JOB 14 - Quichua Chimborazo Bible

Runapaj causaica utca tucurijllami

1Huarmimanta huacharishca runaca,

asha punllacunallata causana cashca jahua,

llaquihuan shaicushcallami causan.

2Sisa ricurijpi p'itishca shinallami tucun.

Llandu ricurishcahuan chingarij

shinallami tucun.

3¿Chashna cashcata yachashca jahuachu

cambaj ñahuihuan chapacungui?

Imalla rurashcata canman

ricuchichunpishmari cayangui.

4¿Juchata rurashcataca pi

pichari tucuipajchu?

Pitaj chaitaca pichari tucungari.

5Paipaj causaica asha

punllacunacamallamari.

Pai causana quillacunapish cambaj

c'uchullapimari.

Can churashcamantaca, mana yallitaj

causangachu.

6Paita can cungarijpica, paica

huañungallami.

Cullqui jahua trabajaj runa punlla

tucurijta shuyacuj shinami shuyanga.

7Yurataca p'itishpapish retoñangami

yuyanchijrajmi.

P'itishca cashpapish, mushuj yura

cutin huiñanrajmi,

retoñocunaca manataj illanchu.

8Allpa ucullapitaj sapi chaquishpapish,

allpallapitaj tronco ismushpapish,

9yacuta tsupashpaca, cutin verdijlla

tucunllami, mushuj yurata tarpushca

shina p'angasapami tucun.

10Ashtahuanpish runaca huañushpaca,

p'itishca shinami saquiringa.

Runaca ña chingarishpaca,

maipi mana ricurinchu.

11Mama cuchamanta yacu rij shina,

jatun yacu asha asha chaquirij

chingarinllami.

12Chashnami runa huañushpaca,

mana cutinca jatarin.

Jahua pacha tucuringacama manataj

rijcharingachu, dormicushcamantaca

manataj jataringachu.

13Maijanpish cantaca Seolpi

ñucata pacachun nijpichari.

P'iñarishcamanta can alli tucungacamaca,

chaipi pacashpachari alli canguiman.

Ashacama shuyashpapish, ñucataca cutin

yuyarishpachari alli canguiman.

14¿Runaca huañushpaca, cutin

causaringachu?

Ñuca causashcacamaca ñucapaj

quishpirina chayamungacama,

punllanta shuyacushallami.

15Chaipimi ñucata cayajpica,

ñucaca cutichisha.

Chaipica cambaj maquihuan rurashcataca

c'uyanguimi.

16Ashtahuanpish cunanca ñuca

purishcatamari yupangui.

Ñuca juchamantaca manamari samachisha

ninguichu.

17Ñuca canta mana cazushcataca

costalpimi sellashpa charicungui.

Ñuca millaita rurashcataca sirashpami

charicungui.

18Urcu suchurijpica, tucuimi chingarin.

Yacu rumi urcucunapish, pai

tiyacushcamanta urmanmi.

19Achca yacu shamushpa allpacunata

apajpica, rumicunapish mucurishpa

tucurinllami.

Runa shuyacushcatapish chai shinallata

tucuchinguillami.

20Canca huiñaitami runata yalli sinchi

cangui, paica chingarijllami.

Paipaj ñahuita maucayachishpaca, minchacama nishpa cachanguillami.

21Paipaj huahuacuna alli nishca cajpipish,

mana cashpaca yangalla cajpipish,

mana yachangachu.

22Ashtahuanpish paipaj aichaca,

paipaj jahuallapitajmi ismunga.

Paipaj almaca jatuntami llaquiringa nircami.