1Mandaj Dioslla, quiquin llaquij
cashcataca
cantacushallami.
Ñuca shimihuanmi quiquin alli cashcataca huahua huahuacunaman huillacushalla.
2Ñucaca: “Quiquin llaquinaca huiñaipaj shayachishcami canga.
Quiquin mana llullaj canatapish jahua pachallapitajmi sinchita churashcangui” nircanimi.
3Ñuca agllashcahuanmi ari ninacurcani.
Ñucapajta ruraj Davidmanmi caita rurashatajmi nishpa cashna nircani:
4“Huiñaitami cambaj huahua huahuataca
mandaj cachun churasha.
Can mandanapica cambaj huahua huahuacunami mandacungalla”
nircanimi. Selah
5Mandaj Dioslla, mancharinacunata quiquin rurashcataca
jahua pachapipish alabancunami.
Quiquin pajtachij cashcataca, jucha illajcuna tandanacushcapimi alabangacuna.
6Jahua pachapipish quiquin Mandaj
Dioshuan ch'imbapuraipajca, pi
mana tiyanchu.
Diospaj churipuracunapica quiquin Mandaj Dioshuan ch'imbapuraipajca ¿pitaj tiyangari?
7Jucha illajcuna achca tandanacushcapica manchana Taita Diosmari cangui.
Tucui cambaj muyundijpi tiyacujcuna
chujchuna Taita Diosmari cangui.
8Mandaj Dioslla, tucuita Mandaj Taita Dioslla ¿pitaj quiquin shinaca tiyangari?
Mandaj Dioslla tucuita rurai tucujmi cangui.
Quiquinpaj pajtachij cashcahuan muyunchishcamari cangui.
9Mama cucha p'iñarishpa
huajiajpipish quiquinca mandai tucunguimi.
Yacucuna t'imburishpa jatarijpipish,
quiquinca casijlla cachun mandanguillami.
10Quiquinmi Rahabtapish chugrichishca
huañunalla siricujta shinalla
huañuchircangui.
Quiquinta p'iñajcunataca tucuita rurai
tucuj quiquinpaj rigrahuanmi caita chaita cacharcangui.
11Jahua pachacunapish quiquinpajmi.
Cai pachapish quiquinpajllatajmi.
Quiquinmari cai pachatapish, cai pachapi tucui imalla
tiyajcunatapish callarichircangui.
12Janaj ladotapish ura ladotapish
quiquinmari
rurarcangui.
Tabor urcupish, Hermón urcupish
quiquinpaj shutipimari cantangacuna.
13Tucuita rurai tucuj rigraca quiquinpajmari.
Quiquinpaj maquica tucui rurai tucujmari. Quiquinpaj alli lado maquica tucuicuna jatunyachishcamari.
14Cashcata rurashpa mandashcahuan, mandana shinataj mandashcahuanmi paipaj tiyanataca callari rumita sinchita churashca shina sinchita charicun.
Llaquij cana, imatapish pajtachij
canami quiquinta ñaupanga.
15Mandaj Dioslla, quiquinta mañajcunaca
cushichishcami.
Quiquinpaj ñahui achijyachishcapimi puringacuna.
16Quiquinpaj shutipimi punllanta
cushicungacuna.
Quiquin cashcata rurashcapimi c'ari c'ari
cangacuna.
17Quiquinmi paicuna fuerzayuj canapish jatun canapish cangui.
Quiquin munashcamantami ñucanchijmanca poderyuj canata cungui.
18Mandaj Diosca ñucanchij escudomari.
Israelcunapaj jucha illaj Diosca
ñucanchijta jatun mandajmari.
19Quiquinpaj jucha illaj runamanmi muscuipi shina rimashpa cashna nircangui:
“Ñuca ayudanataca c'ari c'ari cajmanmi curcani.
Ñucapajlla cajcunamanta shujta agllashpami jatunyachircani” nircanguimi.
20Ñucapajta ruraj Davidtamari japircani.
Ñucapajlla cachun ch'icanchina aceitehuanmi paipaj umapi tallircani.
21Ñuca maquica huiñaitami paihuan canga.
Ñuca rigrapish paitaca pi mana cuyuchipajtami ruranga.
22P'iñajpish mana cungaillapi
llaquichingachu.
Millaita rurajcunapish manataj mishangachu.
23Ashtahuanpish paita p'iñajcunataca,
paipaj ñaupajpimi ñutusha.
Mana ricunachijcunataca tucuchishami.
24Ñuca mana llullaj canapish,
llaquij canapish paihuanmi canga.
Pai imata rurai tucunapish ñuca shutipimi jatunyachishca canga.
