HECHOS 13 - Quichua Chimborazo Bible

1Antioquiapi caj tandanacushca crijcunapica profetacuna, yachachijcunami tiyarca. Paicunaca: Bernabé, Níger nishca Simón, Cirene pueblomanta Lucio, mandaj Herodeshuan ishqui huiñaj Manaén, Saulopishmi carca.

2Shuj punlla paicuna ayunashpa Jatun Diosta mañacujpimi, jucha illaj Espirituca: “Bernabeta Saulotaca ñucapajta ruraj cachunmi ña cayarcani. Chaimanta paicunataca ñucapajta ruranata callarichun ch'icanchichij” nirca.

3Ayunashpa Taita Diosta mañashca q'uipaca, paicunapaj jahuapi maquita churashpa alli ringuichij nishpami cacharcacuna.

Chiprepi huillashcami

4Paicunaca jucha illaj Espíritu cachajpimi, Seleucia puebloman rircacuna. Chaimantami Chipremanca barcopi rircacuna.

5Salamina puebloman chayashpaca, judiocunapaj sinagogacunapimi Taita Diospaj Shimita huillarcacuna. Juanpish paicunata ayudashpami puricurca.

6Chai tucui llajtapi huillashpa puricushpaca, Pafos pueblomanmi chayarcacuna. Chaipica Barjesús shuti judío yumbuhuanmi tuparcacuna. Paica Taita Dios cachashca profetami cani nishpa llullaj runallami carca.

7Chai yumboca jatun mandajpaj randi Chipre llajtata mandaj Sergio Paulohuanmi alli apanacuj carca. Chai mandajca alli yachaj cashpami Bernabetapish, Saulotapish Taita Diospaj Shimita huillashcata uyangapaj cayaj cacharca.

8Paicuna huillanaman shamujpica, ama crichun nishpami chai mandajtaca jarcarca. Chai yumbollatatajmi Elimas nijcuna carca.

9Saulotapish Pablo nijcunami carca. Paica jucha illaj Espirituhuan junda cashpami, chai yumbota ricurashpaca,

10cashna nirca:

–¡Diablopaj huahua, umana yuyaillahuan junda, mana allita ruranata munaj, imatapish cashcata ruranata p'iñaj! Jatun Diospaj alli ñanmanta ladoyachinataca ¿ima nishpataj mana saquisha ningui?

11Cunanca Jatun Dios paipaj tucuita rurai tucuj maquihuan llaquichijpi asha punllacama mana ricujmi saquiringui. Intitapish mana ricunguichu– nircami.

Chashna nincami chai yumboca ñahui mana ricujpi amsapi saquirirca. Chaimi maijanpish pushachun nishpa paipaj muyundijta mashcarca.

12Chashna tucushcata jatun mandajpaj randi mandaj ricushpa, Mandaj Jesusmanta yachachishcata uyashpaca mancharishpami crirca.

Pisidiapi caj Antioquiapi huillashcami

13Pabloca paihuan purijcunandij, Pafos pueblomanta barcopi huichiyashpa yacuta rishpami, Panfiliapi caj Pergeman chayarcacuna. Ashtahuanpish Juanca paicunamanta ch'icanyashpami, Jerusalenman tigrarca.

14Pablohuan Bernabehuanca Perge pueblomanta rishpaca, Pisidiapi caj Antioquiamanmi chayarcacuna. Chaipica samana punllapimi, sinagogaman yaicushpa tiyarircacuna.

15Chai sinagogapica mandashcacunata quillcashcatapish, profetacunaman Taita Dios Quillcachishcatapish rezashca q'uipaca, sinagogapi pushajcunami:

–Huauquicuna, imallatapish caipi cajcunaman yuyachishpa rimashun nishpaca, rimapaichijlla– nichun cacharca.

16Shina nijpi Pabloca jatarishpa maquihuan upalla caichij nishpaca:

–Tucui israelcuna, Taita Diosta manchashcamanta caipi cajcunapish uyahuaichij.

