2 CRÓNICAS 32 - Quichua Chimborazo Bible

Judá llajtaman Senaquerib yaicushcami(2 R 18.13-37; Is 36.1-22)

1Ezequiasca, chashna tucuita allichishpami, Diosta alli cazushcata ricuchirca. Chai tucuita rurashca q'uipami, Asiria llajtata jatun mandaj Senaqueribca, Judá llajtaman chayamurca. Chai llajtata pai japisha nishpami, macanacungapajca jatun pircayuj tucui pueblocuna muyundijpica soldadocunata churarca.

2-3Chai jatun mandajca, Jerusalenpi causajcunahuan macanacungapajmi shamushca carca. Chaita ricushpami Ezequiasca Jerusalén pueblo muyundijpi tiyaj huaicu yacucunata allpahuan tapanata yuyarirca. Chaitami pai churashca mandajcunahuanpish, soldadocunata mandajcunahuanpish parlanacurca. Chaita ruranataca tucui mandajcunami allimi nircacuna.

4Chaita yuyarinacushpa mandajpimi, huaicucunapi tiyaj tucui yacucunatapish, puebloman allpa ucuta apashca yacutapish achcacuna tandanacushpa allpahuan taparcacuna. “Asiria llajtata jatun mandajcuna chayamushpa, ama achca yacuta japichun” ninacushpami chashna rurarcacuna.

5Ezequiasca, c'ari c'ari cana yuyaita japishpami, chai pueblo muyundij jatun pircata allichirca. Shinallataj chai jatun pirca jahuapipish torrecunatami rurachirca. Chai jatun pirca canlla ladomanpish shujtaj jatun pircatami rurachirca. Davidpaj pueblopi caj Milo nishca pamba muyundij pircatapishmi ashtahuan sinchita rurachirca. Shinallataj achca espadacunatapish, escudocunatapishmi rurachirca.

6Chai q'uipaca, soldadocunata mandajcunahuanmi Jerusalenpi causajcunataca, pueblo pungu pambapi tandachirca. Chaipimi c'ari c'ari cana yuyaita cungapaj cashna nirca:

7“Mana manchaj c'ari c'aricuna caichigari. Asiria llajtata jatun mandajtapish, paihuan shamucuj achca soldadocunatapish ama manchaichijchu. Ñucanchijca, chai jatun mandajtapish yallitamari charinchij.

8Ñucanchijhuan macanacungapaj paihuan shamujcunaca runacunallamari. Ashtahuanpish ñucanchij paicunahuan macanacujpica, ñucanchijta Mandaj Diosmari ayudahuanga” nircami. Judá llajtata jatun mandaj Ezequías chashna nijpica, tucuicunami mana manchashpa c'ari c'ari cana yuyaita japircacuna.

9Asiria llajtata jatun mandaj Senaqueribca, Laquis pueblopi causajcunahuanmi tucui paipaj soldadocunahuan macanacucurca. Chaipi macanacucushpami, paipajta ruraj maijan mandajcunataca, Judá llajtata jatun mandaj Ezequiasmanpish, Jerusalenpi caj tucui Judá runacunamanpish cashna nichun cacharca:

10“Asiria llajtata jatun mandaj Senaqueribca, cashnami nichun cachan: ¿Maijanpi shunguta churashpataj cancunaca ñuca soldadocunahuan muyujta shayacujta ricushca jahuapish, Jerusalenmantaca mana llujshinguichij?

11Ezequiasca cancunataca: Ñucanchijta Mandaj Diosmi, Asiria llajtata jatun mandajpaj maquimanta quishpichinga nishpami umacunga. Chaitaca ama crichijchu, yaricaihuan, yacunaihuan cancuna huañuchunllami chashna nicunga.

12Ezequiasca chai Diospaj rurashca lomacunatapish, altarcunatapishmi anchuchirca. Chashna anchuchishpaca, cai Judá llajtapi causajcunatapish, Jerusalén pueblopi causajcunallatatajpishmi cai altar ñaupajllapi Diosta adoranguichij, inciensotapish cai altarllapi paiman cushpa rupachinguichij nishpa mandashca carca. Chaitaca cancunallataj yachanguichijmi.

13Ñucapish ñuca ñaupa yayacunapish, caishuj llajtacunapi causajcunata imata rurashcataca ¿manachari yachanguichigari? Chai llajtacunapi causajcunapaj dioscuna paicunata ñuca maquimanta mana quishpichi tucushcataca ricurcanguichijtajmari.

14Ñuca ñaupa yayacuna llaquichishca llajtacunapaj dioscunaca ¿maijan llajtapaj dios paipaj llajtata ñuca maquimanta quishpichi tucujta ricushcanguichijchu? ¿Cancunapaj Diosllachu ñuca maquimantaca quishpichi tucunga?

15Chashna cashcamantaca Dios quishpichingami nishpa, Ezequías cancunata crichishpa umachunca ama saquichijchu. Ñuca ñaupa yayacuna llaquichishca tucui llajtacunapaj dioscunaca maijan llajtapaj diospish paipaj maquimantaca, mana quishpichi tucurcachu. Cancunapaj Dioscarin maitataj cancunataca, ñuca maquimanta quishpichi tucungari ninmi” nircacunami.

16Asiria llajtata jatun mandajpajta rurajcunaca shujtaj mana allicunatapish nishpami, Mandaj Diostapish, paipajta ruraj Ezequiastapish c'amircacuna.

17Senaqueribca israelcunata Mandaj Diosta c'amishpami, quillcacunata cachashca carca. Chai quillcacunapica, paitaca cashnami c'amishca carca: “Shujtaj llajtacunapi causajcunapaj dioscunaca, ñuca maquimantaca mana quishpichi tucurcachu. Chashnallataj Ezequiaspaj Diospish, paipaj runacunataca ñuca maquimantaca mana quishpichi tucungachu” nishpami c'amishca carca.

