1Chai crijcunapajmanta rishpaca, Cos puebloman chayajtami barcopi rircanchij. Chaimanta cayandij punllaca Rodas pueblomanmi rircanchij. Chaimantaca Pátara pueblomanmi rircanchij.
2Chaimantaca Feniciaman ricuj barcopi huichiyashpami chaiman rircanchij.
3Siriaman barcopi ricujpica, Chipreca lluqui ladomanmi saquirirca. Chai barcoca Tiropimi cargata uriyachina cashca carca. Chaimi ñucanchijpish chaipi uriyarcanchij.
4Chaipica Jesusta caticujcunahuan tupashpami, canchis punllacunata chaipi saquirircanchij. Paicunaca Taita Diospaj Espíritu huillachijpimi, Pablotaca:
–Jerusalenmanca ama richu– nircacuna.
5Chai punllacuna q'uipaca, ñucanchij rina cashcaman rigrijpimi, Jesusta caticujcunaca tucuicuna paicunapaj huarmicunandij, huahuacunandij, chai pueblomanta llujshincama ñucanchijhuan shamurcacuna. Chaipica cucha uripimi, tucuicuna cungurishpa Taita Diosta mañarcanchij.
6Chai q'uipaca tucuicunata ugllarishpa minchacama nishpami, barcoman huichiyarcanchij. Paicunapish paicunapaj huasicunaman tigrarcallacunami.
7Ñucanchijca Tiromanta Tolemaidaman chayashpami yacuta rinataca tucuchircanchij. Chaipica Jesusta caticujcunata allillachu canguichij nishpami, paicunahuan shuj punllata saquirircanchij.
8Cayandij punlla Pablondij ñucanchijndij chaimanta rishpaca Cesareamanmi chayarcanchij. Chaipica alli huillaita huillaj Felipepaj huasiman rishpami, chaipi pozarcanchij. Paica ayudaj cachun agllashca canchispuramantami carca.
9Felipeca, chuscu soltera ushushicunatami charirca. Paicunaca profetacunami carca.
10Tauca punllacunata ñucanchij chaipi cajpimi, Agabo shuti shuj profeta, Judeamanta shamurca.
11Pai ñucanchijta ricunaman shamushpaca, Pablopaj chumbillinata japishpami, paipaj quiquin chaquita maquita huatarishpaca:
–“Cai chumbillinayujtaca Jerusalenpimi judiocunaca, cashna huatashpa mana judiocunapaj maquipi cungacuna” ninmi jucha illaj Espirituca– nishpami huillarca.
12Chaita uyashpaca, ñucanchijpish, chaipi causaj crijcunapish Jerusalenmanca ama richu nishpami, Pablotaca jarcarcanchij.
13Shina nijpipish Pabloca:
–Cancuna chashna huacashpa ñuca shunguta llaquichishpallaca ñucataca mana ayudanguichijchu. Ñucaca mana huatashcallachu casha nini. Ashtahuanpish Mandaj Jesusmantaca, Jerusalenpi huañuna cajpipish huañushallami– nircami.
14Chashna nijpi ña mana jarcai tucushpaca:
–Jatun Diospaj munai rurarichun– nishpami saquircanchij.
15Chai punllacuna q'uipa ña ringapaj tucuita allichishpaca, Jerusalenman rircanchijllami.
16Cesareamantaca Jesusta caticujcunamanta maijancunapishmi ñucanchijhuan shamurcacuna. Paicunahuanca, Chipremanta Mnasón shuti runapishmi shamurca. Paica chai llajtapi punta crijmi carca. Paipaj huasipimi pozana carcanchij.
Jacobota Pablo ricunaman rishcami17Jerusalenman chayajpica, Jesusta caticujcunaca cushicushpami ñucanchijtaca chasquircacuna.
18Cayandij punllaca ñucanchijndijmi Pabloca Jacobota ricunaman rirca. Chaipica, cunaj yuyajcunapish tucuicunami tandanacushca cashca carca.
19Paicunata allillachu canguichij nishca q'uipaca, Diosca mana judiocunapurapi imallata paihuan rurashcatami callarishpa tucuita alli parlarca.
20Chaita uyashpaca, tucuicunami Taita Diostaca jatunyachircacuna. Chashna nishca q'uipami Pablotaca:
–Riqui, huauquicu, huaranga huaranga judiocunami crij tucushcacuna. Tucui chaicunaca: “Mandashcataca pajtachinatajmi canchij” nicuncunami.
21Mana judiocunapaj chaupipi caj tucui judiocunamanca, Moisés Mandashcatapish ama ruraichijchu, cancunapaj huahuacunatapish ama circuncisionta rurachichijchu, judiocuna rurana cashcacunatapish ama ruraichijchu nishpa yachachicun nishpami canmantaca nicuncuna.
22Can shamushcata uyashpa tucuicuna tandanacumujpica, ¿imatashi nishun?
