MARCOS 6 - Quichua Chimborazo Bible

Jesusca paipaj llajta Nazaretpi huillashcami(Mt 13.53-58; Lc 4.16-30)

1Chaimanta Jesús llujshishpaca, paipaj quiquin llajta Nazaretmanmi paipaj yachacujcunandij rirca.

2Samana punlla chayamujpica, sinagogapimi yachachi callarirca. Pai yachachishcata uyashpaca achcacunami jatunta mancharishpa cashna ninacurcacuna:

–¿Caica, maipishi cai tucuitaca yachamurca? ¿Pishi paimanca cai yachaitaca curca, milagrocunatapish ruranllachu imamí?

3¿Manachu paica carpinterolla? ¿Manachu Mariapaj churilla? ¿Manachu paipaj huauquicunapish Jacobo, José, Judas, Simón? ¿Manachu paipaj panicunapish ñucanchij causan llajtallapitaj causancuna?– nishpami, Jesús yachachishcataca mana uyashun nishpa bullata rurarcacuna.

4Ashtahuanpish Jesusca:

–Maijan profetatapish shujtaj llajtapica allimi chasquin. Ashtahuanpish quiquin llajtapi causajcunaca, quiquin familiacunaca, quiquin huasipi causajcunaca mana alli nincunachu– nircami.

5Chaimi Jesusca chaipica milagrocunataca mana rurarca. Maijan ungushcacunallatami paicunapaj jahuapi maquita churashpa alliyachirca.

6Paicuna mana crisha nishcamantami Jesusca achcata llaquirishpaca, chai muyundij llajtacunallapi yachachishpa purirca.

Chunga ishqui yachacujcunata huillanaman cachashcami(Mt 10.5-15; Lc 9.1-6)

7Chai q'uipami Jesusca chunga ishqui yachacujcunata cayashpaca, millai supaicunata llujshichi tucunatapish cushpa ishqui ishquita cachai callarirca.

8Paicunata cachacushpaca: “Tauna caspillata apanguichij. Muchilatapish, tandatapish, cullquitapish ama apanguichij.

9Shinallataj pargatetapish churashcalla ringuichij, shujtaj churanatapish ama apanguichijchu” nirca.

10Cashnapishmi nirca:

–Maiman rishpapish shuj huasiman yaicushpaca, chai llajtamanta llujshingacama chaillapitaj saquiringuichij.

11Maipi cashpapish cancunata mana chasquisha nishpa, huillashcatapish mana uyashun nijpica, paicuna llaquita apana cashcata ricuchingapajca cancunapaj chaquimanta ñutu allpatapish chaspishpa chaimanta llujshishpa ringuichijlla. Imalla rurashcata Taita Dios ricuchi punllapica Sodoma, Gomorra llajtacunapi causajcunapajta yalli mana apaipaj llaquimi canga. Chashnatajmi canga– nircami.

12Yachacujcuna rishpaca, gentecuna Taita Diosman cutirichunmi huillarcacuna.

13Achcacunamantami supaicunatapish llujshichircacuna. Ungushcacunatapish achcacunatami, aceitehuan churashpa alliyachircacuna.

Bautizaj Juanta huañuchishcami(Mt 14.1-12; Lc 9.7-9)

14Jesús tucui imalla rurashcacunaca tucuipimi yacharirca. Paipaj shutica tucuipi rijsishca tucujpi jatun mandaj Herodespish yachaj chayashpami:

–Bautizaj Juanmari huañushcacunapaj chaupimanta causarishca canga. Paimari pi mana rurai tucuipajta ruracunga– nirca.

15Maijancunaca: “Eliasmi” nincunami. Shujtajcunaca: “Caica, ñaupa profetacuna shinallataj shuj profetami canga” nircacunami.

16Chaimi Herodesca:

–Cungata ñuca p'itichishca Juanmari causarishca canga. Paitajmi canga– nirca.

17Herodías huarmi mandajpimi, Juantaca cadenahuan huatashpa Herodesca carcelpi churashca carca. Herodías huarmica Herodespaj huauqui Felipepaj huarmimi carca. Herodesca chai huarmihuanmi apanacushpa causacurca.

18Chaimi Juanca Herodestaca: “Cambaj huauquipaj huarmihuan apanacushpa causanaca, mandashcapi nishca shinaca mana allichu” nijpi,

19Herodías huarmica, ima shinapish huañuchinata yuyacushpapish, mana huañuchi tucurca.

20Herodesca Juantaca cashcata ruraj, jucha illaj cajta yachashpa, manchashcamanta alli cuidashpa charicushcamantami mana huañuchi tucurca. Herodesca Juan huillashcata uyashpaca, musparishpa imata mana ni tucurcachu. Ashtahuanpish achcatami uyanachirca.

21Herodesca, pai huacharishca huatacuna pajtashca jatun micuita, jatun mandajcunahuan, huaranga soldadocunata mandajcunahuan, Galilea llajtapi alli nishca mandajcunahuan fiestata ruracui punllami, Herodías huarmi yuyacushcaca alli ricurirca.

22Chaipimi Herodiaspaj ushushica, tucuicuna micucun ucuman yaicushpa tushurca. Chaitaca Herodespish, paihuan micucujcunapish achcatami ricunachircacuna. Jatun mandaj Herodesca, chai solterataca:

–Can imata munashcatapish mañailla, ñucaca cushallami– nirca.

23Ñuca mandacun chaupi llajtata cui nijpipish cushallami. Chaitaca pajtachishatajmi– nircami.

24Chai soltera llujshishpaca paipaj mamataca:

–¿Imatataj mañashari?– nijpi, mamaca:

–Bautizaj Juanpaj umata mañai– nirca.