18Senaquerib cachashca mandajcunaca, Jerusalén pueblota japina yuyaihuanmi carca. Chaimantami yallitaj manchachingapajca, paicunata ricurashpa Judá llajta rimaipi sinchita caparishpa c'amircacuna. Jerusalenpi causajcunaca muyundij jatun pirca jahuapimi tiyacurcacuna.

19Chai mandajcunaca Jerusalenpi causajcunapaj Diostapish, shujtaj llajtacunapi causajcunapaj rurashcalla dioscunatapishmi c'amircacuna.

Mandaj Diosca Ezequiastapish Jerusalenpi causajcunatapish quishpichishcami(2 R 19.1-37; Is 37.1-38)

20Chashna c'amijpica, jatun mandaj Ezequiaspish, profeta Isaiaspish jahua pachapi causaj Diostami caparishpa mañarcacuna. Isaiasca Amozpaj churimi carca.

21Paicuna mañajpimi, Mandaj Diosca shuj angelta cacharca. Chai angelmi Asiria llajtata jatun mandajpaj tucui c'ari c'ari sinchi soldadocunatapish, chai tucui soldadocunata mandaj soldadocunatapish huañuchirca. Chaimantami chai jatun mandajca, yallitaj pingai tucushpa paipaj llajtaman tigrashpaca, paipaj diospaj huasiman yaicurca. Chai ucupimi, paipaj churicunallataj espadahuan huañuchircacuna.

22Chashnami Mandaj Diosca Ezequiastapish, Jerusalenpi causajcunatapish, Asiria llajtata jatun mandaj Senaqueribpaj maquimantapish, tucui shujtajcunapaj maquimantapish quishpichirca. Chashna rurashpami tucui muyundij llajtacunapi causajcuna p'iñachinamantapish jarcarca.

23Chaimantami achcacuna Mandaj Diosman cungapaj Jerusalenman imatapish apamujcuna carca. Shinallataj Judá llajtata jatun mandaj Ezequiasmanpish achca convidanacunatami cunaman shamujcuna carca. Mandaj Dios chashna quishpichishca q'uipaca, Ezequiasca tucui shujtaj llajtacunapi causajcuna alli nishpa cazushca jatun mandajmi tucurca.

Ezequías ungujpi Dios alliyachishcami(2 R 20.1-11; Is 38.1-22)

24Chai punllacunapimi Ezequiasca, huañuna ungüihuan carca. Shina cashpapish Mandaj Diosca, Ezequías paita mañajpimi, pai alliyachishcata ricuchun shuj señalta curca.

25Chashna achca allicunata paipaj ruracujpipish, Ezequiasca Mandaj Diostaca mana pagui nircachu. Ashtahuanpish jatun tucurcami. Chaimantami Mandaj Diosca paihuanpish, Judá llajtapi causajcunahuanpish, Jerusalenpi causajcunahuanpish p'iñarirca.

26Ezequiasca, jatun tucushca cashpapish, Mandaj Diospaj ñaupajpi cumurircami. Jerusalenpi causajcunapish pai shinallatajmi, Diospaj ñaupajpica llaquirircacuna. Chaimantami Mandaj Diosca p'iñarishca cashpapish, Ezequías causacujpica mana llaquichirca.

Babiloniamanta cachashcacunata Ezequías chasquishcami(2 R 20.12-19; Is 39.1-8)

27Ezequiasca yallitaj charijpish, alli nishcapishmi tucurca. Paica achca cullquita, curita, achij nicuj sumaj rumicunata, mishquijllata ashnaj jambicunata, escudocunatapish munanajlla tucui laya sumaj aparinacunatapishmi charirca.

28Shinallataj granocunata, vinota, aceiteta, huaquichina huasicunatapishmi rurachirca. Tucui laya animalcunapajmi shayana huasicunatapish, corralcunatapish rurachirca.

29Achca pueblocunatapish rurachircami. Huagracunatapish, ovejacunatapish canlla, canlla yallitaj achcatami charirca. Taita Diosmi chashna yallitaj achca allicunata Ezequiasman curca.

30Ezequiasca Gihón pugyumanta llujshichishca larca yacutami tapachirca. Chaita tapachishpaca, inti huashicun ladoman caj Davidpaj pueblomanmi chai yacutaca aparca. Chashnami Ezequiasca, tucui imatapish pai rurai callarishcataca alli rurarca.

31Ezequiasca, allillachu cangui nichunpish, Judá llajtapi ima shina chashna yuyana allicunata rurashcata tapushpa yachaj chayachunpishmi, Babiloniamantaca maijan huillajcunata cacharca. Taita Diosca Ezequiastaca tucuipi ayudashca cashpapish, ima shina yuyaj cashcata ricungapajmi, chaicuna shamujpica paillata saquirca.

Ezequías huañushcami(2 R 20.20-21)

32Ezequías ashtahuan imallata rurashcapish, shujtajcunata llaquij cashcapish Amozpaj churi, profeta Isaías huillashpa quillcashcapimi tiyacun. Shinallataj Judá llajtata jatun mandajcuna imallata rurashcata, Israel llajtata jatun mandajcuna imallata rurashcata quillcashcapimi tiyacun.

33Ezequías huañushpa paipaj ñaupa yayacunahuan dormijpica, tucui Judá llajtapi causajcunapish, Jerusalenpi causajcunapish alli nishpami, Davidpaj huahua huahuacunallatataj pambana ashtahuan alli jutcupi pambarcacuna. Paipaj randica paipaj churi Manasesmi mandarca.