ROMANOS 16 - Quichua Chimborazo Bible

Rijsishcacunata allillachu canguichij nishcami

1Ñucanchij pani Febetapish alli chasquipaichij ninimi. Paica, Cencreapi tandanacushca crijcunapajta rurajmi.

2Jucha illajcunata ima shinami chasquinguichij, chai shinallataj paipish Mandaj Jesushuan shujlla cashcamanta alli chasquichij. Paica shujtaj achcacunata, ñucatapish ayudajmi. Chaimanta paipaj ima illashcatapish ayudanguichij.

3Ñucahuan Cristo Jesuspajta ruraj Priscilatapish, Aquilatapish alli cashca cachun nipaichij.

4Ñuca causaita quishpichisha nicushpallami, paicunaraj ashallamanta mana huañurcacuna. Chaimanta paicunataca mana ñucallachu pagui nini, ashtahuanpish mana judío caj tucui tandanacushca crijcunapishmi pagui nincuna.

5Paicunapaj huasipi tandanacuj crijcunatapish alli cashca cachun nipaichij. Ñuca c'uyashca Epenetotapish alli cashca cachun nipaichij. Paica Acayapi Cristota punta crijmi.

6Mariatapish alli cashca cachun nipaichij. Paica cancunapurapaj, achcata trabajajmi carca.

7Ñucanchij aillupuramanta ñucahuan prezupi tiyaj Andronicota, Juniastapish alli cashca cachun ninmi nipaichij. Paicunaca, apostolcunahuan allita rurajmi carca. Ñucapaj ñaupa crijcunapishmi carca.

8Mandaj Jesuspi shujlla caj ñuca c'uyashca Ampliastapish allillachu cangui nipaichij.

9Cristo Jesuspajta ñucahuan ruraj Urbanota, ñuca c'uyashca Estaquistapish allillachu canguichij nipaichij.

10Cristota alli crijtaj cashcata yachashca Apelesta, Aristobulopaj familiatapish allillachu canguichij nipaichij.

11Ñuca familia Herodionta, Narcisopaj familiatapish allillachu canguichij nipaichij. Paicunapish Mandaj Jesuspi shujllami.

12Mandaj Jesuspajta mana shaicushpa trabajaj Trifenata, Trifosatapish allillachu canguichij nipaichij. Mandaj Jesuspajta mana shaicushpa chai yuyailla trabajaj c'uyashca pani Persidatapish allillachu canguichij nipaichij.

13Mandaj Jesús agllashca Rufotapish, paipaj mamatapish allillachu canguichij nipaichij. Paica ñucapajpish mama shinami.

14Asincritota, Flegonteta, Hermasta, Patrobasta, Hermesta, paicunahuan caj huauquicunatapish allillachu canguichij nipaichij.

15Filologota, Juliata, Nereota, paipaj panitapish, Olimpastapish, tucui paicunahuan caj jucha illajcunatapish allillachu canguichij nipaichij.

16Jucha illaj muchahuan caishuj chaishuj allillachu canguichij ninacuichij. Cristopaj tandanacushca crijcunapish allillachu canguichij ninmi.

17Ashtahuanca caitami rogani huauquicuna. Cancuna yachashca yachanata ñitcachishpa, pandachishpa ch'icanyachijcunataca alli ricuranguichij. Paicunamantaca anchurichij.

18Chashnacunaca, ñucanchijta Mandaj Jesucristopajtaca mana rurancunachu, ashtahuanpish quiquin huijsapajllami yuyarishpa causancuna. Paicunaca, sumaj uyanalla shimicunata rimaj tucushpami, manaraj alli yachajcunapaj shunguta umancuna.

19Cancuna cazucushcataca maipipish tucuicuna yachashcamantami, cancunamantaca achcata cushicuni. Ashtahuanpish allitaca yachajcuna, mana allitaca mana yachajcuna caichij ninimi.

20Sumaj causaita cuj Taita Diosca, Satanastaca cancunapaj chaqui ucupimi saruchun ñalla churanga. Ñucanchijta Mandaj Jesucristopaj mana c'uyaipajta c'uyaj canaca, cancunahuan cashca cachun.

21Ñucahuan trabajaj Timoteo, ñuca aillumanta caj Lucio, Jasón, Sosipaterpishmi cancunataca, allillachu canguichij nincuna.

22Cai quillcata quillcaj Terciopish, Mandaj Jesuspi shujlla cashcamantaca cancunata allillachu canguichij ninimi.

23Ñucata pozachij Gayo, paipaj huasipi tandanacuj crijcunapish allillachu canguichij nincunami. Pueblopaj cullquita huaquichij Erasto, huauqui Cuartopish cancunataca, allillachu canguichij nincunami.

24Ñucanchijta Mandaj Jesucristopaj mana c'uyaipajta c'uyaj canaca, tucui cancunahuan cashca cachun. Chashna cachun.

Tucuchinapaj Diosta alli nishcami

25Jesucristomanta alli huillaita ñuca huillashca shinallataj, cancunata sinchiyachij Diostaca allimari cangui ninimi. Huiñaimantami pi mana yachaipaj pacallataca ricuchimushca.

26Chaitaca huiñaita causaj Dios mandashca shinami, paipaj profetacunaman Quillcacunata quillcachishpa ricuchishca. Crinataj cashcata cazunata tucui mama llajtacunaman yachaj chayachingapajmi chashna ricuchishca.

27Tucuita yachaj shujlla Diostaca, Jesucristomanta huiñai huiñaita jatunyachishca cachun. Chashna cachun.