17Ñucanchij israelcunapaj Taita Diosca, ñucanchij ñaupa yayacunatami agllarca. Paicunataca Egipto llajtapica, carumanta rishcallacuna cajpipish achcatami mirachirca. Chai q'uipaca Taita Diosca tucuita rurai tucuj cashcahuanmi Egiptomantaca llujshichirca.

18Chaimanta llujshichishpaca, chuscu chunga huatacunatami paicuna ima mana allita rurajpipish shitashca pambapica paicunataca mana shitarca.

19Chai q'uipaca Canaanpi caj canchis llajtacunapi causajcunata chingachishpami, chai allpataca ñucanchij ñaupa yayacunaman curca.

20Chai q'uipaca chuscu patsaj pichca chunga huatacuna shinatami, juezcuna mandachun churashpa profeta Samuelpaj punllacunacama mandachirca.

21Chai punllacunapimi israelcunaca shuj jatun mandajta mañarcacuna. Chaimi Taita Diosca, Benjaminpaj aillumanta Cis runapaj churi Saulta, chuscu chunga huatacunata mandachun curca.

22Saulta pai mandacunmanta anchuchishpami, jatun mandaj cachun Davidta churarca. Paitami Taita Diosca: “Isaipaj churitami agllarcani. Paica ñuca shungu munashca shina cazujmi. Chaimanta ñuca munashcatami ruranga”.

23Taita Diosca pai cusha nishca shinallatajmi, Davidpaj huahua huahuamanta israelcunapaj Quishpichij cachunca Jesusta curca.

24Jesús manaraj shamujpimi, Taita Diosman cutirishpa bautizarichij nishpa, tucui israelcunaman Juanca huillarca.

25Juanca pai huillana cashcata tucuchigrishpami: “Ñucataca ¿pi cashcatataj yuyanguichij? Ñucaca mana cancuna shuyacushcachu cani. Shujmi ñucapaj q'uipa shamunga. Ñucaca paipaj pargate huatashcallatapish mana pascaipajmi cani” nirca.

26Abrahammanta mirarishca ñuca huauquicunapish, shinallataj maijanlla Taita Diosta manchajcunapish, quishpirinamanta cai huillashcaca cancunapajmi.

27Jerusalenpi causajcunapish, paicunata mandajcunapish Jesús pi cashcataca mana yacharcacunachu. Profetacuna quillcashcacunata samana punllacunapi rezashcata uyashpapish mana entendircacunachu. Chaimantami Jesusta huañuchishpaca profetacuna huillashcataca paicunallataj pajtachij tucurcacuna.

28Jesustaca imamanta mana huañuchi tucushpapish, Pilatotaca: “Jesustaca huañuchilla” nircacunami.

29Jesús ima shina tucuna cashcata Quillcashcapi nishca shina, ña tucuita pajtachishpaca caspimanta uriyachishpami, huañushcata churana jutcupi churarcacuna.

30Chashna rurajpipish Taita Diosmi, huañushcacunapaj chaupimanta paitaca causachirca.

31Paita causachijpica, paica Galileamanta Jerusalenman paihuan rijcunamanmi, tauca punllacunata ricurirca. Cunanca, paicunami tucuicunaman paita ricushcata huillacuncuna.

32Taita Diosca ñucanchij ñaupa yayacunamanca shuj Quishpichijtami cachasha nishca. Ñucanchijca chai alli huillaitami huillacunchij.

33Chashna cusha nishcataca ñucanchij ñaupa yayacunapaj huahua huahua ñucanchijmanmi Jesusta causachishpa pai cusha nishcataca Taita Diosca pajtachishca. Q'uipa Salmopipish: “Canca ñuca Churimi cangui. Cunanmi canmanca causaita cuni” nishpa quillcashcami tiyacun.

34Chashna nishpami Taita Diosca huañushcacunapaj chaupimanta Jesusta causachishpa, paipaj aicha mana ismuna cashcata ricuchishpaca: “Davidta llaquishpa cushatajmi nishcacunataca, cancunamanmi cusha” nishcami.

