1Cunan llaquihuan cajcunaca mana chashna amsallapitajca causacungallacunachu. Zabulón llajtata, Neftalí llajtata punta cutin llaquichicui punllacunapi llaquichishca shinaca mana llaquichicungallachu. Ashtahuanpish Jordán yacu ladopi caj mama cuchaman rina ñanpi causajcunapaj, Diosta mana rijsijcunapajca Galilea llajtapica jatun cushicuimi tiyanga.
2Amsapi purijcunaca jatun luztami ricurcacuna.
Huañunalla amsapi cajcunataca luzmi lamyachirca.
3Gentecunataca achcayachircanguimi.
Cushicuitapish mirachircanguimi.
Cozicha punllapi cushicuj shinami quiquinpaj ñaupajpica cushicungacuna.
Quichumushcacunata chaupishpa cushicuj shinami quiquinpaj ñaupajpica cushicungacuna.
4Paicunata llashacuj yugotapish quiquinmari p'aquircangui.
Paicunapaj rigra jahuapi caj caspitapish, quiquinmari p'aquircangui.
Paicunata llaquichicuj varatapish quiquinmari p'aquircangui.
Madiancunata llaquichi punllapi shinamari rurangui.
5Jatun macanacuiman soldadocuna churashpa t'alaj t'alaj nishpa purina zapatocunataca rupachishcami canga.
Yahuarpi c'ahuirishca caj churanacunapish rupachishcami canga.
Chaquishca q'uihua rupaj shinami rupanga.
6Ñucanchijmanca churitamari cushca, chai huahuamari huacharishca.
Paipaj maquipimari mandanataca churashca.
Paica cashna shuticunami canga:
“Mancharinata cunaj, tucuita rurai tucuj Dios, huiñaita causaj Yaya, sumaj causaita Mandaj” nishcami canga.
7Pai mandanaca ashtahuanmi mirashpa catinga.
Pai mandacujpica sumaj causaimi tiyanga.
Chai mandanaca mana tucuringachu.
David mandashpa tiyanapimi tiyaringa.
Pai mandanatami mandanga.
Ima pandata mana rurashpa, cashcata rurashpami mandanga.
Imatapish alli cachun churashpami mandanga.
Pi mana cuyuchipajmi canga.
Pai mandai callari punllamanta huiñaitami chashna canga.
Tucuita Mandaj Diosca chaita rurana munailla cashcamanta pajtachingatajmi.
Mandaj Dios p'iñarishpa israelcunata llaquichishcami8Jatun Diosca Jacobpaj huahua huahuacunamanca, shuj huillanatami cacharca.
Chaica ñami israelcunapaj jahuapi urmashca.
9Chaitaca tucui gentecunami yachangacuna.
Efraincunapish, Samariapi causajcunapishmi yachangacuna.
Chaita ricushpaca, c'ari tucushpa, jatun tucushpami cashna nincuna:
10“Ladrillocunahuan shayachishcata urmachijpica, yacu rumicunahuanmi shayachishun.
Sicómoro caspicunahuan rurashcata p'itijpica, cedro caspicunahuanmi shayachishun” nincunami.
11Mandaj Diosca, Rezinta p'iñajcunatami paita llaquichichun pushamunga.
Paita p'iñajcunatami tandachinga.
12Inti llujshin ladomantaca Siriocunatami pushamunga.
Inti huashicun ladomantaca filisteocunatami pushamunga.
Paicunami israelcunataca, shimi jundata amullishpa millpungacuna.
Chashna rurashpapish Mandaj Dios yallitaj p'iñarishcaca manataj pararingachu.
Ashtahuanpish paipaj maquica chutashcarajmi canga.
13Chashna llaquichicujpipish israelcunaca, paicunata llaquichicuj Mandaj Diospajmanca mana cutirircacunachu.
Tucuita Mandaj Diostaca mana mashcarcacunachu.
14Chaimantami Mandaj Diosca israelcunapajtaca umatapish chupatapish chai punllallataj p'itinga.
Yuratapish chai punllallatajmi ramacunandij p'itinga.
15Uma nishpaca, ñahui ricuica allitajlla cunaj yuyajcuna nisha ninmi.
Chupa nishpaca, llullashpa huillaj profetacuna nisha ninmi.
16Cai gentecunata mandajcunaca umajcunami.
Chaimi paicuna mandacushcaca chingarin.
17Tucuicunami manapish rimana cajta rimajcuna.
Tucuicunami llullacuna, millaicuna.
Chaimanta Jatun Diosca, chaipi causaj q'uipa huiñaicunahuanca manataj cushicunchu.
Yaya mama illajcunatapish, viudacunatapish manataj llaquingachu.
Tucui chaicunata rurashpapish, pai p'iñarishcaca manataj pararingachu.
Paicunata llaquichingapajca maquita chutashcarajmi.
18Paicuna millaita rurashcaca nina shinami sindiringa.
Casha q'uihuacunata, casha yuracunata, millpuj shinami tucuchinga.
Sachapi nina lunyajpi, cushni muyurishpa llujshishpa huairapi chingarij shinami chingaringacuna.
19Tucuita Mandaj Dios p'iñarijpica, cai pachaca amsayangami.
Gentecunaca chaquishca q'uihua shinami lunyashpa rupanga.
Gentecunaca paipaj quiquin huauquitapish mana llaquingachu.
20Alli maquiman cajta millpushpapish yaricaillahuantajmi saquiringacuna.
Lluqui maquiman cajta micushpapish mana huijsa jundata micungachu.
Tucuicunami paicunapaj quiquin rigrallatataj micungacuna.
21Manasesca Efraintami millpunga.
Efrainca Manasestami millpunga.
Ishquindij tucushpami, Judata p'iñashpa jataringa.
Tucui chaicunata rurashpapish, pai p'iñarishcaca manataj pararingachu.
Paicunata llaquichingapajca maquita chutashcarajmi.
Who We AreWhat We EelieveWhat We Do
2025 by iamachristian.org,Inc All rights reserved.
