MARCOS 7 - Quichua Chimborazo Bible

Runacunata imalla mapayachij cashcami(Mt 15.1-20)

1Fariseocunapish, mandashcacunata quillcajcunapish Jerusalenmanta maijan shamushcacunami Jesuspajman c'uchuyashpaca,

2Jesuspaj maijan yachacujcuna mapa maquihuan tandata micucujta ricushpaca, cai maquita mana maillashpa micujcunaca mana allichu nishpa rimarcacuna.

3(Fariseocunapish, tucui judiocunapish paicunapaj ñaupa yayacuna yachachishca shina maquita cutin cutin mana maillashpaca mana micuncunachu.

4Plazamanta tigramushpapish, mana maillashpaca imata mana micuncunachu. Shujtaj achca ruranacunatapishmi, chaitataj rurashpa pajtachincuna. Ubyana pilchicunata, huallucunata, fierromanta rurashca imacunatapish maillancunami. C'atacunata, mantacunatapish tajshancunami).

5Chaimi fariseocunapish, mandashcacunata quillcajcunapish Jesustaca:

–¿Ima nishpataj cambaj yachacujcunaca, ñaupa yayacuna yachachishca shina mana purishpa ashtahuanpish mapa maquihuan tandata micunllacuna?– nishpa tapurcacuna.

6Chaimi Jesusca:

–¡Mishqui shimi, jayaj shungucuna! Profeta Isaiasca allimi cancunamantaca cashna nishpa quillcashca:

“Cai gentecunaca ñucataca shimillahuanmi allimari cangui nincuna.

Ashtahuanpish paicunapaj shunguca,

ñucamanta carupimi.

7Ñucataca yangallami allimi cangui nij tucunguichij. Runacuna

yachachishcallatami Taita Dios mandashcami nishpa yachachinguichij” nishcami– nircami.

8Cancunaca Taita Dios mandashcata saquishpami, runacuna yachachishcata pajtachina yuyailla pajtachishpa causacunguichij: Huallucunata, ubyana pilchicunatapish maillajcunami canguichij. Chai shinallataj shujtajcunatapish rurajcunami canguichij– nircami.

9Caitapishmi nirca:

–Cancuna yachachishcallata pajtachingaraicullami, Taita Dios mandashcataca yangalla cashcata ruranguichij.

10Moisesca: “Cambaj yaya mamata alli ningui. Yaya mamata maijanpish llaqui tucushca canman nijtaca, huañuchishcataj cachun” nishcami.

11Ashtahuanpish cancunaca: “Yayata mamata ayudana cashcata mana ayudashpaca, cancunapaj yayamanca mamamanca cashpa ninguichijlla nishpami yachachinguichij: Tucui ñuca charishcatamari Corbán nircani chaimanta canman ayudana cashcataca mana cui tucunichu nichunmi” yachachinguichij. (Corbán nishpaca: “Taita Diospaj ofrendami” nisha ninmi).

12Chashna yachachishpaca paicunapaj yaya mamapaj ashtahuan allicunata rurachunmi mana saquinguichij.

13Cancunapaj yuyaimanta yachachishcacunata rurachishpami, Taita Diospaj Shimitaca yangata ruranguichij. Achca shujtajcunatami, chai shinallataj ruracunguichij– nircami.

14Tucui chaipi cajcunata Jesús cayashpaca:

–Caita alli uyashpa entendichij:

15Shimita yaicujca, runataca mana juchayujta ruranchu. Ashtahuanpish shungumanta shimiman llujshijmi runataca juchayujta ruran.

16Maijanpish uyanapaj rinrinta charijca uyaichigari– nircami.

17Tucui chaipi cajcunamanta rishpa huasiman Jesús yaicujpimi, yachacujcunaca yuyachij parlocuna imata nisha nishcata tapurcacuna.

18Chaimi Jesusca:

–¿Cancunapishchu paicuna shinallataj mana entendi tucunguichij? Shimita imapish yaicujca, pita mana mapayachij cashcataca ¿manachu entendinguichij?

19Imapish shimita yaicujca shungumanca mana yaicunchu. Ashtahuanpish huijsaman rishpa q'uipataca mapa tucushpa llujshinllamari– nircami.

Chashna nishpaca, tucui imatapish micunalla cashcatami huillarca.

20Ashtahuanpish shungumanta llujshijmi pitapish mapayachin.

21Shungu ucumantaca caicunami llujshin: Millai yuyaicuna, huainayana, apanacushpalla causana, huañuchina,

22shuhuana, quiquinpajlla charinata munana, millai munaicunata rurana, umana, yallitaj aicha munaita mana jarcari tucuna, envidiana, yanga juchachina, jatun tucuna, c'hahuan canapishmi llujshin.

23Cai tucui millai yuyaicunaca shungumanta llujshishpami, pita cashpapish mapayachin– nircami.

Sirofenicia huarmi Jesusta crishcami(Mt 15.21-28)

24Chaimanta Jesús jatarishpaca, Tiro, Sidón llajtacunamanmi rirca. Chaipica pi ama yachachun nishpami, shuj huasiman yaicurca. Ashtahuanpish mana miticui tucurcachu.

25Shuj huarmica Jesús chaipi cashcata yachaj chayashcahuanmi paipajman shamushpa paipaj ñaupajpi cungurirca. Chai huarmipaj ushushica millai espíritu japishcami carca.

26Paica Sirofeniciapi huacharishca griega huarmimi carca. Paipaj ushushimanta supaita llujshichichunmi Jesustaca rogarca.

27Chaimi Jesusca:

–Shuyairaj, huahuacunaraj mana nijta micuchun, huahuacunapaj tandata japishpa allcucunamanraj shitanaca mana allichu– nijpi,

28chai huarmica:

–Ari, Amito. Shina cajpipish huahuacuna micucushpa urmachishcataca allcucunapish micunllacunami– nircami.

29Chaimi Jesusca:

–Can chashna nishcamantaca cambaj ushushimantaca, supaica ñami llujshirca, rilla– nijpi.

30Chai huarmi paipaj huasiman chayashpaca, paipaj ushushimanta supai ña llujshijpi alli tucushpa camapi siricujtami japirca.

Mana uyaj mana rimaj runata Jesús alliyachishcami

31Chai q'uipami Jesusca Tiro shuti llajtamanta tigramushpaca, Sidón shuti llajtatapish, Decápolis llajtatapish pasamushpa Galilea cuchaman chayamurca.

32Jesús chaipi cajpimi, mana uyaj, mana rimaj runata pushamushpaca, paipaj jahuapi maquita churachun rogarcacuna.

33Chaimi Jesusca chai runataca chaipi cajcunamanta ashata caruyachishpa rinrincunapi dedocunata churashpa, c'allupipish c'hucahuan churashpa,

34jahuata huichilla ricushpa, aij nishpaca: “¡Efata!” nirca. (Efata nishpaca: “Pascari” nisha ninmi).

35Jesús chashna nincami paipaj rinrincunaca pascarirca, c'allupish cacharirijpi alli rimarcallami.

36Chaitaca amataj piman huillanguichijchu nishpa chaipi cajcunata cutin cutin mandacujpipish, ashtahuan ashtahuan huillarcallacunami.

37Chaita uyajcunaca achcata mancharishpami:

–Tucuitamari allita ruran. Mana uyajcunatapish uyajtami ruran, mana rimajcunatapish rimajtami ruran– nircacuna.