35Chaimantami shujtaj Salmopipish: “Cambaj Jucha Illaj aicha ismuchunca, mana saquinguichu” nishca.

36Davidca pai causacui punllapi causajcunataca, Taita Dios munashca shinami servirca. Pai huañushpaca paipaj ñaupa yayacunahuanmi tandanacurca. Paipaj aichaca ismurcami.

37Shina cajpipish Taita Dios causachishca Jesuspaj cuerpoca mana ismurcachu.

38Caita yachaichij huauquicuna: Cancunapaj juchacunataca ñuca cancunaman huillacushca Jesucristollamantami perdonanga.

39Moisés Mandashcata rurashcallahuanca mana justificashca cai tucurcanguichijchu. Jesucristota crijcunataca tucuicunatami, Taita Diosca justifican.

40Chaimanta alli yuyarichij, profetacunata Taita Dios Quillcachishcapi nishcacunaca, ñataj cancunapaj jahua canman. Chaipica cashnami nin:

41“Uyaichij, ñuca huillashcata mana cazushpa yanganchijcuna. Mancharishpa, maipi ima tucuichij.

Cancuna causacui punllacunapi, mancharinacunata ñuca rurana cashcata, maijan huillajpipish mana cringuichijchu” nishcami.

42Yachachishpa judiocunapaj sinagogamanta llujshicujpica mana judiocunarajmi: “Cunan shina samana punllapipish caicunataca cutin yachachipanguichij” nircacunami.

43Tucuchishpa cayacamachij nishpa rijpica, judiocunamanta achcacunapish, judio tucushpa Taita Dios yuyailla cajcunapish, Pablota, Bernabeta catishpami rircacuna. Paicunataca Taita Diospaj mana c'uyaipajta c'uyaipi catiranguichij nishpami cunarcacuna.

44Chai cati samana punllapica chai pueblopi causajcunaca cazi tucuicunami, Taita Diospaj Shimita uyangapaj tandanacurcacuna.

45Chashna achcacuna tandanacujta judiocuna ricushpaca, huañurishpami achcata p'iñarircacuna. Chaimantami Pablo huillashcaca manapish chashnachu nishpa c'amircacuna.

46Chashna nicujpipish Pablohuan, Bernabehuanca mana manchashpami cashna nircacuna:

–Cancunamanrajmi Taita Diospaj Shimitaca huillana carcanchij. Chashna cajpipish ñucanchij huillashcata mana uyashun nishpaca, huiñai causaitaca mana charinapaj cashcatami cancunallataj ricuchinguichij. Cunanca mana judiocunaman huillanaman rinchij.

47Jatun Diosca ñucanchijtaca cashnami mandarca:

“Cantaca mana judiocunata luz shina achijyachichunmi churarcani.

Tucui cai pachapi causajcunapish, can huillashcamanta quishpirichunmi churani” nishcami– nircami.

48Chashna huillashcata mana judiocuna uyashpaca, Jatun Diospaj Shimica sumajmari nishpami achcata cushicurcacuna. Chaimi huiñai causaipaj canacunaca tucuicuna crircacuna.

49Chashnami Jatun Diospaj Shimica, tucui chai llajtacunapi huillarcacuna.

50Ashtahuanpish judiocunaca Taita Dios yuyailla causangapaj judio tucushca alli nishca huarmicunata, chai pueblota mandajcunatapish, chai runacunata llaquichingapaj jatarishunchij nishpa yachachircacuna. Chashna yachachishpaca Pablotapish, Bernabetapish achcata llaquichishpami chai llajtamanta llujshichishpa cacharcacuna.

51Paicunaca chai llajtapi causajcunataca mana alli cashcata ricuchishpami, chaquipi japirishca ñutu allpatapish chaspishpa, Iconio puebloman rircacuna.

52Chai llajtapi Jesusta catijcunaca jucha illaj Espirituhuan junda cashcamanta cushicuihuanmi carcacuna.