1 TESALONICENSES 2 - Quichua Chimborazo Bible

Yuyachishcacunami

1Huauquicuna, ñucanchij cancunata ricunaman rishcaca, mana yanga cashcataca cancunallataj yachanguichijmi.

2Ñaupaman Filipospi cajpi ima shina c'amishpa llaquichishcataca, cancunallataj yachanguichijmi. Chaipica sinchi llaquicuna chaupipi cajpipish, Taita Diosmi paipaj alli huillaita huillachun ñucanchijmanca fuerzata curca.

3Ñucanchijca pandachingaraiculla, mapa yuyaihuan umangaraicullaca mana huillarcanchijchu.

4Ashtahuanpish Taita Diosmari ñucanchijtaca, ima shina cajta ricushpa alli huillaita huillachun churarca. Chaimantami runacunataca mana cushichishun ninchij, ñucanchij shunguta yachaj Taita Diosllatami cushichishun ninchij.

5Catinanqui shimicunahuan, ñucanchij ashtahuan charij tucungapajca manataj huillashcanchijchu. Chaitaca yachanguichijmi, Taita Diospish ricucunmi.

6Runacuna alli nishca canataca cancunamantapish, shujtajcunamantapish mana mashcarcanchijchu. Cristopaj apostolcuna cashcamantaca, japinataj cashca cashpapish mana p'iñachircanchijchu.

7Ashtahuanpish shuj mama paipaj quiquin huahuacunata c'uyashpa cuidaj shinami, cancunahuan cashpaca c'uyaihuan sumajta charircanchij.

8Cancunata ñucanchij yallitaj c'uyashcamantaca, Taita Diospaj alli huillaillataca mana huillashun nircanchijchu. Ashtahuanpish ñucanchij causaitapishmari cushun nircanchij. Chashnami ñucanchijpajca yallitaj c'uyashca tucushcanguichij.

9Huauquicuna, ñucanchij shaicuita trabajashcataca yuyaringuichijmi. Cancunamanta maijanta ama yalli p'iñachingapajca tutapish, punllapish trabajashpami Taita Diospaj alli huillaitaca cancunaman huillarcanchij.

10Huauquicuna, ñucanchijca cancunahuan ima shina jucha illajlla, cashcata rurashpa, mana juchachipaj cashcataca cancunapish yachanguichijmi, Taita Diospish yachanmi.

11Caitapish yachanguichijmi, yaya paipaj quiquin huahuacunata ima shinami charin, chai shinallatajmi cada quiquinta yuyachishpa rimaj, cushichij carcanchij.

12Paipaj sumaj mandanaman Taita Diosca cayashcamantaca, paipaj huahuacuna shinataj causachunmi yachachircanchij.

13Taita Diospaj Shimita cancunaman ñucanchij huillajpi uyashpaca, mana runacunapaj shimita shinallachu chasquircanguichij. Ashtahuanpish Taita Diospaj Shimitaj cashcatami chasquircanguichij. Chaimi crij cancunapica rurachicun. Chaimantami ñucanchijca mana samashpa, Taita Diostaca pagui nicunchijlla.

14Cristo Jesuspi caj, Diospaj tandanacushca judío crijcunataca judiocunallatajmi llaquichircacuna. Cancunatapish cancunapaj quiquin llajtapi causajcuna llaquichijpica, paicuna shinallataj llaquita apajcunami tucushcanguichij.

15Chaicunallatajmi Mandaj Jesustapish, paicunapaj quiquin profetacunatapish huañuchircacuna. Ñucanchijtapish llujshichishpami cacharcacuna. Taita Diostaca mana cushichincunachu, tucui runacunatapish jarcancunami.

16Mana judiocuna quishpirichun huillajtapishmi ñucanchijtaca jarcancuna. Chashna rurashpami paicunapaj juchacunataca, yallijta jundachincuna. Chaimi Taita Diospaj p'iñaica, yallitaj paicunapaj jahuaman shamurca.

Pabloca Tesalónica crijcunata ricunaihuan cashcami

17Ñucanchijca huauquicuna, cancunamanta ashacama carupi cashpapish, shungupica mana carupichu canchij. Ashtahuanpish cancunapaj ñahuitaca ricunaihuanmi canchij.

18Chaimantami cancunapajman rishun nicurcanchij. Ashtahuanca ñucallapish shamusha nicurcanimi. Shina cajpipish Satanasmi ñucanchijtaca jarcarca.

19Shina cajpica ¿imataj ñucanchij shuyanaca cushicunachu, mana cashpaca ñucata sumajyachij coronachu? Ñucanchijta Mandaj Jesucristo shamuipi, paipaj ñaupajpica cancunamari chaicunamanta yalli canguichij.

20Cancunamari ñucanchij alli ricurina, cushicunapish canguichij.