23Cunanca ñucanchij nishcata rurai. Ñucanchijpurapica chuscu runacunami, Taita Diospajta rurashun nishcata pajtachishun nicuncuna.
24Paicunata pushashpa, paicunahuan maillarigri. Paicunapaj ajchata rutuchishcamanta cunapajpish cungui. Imallamanta paicunamanta cuna cashcata paicuna cuchunpish paicunaman cungui. Chashna rurajpica, tucuicunami canmanta imallata uyashcataca mana chashnachu cashca ningacuna. Paipish Moisés Mandashcataca pajtachicushcallatajmi ningacunami.
25Mana judío cashpapish crijcunamanca, ñucanchijca ñami cashna nircanchij: Rurashcalla dioscunaman cushcacunata ama micunguichij, sipishpa huañuchishca aichatapish, yahuartapish ama micunguichij, ama huainayanguichij nishpallami quillcarcanchij– nircacunami.
Taita Diospaj huasipi Pablota prezu japishcami26Chai cayandij punllaca Pabloca chai runacunata pushashpami maillarigrirca. Paicunandij ña maillarishpaca, maillarina punllacuna ima punlla tucurina cashcata, chai runacunamanta Taita Diosman cuna cashcata ima punlla cuna cashcatapish curacunaman huillangapajmi Taita Diospaj huasiman yaicurcacuna.
27Ña canchis punllacuna pajtamucujpimi, Asiamanta maijan judiocunaca Taita Diospaj huasipi Pablota ricurcacuna. Chaita ricushpaca, tucuicunaman huillashpami Pablotaca huaicashpa japishpaca,
28cashna nircacuna:
–¡Israelcuna, tandanacumuichij! Cai runatajmari tucui llajtacunata purishpa, ñucanchij llajtatapish, Mandashcacunatapish, Taita Diospaj cai huasitapish yangata rurashpa tucuicunaman yachachin. Cunancarin chai griegocunatapishmari Taita Diospaj huasiman yaicuchishpa, cai ñucanchij Diospajlla huasita mapayachicun– nishpami caparircacuna.
29Ñaupamanmi Pablotaca Efesomanta Trofimohuan Jerusalenpi puricujta ricushca carcacuna. Chaimi chai runata Taita Diospaj huasiman yaicuchishca canata yuyarcacuna.
30Tucui chai pueblopi cajcuna jatarishpa tandanacumushpami, Pablota japishpa Taita Diospaj huasimanta canllaman sirijta aisashpa llujshichircacuna. Chaita rurashcahuanmi, pungucunata huichcarcacuna.
31Paicuna Pablota ña huañuchigrijpimi, huaranga soldadocunata mandajpajman maijancuna rishpaca:
–Jerusalenpi tucui causajcunamari huaica jatarishpa bullacuncuna– nishpa huillarcacuna.
32Huillancami chai mandajca soldadocunatapish, patsaj soldadocunata mandajcunatapish pushashpa chaiman rirca. Chai soldadocunata mandaj soldadocunandij shamucujta ricushpami, Pablota macanataca saquircacuna.
33Huaranga soldadocunata mandaj chayashpaca, Pablota japishpa ishqui cadenacunahuan huatachunmi mandarca. Chai q'uipami:
–¿Pitagari, imatataj rurashcari? nishpa,
34tapujpi chai tucuicunaca, shujcunaca shujta, caishujcunaca caishujta caparishpa bullacujpimi imamanta chashna macacushcata mana yachai tucurca. Chaimi Pablotaca cuartelman pushachun mandarca.
35Tucuicuna huaica catimucujpimi, soldadocunaca gradacunataca huandushpalla huichiyachircacuna.
36Chai tucui achca caticujcunaca:
–¡Huañunami can!– nishpami caparircacuna.
Tucuicunapaj ñaupajpi Pablo parlashcami37Cuartelman yaicuchigrijpimi Pabloca, huaranga soldadocunata mandajtaca:
–¿Imallatapish ni tucunichu?– nijpi, chai mandajca:
–¿Griego rimaita yachanguichu?
38Sarunmanmi shuj egipcio runaca, ñucanchijta llaquichingapaj chuscu huaranga huañuchijcunata jatarichishpa shitashca pambaman tandachirca. ¡Ñucaca cantaca chai runachu yuyarcanimari!– nircami.
39Chaimi Pabloca:
–Ñucaca, Ciliciapi caj tucuicuna alli nishca Tarso pueblomanta judiomi cani. Chaimanta ñuca cai tucuicunaman ashata rimangapaj saquipai– nirca.
40Rimachun pai saquijpica, gradapi shayarishpami, Pabloca tucuicunata maquihuan upallaichij nijpi tucuicuna upallajpica hebreo rimaipi cashna nishpa rimarca:
Who We AreWhat We EelieveWhat We Do
2025 by iamachristian.org,Inc All rights reserved.
