1Amasiasca, mandai callaringajca ishqui chunga pichca huatayujmi carca. Paica ishqui chunga iscun huatatami Jerusalenpi mandarca. Paipaj mamaca Jerusalenllamantataj Joadán shutimi carca.
2Amasiasca, Mandaj Diospaj ñaupajpica, ima pandata maan rurarcachu. Shina cashpapish, mana tucui shunguhuantaj allita rurarcachu.
3Amasiasca, pai ima shina mandanata tucuita allichishpami, paipaj yaya jatun mandajta huañuchij paipaj yayapajta rurajcunataca tucuicunata huañuchirca.
4Moisés mandashcapi nishca shinallatajmi paipaj yayata huañuchijcunapaj churicunataca mana huañuchirca. Chai mandashcapica Mandaj Diosca: “Yaya mamapaj juchamantaca huahuacunaca mana huañungachu. Huahuacunapaj juchamantapish, yaya mamaca mana huañungachu. Maijanpish millaita rurajca, chai millaimantaca paimi huañunga” nicunmi.
5Amasiasca Judá aillumantapish, Efraín aillumantapish, tucui c'aricunatami tandachirca. Chashna tandachishpaca paicunapurallamantataj, 1.000 soldadocunata mandajcunata, patsaj soldadocunata mandajcunatami Judá aillutapish, Benjamín aillutapish mandaj cachun churarca. Chai q'uipaca, ishqui chunga huatayujmanta huichimanmi mashna c'aricuna tiyashcata yupachirca. Chaicunaca macanacuiman llujshinalla shina agllashcacunami, 300.000 runacuna tiyashca carca. Chaicunaca lanzata, escudotami charircacuna.
6Chai jahuami Amasiasca, Israel llajtamantaca patsaj talento cullquita cushpa, 100.000 c'ari c'ari soldadocunata apamurca.
7Chai soldadocunata apamujpica, Diospaj runa paipajman shamushpami cashna nirca:
–Mandaj Diosca tucui Efraín aillu israelcunamanta anchurishcami. Chashna cashcamantaca jatun mandajlla, Israel soldadocunahuanca ama tandanacuichu.
8Chai soldadocunata cambaj soldadocunahuan tandachishpa achca soldadocunata rurashpa macanacuiman rijpica, Diosca canta p'iñajcunapaj maquipi churangami. Pai Diosllamari mishachi tucun, mana cashpaca urmachi tucunpish– nircami.
9Shina nijpi, Amasiasca Diospaj runataca:
–Israel soldadocunamanca, patsaj talento cullquitamari curcani. Chai cullquimantaca ¿imatataj rurasha?– nirca.
Shina nijpica Diospaj runaca:
–Mandaj Diosca chaita maihuan yallitapishmari canmanca cui tucun, saquilla– nircami.
10Chashna nijpimi Amasiasca, Efraín aillupuramanta apamushca soldadocunataca paimanta ch'icanyashpa, paicunapaj huasicunaman tigrachun mandarca. Chashna mandajpica yallitaj p'iñarishpami, Judá llajtapi causajcunata llaquichina yuyaihuan paicunahuan huasicunaman tigrashpa rircacuna.
11Amasiasca, c'ari c'ari cana yuyaita japishpami, Cachisapa pugru Pambaman paipaj soldadocunahuan rishpaca, Seir llajta soldadocunahuan macanacurca. Chai macanacuipica, 10.000 soldadocunatami huañuchirca.
12Judá llajta soldadocunaca, chai Seir llajtamanta cajcunallatatajmi shujtaj 10.000 soldadocunata japishpami peña jahuaman aparcacuna. Chaimanta singuchijpimi, chaicuna ñuturishpa huañurcacuna.
13Paicuna chashna ruracujpica, Amasías tigrachishpa cachashca Israel soldadocunaca Judá llajtapi caj pueblocunapi causajcunatami, Samaria pueblomanta Bet-horón pueblocama jatunta llaquichircacuna. 3.000 runacunata huañuchishpami, achca charinacunata shuhuashpa aparcacuna. Jatun macanacuiman mana paicunata apashpa, paicunapaj huasicunaman tigrachishpa cachashcamantami chashna rurarcacuna.
14Amasiasca chai Seir llajtapi causaj edomitacunahuan macanacushpa mishashpaca, chai runacunapaj dioscunatami apamurca. Chaicunataca paipaj dioscunaca cachun charishpami cungurirca. Shinallataj inciensotapish cushpami rupachij carca.
