SOFONÍAS 2 - Quichua Chimborazo Bible

C'uchulla llajtacunapi causajcunata llaquichina cashcamanta

1Llajtacunapi causaj pingai illajcunalla, tandanacushpa alli yuyarichigari.

2Mandaj Dios huillachishcapi nishca shina manaraj tucujpi, t'amu shina manaraj chingarishpa, Mandaj Dios jatunta p'iñarishpa cancunata manaraj jatunta llaquichijpi alli yuyarichigari.

3Cai llajtapi causaj alli shungu runacuna, cancunaca Mandaj Dios imallata rurashcata yuyarishpa paita mashcaichigari. Cashcata ruranata mashcaichigari. Chashna cancuna allita ruranata mashcajpica, Mandaj Dios jatunta p'iñarishpa llaquichicui punllaca huaquichingapishchari.

4Gaza puebloca, shitashcami saquiringa. Ascalón pueblopish, chingachishcami saquiringa. Asdod pueblopi causajcunapaj ima charishcacunatapish, chaupi punllapimi quichushpa apangacuna. Ecrón pueblopi causajcunataca, sapimanta llujshichij shinami llujshichingacuna.

5Mama cucha yacu uripi causaj cereteocunaca, ¡aij imachari tucungacuna! “Filisteocuna causan Canaán llajtalla, tucui cancunatami huañuchisha. Shujllatapish causajta mana saquishpami, tucuita chingachichisha.

6Shinallataj mama cucha yacu uripi tiyaj tucui llajtacunapica, michina q'uihuacunami huiñanga, ovejacunapaj corralcunallami tucunga” ninmi.

7Chai allpaca, Judapaj huahua huahuacunamanta saquirijcuna causana llajtami canga. Paicunaca chaipimi michinga. Ascalón pueblopi tiyaj huasicunapimi tutacunaca dormingacuna. Paicunapaj Mandaj Taita Diosmi ricugringa, prezu causacujcunatapish cacharichingami.

8“Moab shuti, Amón shuti llajtacunapi causajcuna, ñuca agllashcacunata yangata rurashpa c'amicujtaca uyarcanimi. Paicunami israelcunapaj llajtata quichushpa jatun tucushpa causarcacuna.

9Ñucaca causacunimi ninmi tucuita Mandaj, israelcunapaj Taita Diosca. Chaimanta Moab llajtaca, Sodoma pueblo shinami saquiringa. Amón llajtaca, Gomorra pueblo shinami saquiringa. Chai llajtacunapica chinicunami huiñanga, cachillami tucunga. Chashnami huiñaita shitashca saquiringa. Ñuca agllashcacunapuramanta saquirishcacunami paicuna imalla charishcacunatapish quichungacuna, allpacunatapish paicunapaj cachunmi japingacuna” ninmi.

10Paicunallataj jatun tucushpa, tucuita Mandaj Dios agllashcacunata yangata rurashpa c'amishcamantami, chai llaquicunaca japinga.

11Mandaj Diosca, paicunahuanca jatuntami p'iñaringa. Chaimanta cai pachapi tiyaj dioscunataca tucuitami chingachinga. Tucui llajtacunapi causajcunaca, tucuicunallatajmi paicuna maipi cashcallapitaj Diostaca cunguringacuna.

12Etiopía llajtapi causajcuna, cancunatapish ñuca espadahuanmi huañuchisha.

13Mandaj Diosca, paipaj maquita janaj ladoman chutashpami, Asiria llajtataca chingachinga. Shinallataj Nínive pueblotapish, shitashca pambata shinami, chaquishca llaquinayajta saquinga.

14Chaipica charina animalcunapish, sacha animalcunapish causanami tucunga. Pelicanopish, erizopishmi huasi pilar jahuacunapi dormingacuna, huasi ventanacunapimi huacangacuna. Cedro caspicunapish, p'aquirishpa llujshishcamanta pungucunapish llaquinayajmi tucunga.

15Chai puebloca, imata mana manchashpa, cushicushpami causarca. Chaipi causajcunaca, paicunapaj shungupica: “Ñucanchijllamari cashna jatunca canchij” nijcunami carca. ¡Riquichigari, ima shinami sacha animalcuna causanapaj shitashca saquirishca! Chashna tucushcamantaca, maijanpish chai c'uchullata purijcunaca maquipi huajtarishpami asingacuna.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help