25Paipaj maquitaca mama cucha jahuatami churasha.
Paipaj alli lado maquitaca jatun yacucuna jahuapimi churasha.
26Paica ñucataca: “Quiquinmi ñuca Yaya cangui,
ñuca Taita Diosmi cangui.
Ñucata quishpichij jatun
rumimi cangui” nishpami caparinga.
27Ñucapish paimanca punta churi canatami cusha.
Tucui cai pachapi jatun mandajcunapaj jahuapi canatami cusha.
28Ñuca llaquij canaca paihuanca huiñaipajmi canga.
Ñuca paihuan ari ninacushcapish, pi mana cuyuchipajmi canga.
29Paipaj huahua huahuacuna
mandanataca huiñaipajmi churasha.
Paipaj mandanaca jahua pacha
shinallataj huiñaipajmi canga.
30Paipaj huahua
huahuacuna ñuca mandashcata saquijpica,
ñuca yachachishca shina paicuna mana purijpica,
31ñuca chaitataj pajtachichun nishcacunata yanganchishpa,
ñuca mandashcacunata mana huaquichijpica,
32pai mana cazushcamantaca varahuanmi llaquichisha.
Pai millaita
rurashcamantaca
azotishpami
llaquichisha.
33Shina cashpapish Davidta llaquinataca manataj saquishachu.
Ñuca pajtachishatajmi nishcataca mana p'aquishachu.
34Paipaj rurashatajmi nishcataca manataj
saquishachu.
Ñuca shimihuan rurashatajmi nishcataca
manataj shujtajyachishachu.
35Ñucaca ima jucha illaj cashpami, shuj cutin pajtachishatajmi nircani.
Chaimanta Davidmanca manataj llullashachu.
36Pai mandanapica paipaj huahua
huahuataca mandancungallami.
Paicuna mandanaca
ñuca ñaupajmantaca inti shina mana anchungachu.
37Luna shinami paicuna mandanaca huiñaipaj mana cuyuringa.
Jahua pachapica ima ricushcata alli huillajmi canga
nishcanguimi. Selah
38Chashna cashpapish quiquinmi shitashcangui. Aceitehuan churashpa mandanapi quiquin churashcatamari yanganchishpa shitashcangui. Quiquinllatajmari paihuanca p'iñarishcangui.
39Quiquinpajta rurajpaj ari nishcatamari p'aquishcangui.
Paipaj coronatapish pambaman urmajtamari yanganchishcangui.
40Tucui paicunapaj pircacunatapish jutcu jutcutamari rurashcangui.
Paicunapaj pueblo muyundij pircacunatamari
urmachishcangui.
41Ñanta tucui pasajcunami
imatapish shuhuancuna.
Paipaj c'uchullapi cajcunapish yanganchincunamari.
42Paita p'iñajcunapaj
alli maquitamari sinchiyachishcangui.
Tucui paita llaquichijcunatamari
cushichishcangui.
43Paipaj espadataca, filo illajtami
rurashcangui.
Pai macanacugrijpipish,
mana fuerzata cushcanguichu.
44Pai sumaj cashcataca
tucuchishcanguimari. Paipaj jatun tiyanataca pambapimi
shitashcangui.
45Chairaj cajtamari ñapish
yuyajyachishcangui.
Jatun
pingaihuanmari pilluchishcangui. Selah
46Mandaj Dioslla, ¿maicamataj chashna ruranguiyari?
¿Shuj cutintajchu miticungui imatagari?
¿Shuj cutintajchu nina sindirij shina p'iñaringui imatagari?
47Ñuca causaica ashapajlla
cashcata yuyaripayari.
Huañujlla runataca
¿imapajtaj yangaca rurarcanguiyari?
48¡Maijan runataj causacungallari. Maijan runataj huañuitaca mana ricungari!
¿Seolman ricujtaca paipaj causaitaca quishpichi tucungachu? Selah
49Jatun Dios ¿ñaupa llaquij canaca maipitagari?
¿Quiquinca pajtachij cashca shinataj Davidman ari nishcaca maipitagari?
50Jatun Dios, quiquinpajta rurajcunata yanganchicujtaca yuyaripayari.
Achca gentecuna yanganchishpa c'amishcatamari ñuca shungupi charicuni.
51Mandaj Dios, quiquinta p'iñajcunamari pingaichincuna.
Quiquin churashca jatun mandajtaca
cada chaqui sarushcapimi pingaichincuna.
52Mandaj Diosca huiñaita alli
nishca cachun.
Chashna cachun. Chashna cachun.
Who We AreWhat We EelieveWhat We Do
2025 by iamachristian.org,Inc All rights reserved.