15Chaimi Mandaj Diosca nina sindirij shina p'iñarishpa, profetataca, Amasiasta cashna nichun cacharca:
–¿Ima nishpataj canca chai llajtapi causajcunapaj dioscunataca mañangui? Chai dioscunaca paicunataca cambaj maquimantapish mana quishpichi tucurcacunachu– nircami.
16Profeta chashna nijpica, jatun mandajca:
–¿Cantaca jatun mandajta cunaj cachunchu churarcacuna imatagari? Canca imata mana ninachu cangui. ¿Ima nishpataj canllataj huañuita mashcangui?– nircami.
Chashna nijpica, profetaca caillatami nirca:
–Ñuca cunashcata mana cazushpa, cashna millaita rurashcamantaca Diosca cantaca chingachishatajmi nircami. Chaitaca yachanimi– nircami.
17Chashna nijpipish, Judá llajtata jatun mandaj Amasiasca, shujtajcunahuan yuyarinacushpami, Israel llajtata jatun Mandaj Joastaca: “Shamui, ñahui ñahui ricunacungapaj” nichunmi huillashpa purijcunata cacharca. Joasca, Jehupaj churi Joacazpaj churimi carca.
18Chashna huillajpica israelcunata jatun mandaj Joasca, Judá llajtata jatun mandaj Amasiasmanca: “Líbano urcupi tiyaj uchilla casha yurami, Líbano urcullapitaj tiyaj cedro yurataca: Cambaj ushushita ñuca churipaj huarmi cachun cui nichunmi cacharca. Ashtahuanpish chai Líbano urcupi causaj sacha animalcuna shamushpami, chai casha yurataca sarushpa pasarcacuna.
19Canca: Edom llajta runacunata mishamurcanimi nishpami, cambaj shungupica jatun tucushpa cushicungui. Shina cashpapish cambaj huasillapitaj saquirilla. Cambajpish, can mandacun Judá llajtapaj llaquipajllatajca ¿ima nishpataj llaquita mashcacungui?” nichunmi cacharca.
20Chashna nijpipish, Amasiasca mana cazurcachu. Judá llajtapi causajcunaca, Edom llajtapi causacujpaj dioscunatami mañarcacuna. Chaimanta Taita Diosllataj paicunata p'iñaj Joaspaj maquipi churasha nishcamantami, chashna mana uyarca.
21Chashna mana uyajpimi, Israel llajtata jatun mandaj Joasca Amasiashuan macanacungapajca, Judá llajtallapitaj caj Bet-semes puebloman huichiyarca.
22Chai macanacuipica israelcunami Judá llajta soldadocunata misharcacuna. Chaimantami tucuicuna miticushpa paicunapaj carpa huasicunaman callparcacuna.
23Israel llajtata jatun mandaj Joasca, chai Bet-semes pueblopimi Judá llajtata jatun mandaj Amasiastaca prezu japirca. Amasiasca, Joacazpaj churi Joaspaj churimi carca. Chaimantaca Jerusalenman shamushpami Jerusalén muyundij jatun pircataca, 180 metrota urmachirca. Efraín pungumanta callarishpa esquinapi caj pungucamami urmachirca.
24Shinallataj Diospaj huasipi huaquichishca tucui curitapish, cullquitapish, imalla charinacunatapish, mandashpa tiyana huasipi tiyaj achca valij huaquichishcacunatapishmi llujshichishpa aparca. Chaicunataca Obed-edom shuti runami cuidaj carca. Shinallataj mandajcunapaj churicunatapish apashpami, Samariaman tigrarca.
25Joaspaj churi Amasiasca, Judá llajtata jatun mandajmi carca. Paica Joacazpaj churi Joas huañushca q'uipaca, chunga pichca huatahuan causarcarajmi. Joasca Israel llajtata jatun mandajmi carca.
26Amasías ashtahuan imallata rurashcacunata ashtahuan yachasha nishpaca, Judá llajtata jatun mandajcuna, Israel llajtata jatun mandajcuna imallata rurashcata quillcashca libropimi ricuna.
27Mandaj Diosmanta Amasías anchurijpica, chai punllacunallatajmi Jerusalenpica, shujcuna huashalla yuyarinacushpa huañuchishun nircacuna. Amasías chaimanta Laquisman miticushpa rijpipish catishpami, chai pueblopi japishpa huañuchircacuna.
28Paitaca caballocunapi Jerusalenman apamushpami, Judapaj pueblopi paipaj ñaupa yayacunapaj c'uchupi pambarcacuna.
Who We AreWhat We EelieveWhat We Do
2025 by iamachristian.org,Inc All rights reserved.
