1Tucuita Rurai Tucuj Diospajca huatacunapish
mana pacalla canchu.
¿Imamantataj paita rijsijcunaca paipaj
punllacunata mana ricuncunari?
2Maijancunaca allpa mojoncunata quichunllami.
Shuhuashca huagracunatami michincuna.
3Yaya mama illaj huahuacunatapish
burrota quichunllami.
Viuda huarmipaj huagratapish
prendashpa apanllacunami.
4Ima illajcunatapish ñanmanta
callpachinllacunami, llajtapi tiyaj
huajchacunaca paicunamanta miticunmi.
5Millaicunaca shitashca pambacunapi
causaj sacha burrocuna shinami,
manaraj achijyajpi shuhuanaman rincuna.
Chai shitashca pambacunallapimi paicunapaj
huahuacunamanpish carashpa causancuna.
6Diosta mana manchajcunaca
chagracunamantami granocunata shuhuancuna.
Shujtajpaj uva chagramantami
uvata tandancuna.
7Churana illajtapish lluchullatami
dormichun saquincuna.
Chirihuan cajpipish mana c'atachincunachu.
8Chaimantami shullapish shutujyachin.
Jatun rumicunata ugllashpami cunujyancuna.
9Yaya illaj huahuacunatapish
chuchucujtami quichuncuna.
Huajcha cashcata ricushca jahuami
prendatapish apashpa rincuna.
10Churana illajtaca lluchullatami
purichun saquincuna.
Yaricaihuan huañucujcunatapish gavillashca
granotami quichuncuna.
11Pata ucullapimi aceitetaca capincuna.
Uvata sarucushpapish, yacunaihuanmi
huañucuncuna.
12Yaricaihuan huañucujcuna pueblomanta
caparishpa huacacujpipish, huañunalla
chugrishcacuna caparicujpipish,
Taita Diosca paicuna mañashcataca
manataj uyanchu.
13Millaita rurajcunaca luztaca
mana ricunachijcuna cashpami,
chai ñantaca shuj cutinllapish
mana rijsircacuna.
Dios cushca ñantaca manataj catincunachu.
14Huañuchij runaca achij punllapimi
huajchacunata, imata mana charijcunata
huañuchinaman jatarin.
Tutapish jatun shuhua shinami purin.
15Huainayajca tutayajtaca chaparacunmi.
Paica: Pipish ñucataca mana ricungachu
nishpami, ñahuita taparishpa llujshirin.
16Shuhuaca tutayajllapimi, huasicunata
jutcushpa yaicun.
Punllayajpica miticurinllami.
Paica achijtaca mana rijsinchu.
17Chai tucui millaita rurajcunapajca
pacarijpica, huañuna amsa shinami.
Paicunata pi rijsijpica, huañuna
amsapi puricuj shinami manchancuna.
18Jatun yacu shinami callpashpa
miticurincuna.
Paicunapaj llajtapi charishca allpacunaca,
mana alli nishcami tucun.
Paicunapaj uva chagra chaupitaca,
ña mana puringacunachu.
19Usyashpa rupai shamushpaca,
rasutaca yacuyachinllami.
Seolpish juchayujcunataca,
chashnallatajmi chingachinga.
20Paicunataca huachaj mamapish
cungaringami, c'urucunallami
mishquichishpa micunga.
Paicunataca shuj cutinllapish
manataj yuyaringacunachu.
Diosta mana manchajcunaca yurata
urmachishca shinami chingaringacuna.
21Mana huachaj, mana chichuj
huarmitami llaquichircacuna.
Viuda huarmicunapajpish, ima allitaca
mana rurarcacunachu.
22Ashtahuanpish c'ari c'aricunataca,
paicunaca fuerzahuanmi pusharcacuna.
Paicuna shayarijpica, pipish mana
causai tucunchu.
23Diosca imata mana manchashpa, paipi
shunguta churana yuyaitami cun.
Paipaj ñahuicunaca paicuna
purishcatami chaparacun.
24Ashacamallami jatun tucurcacuna,
ashtahuanpish chingarircacunallami.
Tucui shujtajcuna shinallatajmi
huañurcacuna.
Paicunaca huichcashcami cangacuna,
umata utushca grano shinami p'itishca
cangacuna.
25Mana chashna cana cajpica ¿pitaj
ñucataca llullami ningacunari?
Mana cashpaca ¿pitaj ñuca shimicunataca
yangallami ningacunari? nircami.
Who We AreWhat We EelieveWhat We Do
2025 by iamachristian.org,Inc All rights reserved.
