NÚMEROS 20 - Quichua Chimborazo Bible

Peña urcumanta yacuta llujshichishcami(Ex 17.1-7)

1Tandanacushca tucui israelcunaca huatapaj punta quillapimi Zin nishca shitashca pambaman chayashpa, Cades shuti pueblopi carpa huasicunata shayachishpa tiyarirca. Moisespaj pani Mariaca chaipimi huañurca. Paitaca chaillapitajmi pambarcacuna.

2Chaipica yacu mana tiyajpimi, tandanacushca israelcunaca Moisestapish, Aarontapish juchachishpa rimangapaj tandanacurcacuna.

3Israelcunaca Moisestaca cashna nishpami rimarcacuna:

–Mandaj Diospaj ñaupajpi ñucanchij huauquicuna huañui punlla huañushca cashpachari alli canchijman carca.

4Mandaj Diospajlla israelcunataca ¿imapajtaj cai shitashca pambamanca pushamunguichij? Ñucanchijpish, ñucanchij animalcunapish caipi huañuchunllamari pushamushcanguichij.

5Cai jatun llaqui llajtaman pushamungapajllamari Egiptomantaca ñucanchijtaca huichiyachimushcanguichij. Cai llajtapica higocunata, uvacunata, granadacunata tarpuna allpacunaca mana tiyanchu. Ubyanapaj yacullapish mana tiyanchu– nircacunami.

6Shina nijpimi Moisespish, Aaronpish israelcunamanta ch'icanyashpa Mandaj Dioshuan tupanacuna carpa huasi punguman rishpa, chaipi pambaman tupajta cumurircacuna. Chaipimi Mandaj Diosca paipaj sumaj cashcahuan paicunaman ricurirca.

7Mandaj Diosca Moisestaca cashnami nirca:

8“Cambaj tauna caspita japi. Cambaj huauqui Aaronhuan ishqui tucushpa tucui israelcunata tandachishpa paicunapaj ñaupajpi peña urcuta rimai. Peña urcuta rimajpica yacuca llujshingallami. Chai yacutaca israelcunapish, paicunapaj animalcunapish ubyachunllacuna” nircami.

9Shina nijpi Moisesca, Mandaj Dios mandashca shinallataj rurashpami, Mandaj Diospaj ñaupajmanta tauna caspita japirca.

10Moisespish, Aaronpish peña urcu ñaupajpi tucui israelcunata tandachishpami, Moisesca israelcunataca:

–¡C'ariyaj gentecuna caita uyaichij! Cancunamanca cai peña urcumantami yacuta llujshichishpa cugrinchij– nirca.

11Moisesca, paipaj maquita alzashpa pai charicushca tauna caspihuanmi peña urcutaca ishqui cutin garrotirca. Chaipi achca yacu llujshijpimi israelcunapish, paicunapaj animalcunapish yacuta ubyarcacuna.

12Ashtahuanpish Mandaj Diosca Moisestapish, Aarontapish cashnami nirca:

–Cancunaca ñucata mana crishpamari, ñuca tucuita rurai tucuj cashcataca israelcunapaj ñaupajpi mana ricuchinguichij. Chaimanta ñuca cushca llajtamanca cai israelcunahuanca mana yaicunguichijchu– nirca.

13Chai yacucunaca p'iñanacushca yacu nisha ninmi. Israelcunaca chaipimi Mandaj Diostaca yacu illan nishpa juchachishpa rimarcacuna. Mandaj Diosca paicunapaj chaupipimi pai jucha illaj cashcata ricuchirca.

Edomitacunaca israelcuna paicunapaj llajtata pasachun mana saquishcami

14Moisesca Cades pueblopi cashpami, Edom llajtata jatun mandajhuan paipaj randi parlanacuchun huillajcunata cashna nichun cacharca: “Cambaj huauqui Israelca cashnami nin: Ñucanchij imalla llaquicunata apacushcataca canllataj yachanguimi.

15Ñucanchij yayacuna Egiptoman ima shina uriyashcatapish, Egiptopi uni huatacunata ñucanchij cashcatapish, ñucanchijtapish, ñucanchij yayacunatapish egipciocuna ima shinalla llaquichishcatapish,

16llaquihuan cashpa Mandaj Diosta ñucanchij caparishpa mañajpi, pai uyashpa paipaj angelta cachashpa ñucanchijta Egiptomanta llujshichishcatapish allimi yachangui. Cunanca ñucanchijca cambaj llajta lindecuna c'uchullapi caj Cades pueblopimi canchij.

17Chaimantami ñucanchijca cambaj llajtata pasangapaj ñanta mañachichun roganchij. Ñucanchijca chagracuna jahuatapish, uva chagracuna jahuatapish mana rishunchu. Cancunapaj pugyucunamantapish yacuta mana ubyashunchu. Cambaj llajtata pasangacamaca alli ladomanpish lluqui ladomanpish mana llujshishpa jatun ñanllatami rishun” nishpa rogachunmi cacharca.

18Shina nijpi, Edomta mandajca:

–Ñuca llajtataca manataj pasanguichijchu. Cancuna pasashuntaj nijpica, macanacungapaj ñuca soldadocunahuanmi llujshisha– nircami.

19Chaimi israelcunaca:

–Ñucanchijca jatun ñanllatamari rishun. Ñucanchijpish, ñucanchij animalcunapish cancunapaj yacuta ubyashpaca mashna cajpipish pagashunmi. Ñucanchij pasangacamalla cambaj ñanta mañachihuai– nircacunami.

20Shina nijpipish:

–Ñuca llajtataca manataj pasanguichijchu– nishpami, Edomta mandajca alli macanacuj achca gentecunata pushashca israelcunahuan macanacungapaj llujshirca.

21Edomta mandajca, paipaj llajta ñanta israelcuna pasachunca mana saquircachu. Chaimi israelcunaca shujtaj ñanta mashcashpa chaimanta ladoyashpa rircacuna.

Hor urcupi Aarón huañushcami

22Tandanacushca tucui israelcuna Cadesmanta rishpaca, Hor urcumanmi chayarcacuna.

23Edom llajta lindecuna c'uchullapi caj Hor urcupimi, Mandaj Diosca Moisestapish, Aarontapish mandashpa cashna nirca:

24“Aaronca ñaupa yayacunahuan tandanacunamanmi ña rigrin. Cancunaca yacu illan nishpa p'iñanacuipimi ñuca mandashcata mana cazurcanguichij. Chaimanta paica israelcunaman ñuca cushca llajtamanca mana yaicungachu.

25Chaimanta Aarontapish, paipaj churi Eleazartapish pushashpa Hor urcuman huichiyachishpa,

26chaipi Aaronpaj churanacunata llujshichishpa, paipaj churi Eleazarman churachi. Aaronca paipaj ñaupa yayacunahuan tandanacugringapaj chaipimi huañunga” nircami.

27Moisesca Mandaj Dios mandashca shinallataj rurashpami, tucui israelcuna ricucujpi Hor urcuman huichiyarca.

28Chaipimi Moisesca Aaronpaj churanacunata llujshichishpa, Aaronpaj churi Eleazarman churachirca. Aaronca chai urcu puntapimi huañurca. Moiseshuan, Eleazarhuanca chai urcumantaca uriyamurcacunallami.

29Aarón huañushcata tucui israelcuna yachashpaca, yallitaj llaquilla tucushpami, quimsa chunga punllacunata llaquilla carcacuna.