25Chai soltera jatun mandajpajman callpashpa yaicushpaca:

–Bautizaj Juanpaj umata cunanllataj shuj platopi cuchunmi nipani– nirca.

26Jatun mandajca achcatami llaquirirca. Ashtahuanpish tucuicunapaj ñaupajpi can imata mañashcata cushallami chaitaca pajtachishatajmi nishcamantami mana cui tucunichu mana ni tucurca.

27Shina cashpapish jatun mandajca, Juanpaj umata p'itishpa apamuchun, shuj soldadota cachajpimi,

28soldado rishpaca, Juanpaj umata carcelpi p'itishpa, shuj platopi apamushpa solteraman curca. Paica mamamanmi curca.

29Chaita Juanpaj yachacujcuna yachaj chayashpa shamushpaca, paipaj cuerpota apashpami pambana jutcupi churarcacuna.

Pichca huaranga gentecunaman carashcami(Mt 14.13-21; Lc 9.10-17; Jn 6.1-14)

30Apostolcuna Jesuspajman tigramushpaca, paicuna tucui imalla rurashcatapish, yachachishcatapishmi parlarcacuna.

31Paicuna chaipi cajpica, achcacuna shamucun tigracun cajpimi, micungapajllapish mana pajtarishpa, Jesusca:

–Jacuchij, ñucanchijlla pi mana causan chulunllapi ashata samarishunchij– nirca.

32Chaimi paicunalla pi mana causan chulunllaman shuj barcopi rircacuna.

33Paicuna ricujta gentecuna ricushpaca, maiman chayana cashcata yachashpami, pueblocunamanta achcacuna chaquillahuan rishpa, paicuna maiman chayanamanca paicunaraj ñaupaman ña chayarcacuna.

34Jesusca barcomanta llujshishpaca, chai shamuj tucuicunataca michij illajlla ovejacuna shina cajta ricushpa llaquirishpami, achca yachanacunata yachachi callarirca.

35Ña chishiyajpimi, yachacujcuna Jesuspajman c'uchuyamushpaca:

–Caipica pi mana causanpimari canchij, ñamari yalli chishiyan.

36Paicunaca ima micunata mana charincunachu. Chainij huasicunaman, chainij llajtacunaman rishpa micunata randigrichun paicunataca ña cachailla– nircacuna.

37Chaimi Jesusca:

–Cancunallataj caraichigari– nijpi yachacujcunaca:

–¿Ishqui patsaj denariohuanchu tandata randishpa, paicunamanca carachun ningui?– nircacuna.

38Chaimi Jesusca:

–¿Mashna tandatataj charinguichij? Richij, ricumunguichij– nijpi ricumushpaca:

–Pichca tanda, ishqui chalhuallami tiyashca– nijpimi,

39Jesusca tucuicunata bulluj jahuapi quinrilla siririchun mandaichij nirca.

40Chaipi cajcunaca, maipica patsaj, maipica pichca chungami tiyarircacuna.

41Jesusca pichca tandata, ishqui chalhuatapish japishpami, jahuata huichilla ricushpa, Diosta pagui nirca. Tandata chaupishpa, chaupishpa yachacujcunaman cujpimi, paicunaca tucuicunaman cararcacuna. Ishqui chalhuatapish chashnallataj cujpimi tucuicunaman cararcacuna.

42Chaitaca tucuicunami mana nijta micurcacuna.

43Puchushcacunataca, chalhuacunandijmi chunga ishqui canasta jundata tandarcacuna.

44Micujcunaca, c'aricunallami pichca huaranga carcacuna.

Yacu jahuata Jesús purishcami(Mt 14.22-27; Jn 6.16-21)

45Ña carashca q'uipami, Jesusca paipaj yachacujcunataca barcopi churashpa cucha ch'imba lado uri Betsaidaman ñaupachishpa cacharca. Chaicamaca paica tucui chaipi cajcunatami cayacamachij nicurca.

46Cayacamachij nishca q'uipami Jesusca, urcupi Taita Diosta mañanaman rirca.

47Ña tutayacuitaca, chaupi cuchatami barcoca ricurca. Jesusca allpapirajmi carca.

48Chaipica achca huaira cashcamanta jarcacujpi barcota mana purichi tucushpa shaicucujtami Jesusca ricurca. Ñalla pacarimugrijpimi, paicunapajman yacu jahuata purishpa ricushpaca, pasajta ricuj shina tucurca.

49Yacu jahuata purishpa shamucujta ricushpami, ayami yuyashpa caparircacuna.

50Tucuicuna ricushcamantami achcata mancharircacuna. Chaimi Jesusca paicunataca:

–¡Ñucamari cani! Ama mancharichijchu fuerzarichij– nirca.

51Paicuna ricun barcopi Jesús huichiyajpica, huairaca casijlla tucurcallami. Chaimi paicunaca achcata mancharicushpapish cushicurcacuna.

52Paicunapaj shungucuna rumiyashca cashcamantami, tandata mirachijta ricushpapish, manaraj entendishcacuna carca.

Ungushcacunata Jesús Genesaretpi alliyachishcami(Mt 14.34-36)

53Ña cuchata ch'imbashpaca Genesaret llajtaman chayashpami, cucha uripi barcota huatarcacuna.

54Barcomanta paicuna llujshicujpica, chaipi caj gentecunaca Jesustaca ñami rijsircacuna.

55Chai muyundij llajtata Jesús puricujpica, tucui chai muyundij llajtacunapi causaj ungushcacunatami huanducunapi Jesuspajman apamurcacuna.

56Uchilla llajtacunaman, pueblocunaman, caru huasicunaman rijpipish, pai maita rina ñancunapimi ungushcacunataca churarcacuna. Chaicunaca, cambaj churana puntallapipish tuparichun saquipai nircacunami. Jesuspi tuparijcunaca, tucuicunami alliyarcacuna.