JEREMÍAS 37 - Quichua Chimborazo Bible

Jatun mandaj Sedequiasca Jeremiasta tapuchun cachashcamanta

1Joacimpaj churi Coniaspaj randica, Josiaspaj churi Sedequiasmi Judá llajtataca mandacurca. Paitaca Babilonia llajtata jatun mandaj Nabucodonosormi, Judá llajtata jatun mandaj cachun churarca.

2Shina cajpipish Mandaj Dios Jeremiasman huillachishcataca paipish, pai churashca mandajcunapish, tucui chaipi causajcunapish manataj cazurcacunachu.

3Jatun mandaj Sedequiasca: “Ñucanchijta Mandaj Diosta ñucanchijmanta mañapai” nichunmi, Selemiaspaj churi Jucaltapish, Maasiaspaj churi Sofonías curatapish Dios ima nishcata huillaj Jeremiaspajman cacharca.

4Jeremiasca chaipajca, manaraj prezu tiyacurcachu. Chaimantami paica chaipi cajcunapurapi puricurcaraj.

5Chai punllacunallapitajmi, faraonpaj soldadocuna Egiptomanta shamucushca uyarirca. Jerusalén pueblo muyundijpi chapacuj caldeo soldadocuna chaita uyashpaca, anchurishpa rircacunami.

6Chaipimi Jeremiastaca Mandaj Diosca cashna nichun mandarca:

7“Mandaj Diosca cashnami nin: Ñucata tapuchun cancunata cachaj cai Judá llajtata jatun mandajmanca cashna nigrichij: Faraonpaj soldadocunaca cancunata ayudanaman Egiptomanta shamucushpapish, ñami paicunapaj llajtallamantaj tigrancuna.

8Ashtahuanpish caldeocunamari cutin tigramugrin. Paicunaca cai pueblota mishashpami, ninata japichishpa tucui rupachingacuna ninmi.

9Mandaj Diosca cashnapishmi nin: Caldeocunaca ña anchurishpa ringacunatajmi nishpa ama cancunallataj umarichijchu. Paicunaca manataj anchuringacunachu.

10Cancunahuan macanacucuj caldeo soldadocunataca, tucuicunata chugrichinguichijchari. Chashna chugrichishca huaquin soldadocunalla saquirishpapish, paicunapaj carpa huasicunamanta llujshimushpa cai pueblotaca ninata japichishpa tucui rupachingallami ninmi” nircami.

Jeremiasta prezushcamanta

11Jerusalén muyundijpi chapacuj caldeo soldadocunaca, faraonpaj soldadocuna Egiptomanta shamucujta yachashpami anchurircacuna.

12Paicuna anchurijpimi Jeremiasca Jerusalenpi causajcunamanta anchurishpa, Benjamín llajtaman ringapaj Jerusalenmanta llujshicurca.

13Paica Benjamín shuti pungutami llujshigrirca. Chai pungupica soldadocunata mandaj Irías shuti soldadomi cuidacurca. Paimi Jeremías llujshigrijpica:

–Canca caldeocunapajmanmi ricungui– nishpa japirca.

Iriaspaj yayaca Selemiasmi carca. Selemiaspaj yayaca Hananiasmi carca.

14Irías japijpica Jeremiasca:

–Pandatami yuyangui, manapish caldeocunapajman ricunichu– nircami.

Shina nijpipish Iriasca mana uyashpami, Jeremiastaca mandajcunapaj ñaupajman aparca.

15Mandajcunaca p'iñarishpami, Jeremiastaca anguhuan macarcacuna. Chaimantaca Jonatán shuti quillcaj runapaj huasi cashca ucupimi prezu churarcacuna. Chai huasitaca ñaupamanca, quillcashpa tiyana huasi cashca cajpipish, prezuna huasitami rurarcacuna.

16Chai huasipica Jeremiastaca, pambata allashpa rurashca ucupimi churarcacuna. Chaipimi paica achca punllacunata tiyarca.

17Jatun mandaj Sedequiasmi, Jeremiasta chai ucumanta llujshichichun cacharca. Chaimanta llujshichishpa paipaj huasiman pushaj cachashpami, Jeremiastaca:

–¿Mandaj Diosca imata huillanchu?– nishpa paillata tapujpimi, Jeremiasca:

–Ari, huillanataca charinimi, Babilonia llajtata jatun mandajpaj maquipimi churagrin– nirca.

18Jeremiasca, jatun mandaj Sedequiastaca cashnapishmi nirca:

–Ñucaca cantapish, can churashca mandajcunatapish, tucui cai pueblopi causajcunatapish ¿ima mana allitataj rurashcaniyari? ¿Imamantataj ñucataca prezu churanguichigari?

19Babilonia llajtata jatun mandajca cancunatapish, cai llajtatapish mana llaquichinaman shamungachu nishpa cancunaman huillajcunaca ¿maitagari?

20Jatun mandaj ñuca amitolla, cunanca caillatami mañagripani. Ñuca mañashcata ari nihuailla: Ñucaca quillcaj Jonatanpaj huasipica mana huañusha ninichu. Ama chaiman tigrachishpa cachahuaichu– nircami.

21Shina nijpimi jatun mandaj Sedequiasca, Jeremiastaca prezuna huasi canllapi churachirca. Paimanca tandata rurajcunapaj callemanta punllanta shuj tandallata apashpami carajcuna carca. Chashnami Jeremiasca, prezuna huasi canllapi saquirirca.