1 SAMUEL 9 - Quichua Chimborazo Bible

Jatun mandaj cachun Saulta churashcami

1Benjaminpaj aillupurapimi tucuicuna alli nishca c'ari c'ari shuj runa tiyarca. Paica Cis shutimi carca. Cisca Abielpaj churimi carca. Abielca, Zerorpaj churimi carca. Zerorca, Becoratpaj churimi carca. Becoratca Benjamín aillumanta Afiapaj churimi carca.

2Cisca Saúl shuti shuj churitami charirca. Paica sumaj mosomi carca. Israelcunapurapica pai shinaca, shujtajca mana tiyarcachu. Chai mosoca israelpurapi cajcunataca tucuicunatami umahuan yalli jatun carca.

3Shuj punllami Saulpaj yaya Cis runapaj burrocuna chingarijpi, Cisca paipaj churi Saultaca:

–Cunanca jatari, ñucanchijpajta rurajcunamanta maijanta pushashpa burrocunata mashcagri– nirca.

4Chaimi Saulca Efraín aillupaj urcuta mashcashpa rishpaca, Salisa llajtacama mashcashpapish mana japircacuna. Chai q'uipaca Saalim llajtata mashcashpa rishpaca Benjamín aillupaj llajtata mashcashpapish mana japircacunachu.

5Zuf llajtaman chayashpami, Saulca paihuan caj paipajta rurajtaca:

–Tigrashpa jaculla. Ñuca yayaca burrocunamanta susto canataca ñachari cungarirca. Ashtahuanpish ñucanchijmantamari sustohuan canga– nirca.

6Chaimi paipajta rurajca:

–Cai pueblopica Diospajlla shuj runami tiyan, paica tucuicuna alli nishca runami, tucui imalla nishcapish pai nishca shinatajmi pajtan. Paipajman jacu, ñucanchij maillata mashcashpa ñucanchij mashcacushcata japigrinata huillangapishchari– nirca.

7Chaimi Saulca paipajta rurajtaca:

–Shinashpaca jacu, shina cashpapish chai runapajca ¿imatataj apashunri? Ñucanchij apamushca tandacunapish muchilacunapi ñamari illan. Diospajlla runaman cungapajca imata mana charinchijca. ¿Imatataj cushunri?– nirca.

8Chaimi paipajta rurajca Saultaca:

–Riqui shuj siclomanta chuscupi chaupishca cullquitami ñuca maquipi charicuni. Diospajlla runa ñucanchij burrocunata maipi mashcagrinata huillachunca chai cullquita cushallami– nirca.

9(Ñaupa punllacunaca ñucanchij israelcunapura maijanpish Diosta imatapish tapushun nishpaca: “Dios ricuchishcata huillaj runata tapugrishunchij” nijcunami carca. Chashna huillaj runallatatajmi cunan punllacunaca: “Profeta” nincuna).

10Chaimi Saulca paipajta rurajtaca:

–Allitami ningui, shinashpaca jaculla– nishpaca, Diospajlla runa causacun pueblomanmi rircacuna.

11Chai puebloman chayana huichita ricushpaca yacuta apanaman uriyacuj solteracunahuan tupashpami paicunataca:

–¿Imatapish Dios ricuchishcata huillaj runaca cai pueblopichu?– nishpa tapujpi,

12paicunaca:

–Ari, caipimi. Cunan punllaca caipi causajcuna lomapi tiyaj altarpi cushpa rupachina punlla cajpimari, cai puebloman shamurca. Utca richijlla.

13Puebloman ña yaicushpaca, lomapi tiyaj altarpi micunaman manaraj rijpi utca mashcanguichij. Chai lomapi cajcunaca pai chayangacama manaraj micungacunachu. Pai chaiman chayashpa, Diosman cushcata Diospajlla cachun nijpimi chaiman cayashcacunaca micungacuna. Chaimanta cunantaj utca huichiyashpaca japinguichijmi– nijpimi,

14paicuna chai puebloman ña huichiyashpaca, chai pueblo chaupipi cashpa Samueltaca chai lomapi caj altarman huichiyangapaj ricushpaca paicunapaj chaiman shamujta ricurca.

15Saúl chayanapaj shuj punlla illajpirajmi Mandaj Diosca Samuelman ricurishpaca:

16“Caya cai horas shinallatajmi, ñucaca Benjaminpaj llajtamanta shuj runata cambajman cachasha. Paitaca ñucapaj caj israelcunata mandaj cachun aceitehuan churangui. Paimi ñucapaj cajcunataca filisteocunapaj maquimanta quishpichinga. Ñucapaj cajcuna llaquita apacujtaca ricunimi. Paicuna caparishpa mañashcapish ñucapajmanmi chayan” nirca.

17Saulta, Samuel ña ricujpica Mandaj Diosca: “Cai runami ñuca huillacushca runaca. Paimi ñuca israelcunataca mandanga” nircami.

18Chai puebloman yaicuna pungu chaupipi, Samuelpajman Saúl c'uchuyashpaca:

–Dios ricuchishcata huillaj runapaj huasica maipitaj chaita ricuchihuai– nishpa rogajpimi,

19Samuelca Saultaca:

–Dios ricuchishcata huillajca ñucami cani. Ñucata ñaupashpa lomapi tiyaj altarman huichiyai. Chaipi cunan punllaca ñucahuan micungui. Caya tutamanta utcatami cambaj shungupi imallata tapusha nicushcataca tucuita huillashpa, caya minchacama nisha.

20Ña quimsa punllata chingarishca burrocunamantaca ama llaquilla caichu. Chaicunataca ñami japirca. Israelpi tiyaj tucui munananquicunaca ¿pipajshi? Ashtahuanpish chaicunaca cambajpish, cambaj huasi ucupuracunapajpishmari– nircami.

21Chaimi Saulca:

–¿Manachu ñucaca Israel aillupica yallitaj ashalla caj Benjaminpaj aillumanta cani? Benjaminpaj aillupipish ñuca huasi ucupuramari tucuicunamanta yalli ashalla canchij. ¿Ima nishpataj chai tucuitaca nihuanguiyari?– nirca.

22Chai q'uipaca Samuelca, Saultaca paipajta ruraj runandijmi huasi ucuman pusharca. Chaipica quimsa chunga cayamushca runacuna tiyacun puntapimi paicunataca tiyachirca.

23Chaipimi, Samuelca yanuj runataca:

–Ch'ican huaquichi nishpa asha aichata ñuca canman cushcata apamui– nirca.

24Chaimi yanuj runaca, changa aichataca, chai jahuapi imalla churashcacunandij apamushpa Saulpaj ñaupajpi churajpi Samuelca:

–Caica ch'icanchishpa huaquichishca aichami. Cambaj ñaupajpi churashpa micui. Cai cayashcacunahuan cunan punlla can micuchun huaquichishca aichami– nirca. Chai punllaca Saulca Samuelhuanmi micurca.

25Samuelca lomapi tiyaj altarmanta uriyamushpaca, chai pueblopimi huasi jahuapi caj patiopi Saulhuan parlanacurca.

26Cayandij tutamanta utca jatarishpami, manaraj inti llujshijpi Samuelca huasi jahuapi Saúl cajpi cashna nirca:

–Saúl jatari, caya minchacama ningapaj– nijpi Saúl jatarijpica Samuelndij ishquimi llujshircacuna.

27Ña chai pueblomanta llujshigrishpami, Samuelca Saultaca:

–Cambajta rurajtaca ñaupashpa rilla ni nirca. Saulpajta ruraj ña rijpimi Saultaca Taita Dios imalla nishcata canman huillangapaj ashata shuyai– nirca.