2 CRÓNICAS 3 - Quichua Chimborazo Bible

Diospaj huasita Salomón shayachishcami(1 R 6.1-38)

1Salomonca, Jerusalenpi caj Moriah shuti urcupimi, Mandaj Diospaj huasita shayachi callarirca. Chai urcuca jebuseocunapura Ornán runa trillana pambami carca. Chai pamballapitajmi Salomonpaj yaya Davidmanca, Mandaj Dios ricurishca carca. Chaimantami Davidca, Diospaj huasita shayachingapajllataj allichishca carca.

2Salomonca, israelcunata ña chuscu huatata mandacushpami, chai huatapaj ishqui quilla, ishqui punllapi chai huasita shayachi callarirca.

3Salomonca Mandaj Diospaj huasita shayachingapajca, cashnami callari rumicunata churarca: Sunimanca, ishqui chunga canchis metromi carca. Anchomanca, iscun metromi carca.

4Diospaj huasi corredorca, sunimanca tucui chai huasi ancho shinallataj iscun metromi carca. Diospaj huasica altomanca pichca chunga chuscu metromi carca. Salomonca chai ñaupajllapi caj ucu pata quinricunataca, alli curihuanmi jahuata churachirca.

5Diospaj huasi ucutaca, ciprés tablacunahuanmi churachirca. Chai tablacunapica palmera yuracunatapish, cadenacunatapishmi rurachirca. Chai jahuataca, tucuimanta yalli alli curihuanmi churachirca.

6Shinallataj achij nicuj sumaj rumicunahuanmi, chai ucu pata quinricunapica sumaj ricunacunata rurachirca. Chai ruranacunapica, Parvaim llajta curitami churarca.

7Diospaj huasi tucui ucutami curihuan churachirca. Jahua quinriman churashca jatun caspicunatapish, pungu umbral caspicunatapish, pungucunatapish, pata quinricunatapishmi curihuan jahuata churarca. Pata quinricunapica, querubincunatami rurachirca.

8Shinallataj chai huasi ucullapitajmi, Diospajlla ch'icanchishca shuj ucuta rurachirca. Chai ucuca sunimanca, Diospaj huasi corredor shinallataj iscun metromi carca. Anchomanpish iscun metrollatajmi carca. Chai ucutapish, ashtahuan alli curihuanmi churachirca. Chai ucuta sumajta rurangapajca, 600 talento curimi yaicurca.

9Clavocunataca shuj siclota pezajmanta callarishpa, pichca chunga siclota pezajcamami tucui laya curi clavocunata rurachirca. Shinallataj altibajo ucucunatapishmi curihuan churachirca.

10Diospajlla ch'icanchishca ucupica, ishqui querubincunatami caspimanta rurachirca. Chaicunatapishmi curihuan jahuata churachirca.

11Chai querubincunapaj alascunaca, ishquindijpaj alascunami iscun metro tucurca. Ishqui metro, ishqui chunga pichca centímetro caj shuj alashuanca, chai ucu pata quinripimi tupacurca. Chai valillataj caj caishuj alashuanca, caishuj querubinpaj alas puntapimi tupacurca.

12Shinallataj caishuj querubinpaj ishquindij alascunapish ishqui metro, ishqui chunga pichca centimetromi carca. Chai querubinpish shuj alashuanca, chai ucu pata quinripimi tupacurca. Caishuj alashuanca, caishuj querubinpaj shuj alaspimi tupacurca.

13Chai ishqui querubincunaca, alascunata chutashcami shayacurcacuna. Chashnami tucuimantaca iscun metro alascuna tucurca. Shinallataj Diospajlla ucu ladoman ñahuimi shayacurcacuna.

14Shinallataj chai ucuta jarcachingapajca, azul linsohuan, morado linsohuan, amsa linsohuan, lino linsocunahuanmi cortinacunata rurachirca. Chai linsocunapipish querubincunatami puchcacunahuan bordachirca.

Ishqui jatun pilarcunata rurachishcami(1 R 7.15-22)

15Salomonca, Diospaj huasi ñaupajpi churangapajmi, ishqui jatun pilarcunata rurachirca. Chai pilarcunaca altomanca chunga pichca metro, canchis chunga pichca centimetromi carca. Chai pilarcunapaj puntapi caj capitelcunaca, ishquindijllatajmi ishqui metro, ishqui chunga pichca centímetro carca.

16Chashnallataj Diospaj huasipi cadenacunata rurachishpami, chai jatun pilarcuna jahuapi caj capitelcunapi muyuchishpa churarca. Shinallataj granadacunatami patsajta rurachirca. Chaicunataca chai capitelcunapi caj cadenacunapimi muyujta huarcurca.

17Jatun pilarcunataca, Diospaj huasi ñaupajpimi, shujtaca alli ladoman, shujtaca lluqui ladoman churarca. Alli ladoman churashca pilartaca, Jaquín shutitami shutichirca. Lluqui ladoman churashca pilartaca, Boaz shutitami shutichirca.