai rimashcacunataca pi mana c'ariyarcacunachu.
29Yacucunatapish yahuarman tigrachishpami, chalhuacunatapish huañuchirca.
30Chai llajtapica sapocunatami jundachirca.
Jatun mandajcunapaj mandana huasicunacamami jundarca.
31Taita Dios rimajpica yallitaj achca chuspicunami shamurcacuna.
Tucui chai llajtatami piliscunapish taparca.
32Tamyapaj randica, rundutami cacharca.
Tucui chai llajtamanca lunyacuj ninatami cacharca.
33Uva chagracunatapish, higo yuracunatapish ñuturcami.
Chai llajtapi tiyaj tucui yuracunatapish p'aquircami.
34Taita Dios rimajpica langostacunapish, mana yupai tucuipaj piquicunapishmi shamurcacuna.
35Paipaj llajtapi tiyaj tucui q'uihuatami micurcacuna.
Paipaj llajtapi p'ucushcacunatapish tucuimi micurcacuna.
36Paipaj llajtapi cajcunapaj punta huacharishca churicunatami huañuchirca.
Paipaj llajtapi cajcunapaj punta fuerzahuan charishca churicunatami huañuchirca.
37Israelcunataca cullquindij, curindijmi llujshichimurca.
Paicunapaj aillucunapurapica ungushcacunaca mana tiyarcachu.
38Egipciocunaca israelcunataca jatuntami manchacurcacuna. Paicuna llujshijpica cushicurcacunami.
39Taita Diosca israelcunata tapachunca p'uyutami cacharca.
Tutata achijyachichunca ninatami churarca.
40Aichata mañajpica codornizcunatami cacharca.
Jahua pacha tandatami mana nijta cararca.
41Peña urcutami chaupirca, yacucunami llujshirca.
Chaquishca pambacunatapish, jatun yacumi callparca.
42Paipajta ruraj Abrahamman, paipaj jucha illaj shimihuan cushani nishcatami yuyarirca.
43Paipaj cajcunataca cushicuihuanmi llujshichirca.
Pai agllashcacunataca cushicuihuanmi llujshichirca.
44Paicunamanca shujtaj llajtacunapaj allpacunatami curca.
Shujtaj gentecuna tarpushcacunatami japircacuna.
45Pai chaitataj pajtachichun nishcacunata huaquichichun, pai mandashcacunata pajtachichunmari chai llajtapi churarca.
¡Paillata alabashunchigari!
Who We AreWhat We EelieveWhat We Do
2025 by iamachristian.org,Inc All rights reserved.
