1 CRÓNICAS 18 - Quichua Chimborazo Bible

Davidca maijanlla llajtacunata japishcami(2 S 8.1-14)

1Tucui chaicuna q'uipaca Davidca filisteocunata mishashpa, cumurichishpami Gat pueblotaca muyundij pueblocunandij quichujpi filisteocunaca Davidpaj ucupi tucurcacuna.

2Moabitacunatapish misharcami. Paicunapish Davidpajta rurajcuna tucushpa, imalla cuna cashcata cushpami causarcacuna.

3Davidca Soba llajtata jatun mandaj Hadad-ezertapish Hamat pueblopimi misharca. Hadad-ezerca Éufrates jatun yacu c'uchupi caj llajtata cutinllataj paipaj cachun japinaman rijpimi chashna misharca.

4Davidca paicunapajtaca 1.000 carrocunatami japirca. Caballocunapi tiyarishpa purijcunataca 7.000 runacunata, chaquillahuan purijcunataca 20.000 runacunatami prezu japirca. Caballocunataca patsaj carrocunata aisanapaj pajtallata saquishpami, caishuj caballocunataca tucuicunata garroncunapi p'itircacuna.

5Soba llajtata jatun mandaj Hadad-ezerta ayudangapajmi Damascomanta siriocunapish shamurcacuna. Chai siriocunatapish Davidca 22.000 runacunatami huañuchirca.

6Davidca Siriapi caj Damascopica chapaj soldadocunatami churarca. Siriocunaca Davidpaj ucupi tucushpa paipajta rurajcuna tucushpami, tributota cushpa causarcacuna. David maipi macanacunaman rijpipish Mandaj Diosca mishachijllami carca.

7Davidca jatun mandaj Hadad-ezerpajta rurajcuna apamushca curi escudocunata japishpaca Jerusalenmanmi apamurca.

8Davidca Hadad-ezerpaj Tibhat, Cun shuti pueblocunamantaca achca broncetapishmi japirca. Chai broncehuanmi Salomonca, yacuta churana jatun pailatapish, jatun pilarcunatapish, Diospaj huasipi imalla charinacunatapish rurachirca.

9Hamat pueblota jatun mandaj Toica, Soba llajtata jatun mandaj Hadad-ezerpaj tucui soldadocunata David chingachishcatami yachaj chayarca.

10Toica Hadad-ezerhuanca ñaupamanmi macanacuj cashca carca. Hadad-ezerta David mishashcamantaca Toica paipaj churi Adorantami allillachu cangui, alli nishca cachun nichun Davidpajman cacharca. Cullquimanta imalla rurashcacunata, broncemanta imalla rurashcacunatapish cushpami Adorantaca Davidpajmanca cacharca.

11Chaicunataca jatun mandaj Davidca Edom llajtapi causajcunata, Moab llajtapi causajcunata, amonitacunata, filisteocunata, amalecitacunata quichushca cullquihuan curihuan tandachishpami Mandaj Diospaj ch'icanchishpa churarca.

12Sarviapaj churi Abisaipish, Cachi tiyan pugru pambapimi Edommanta caj, 18.000 runacunata ñuturca.

13Davidca Edom llajtapica, tucuipimi chapaj soldadocunata churarca. Tucui edomitacunami Davidpajta rurajcuna tucurcacuna. David maiman rijpipish Mandaj Diosmi paitaca mishachircalla.

David churashca mandajcunami(2 S 8.15-18; 20.23-26)

14Davidca, tucui israelcunatami mandarca. Paica cashcata rurashpami tucui israelcunataca mandarca.

15Sarviapaj churi Joabca soldadocunata mandajmi carca. Ahiludpaj churi Josafatca quillcacunata huaquichijmi carca.

16Ahitobpaj churi Sadoc, Abiatarpaj churi Abimelecca curacunami carca. Savsa runaca quillcajmi carca.

17Joiadapaj churi Benaiaca, cereteocunata, peleteocunata mandajmi carca. Davidpaj churicunaca paipaj c'uchullapi mandajcunami carca.