2 SAMUEL 10 - Quichua Chimborazo Bible

Amonitacunata siriocunata David mishashcami(1 Cr 19.1-19)

1Tucui chaicuna q'uipaca, amonitacunata jatun mandajmi huañurca. Pai huañujpica paipaj churi Hanunmi mandarca.

2Chaimi Davidca: “Ñucami Nahaspaj churi Hanunhuanca paipaj yaya ñucahuan alli cashca shinallataj paihuanpish llaquishcata ricuchigrini” nishpami, paipaj yaya huañushcamanta cushichingapaj Davidca paipajta ruraj maijancunata cacharca. Davidpajta rurajcuna amonitacunapajman chayajpica,

3chai llajtata q'uipa mandajcunaca, paicunata mandaj Hanuntaca: “¿Cambaj yaya huañushcamanta canta cushichichunlla Davidca paipajta rurajcunata cachashcatachu yuyangui? Manachu Davidca paipajta rurajcunataca cantapish cai pueblocunatapish ima shina cashcata ricushpa, q'uipataca tucui chingachingapaj ricushpa tigramuchun cachashca canga” nircacuna.

4Chaimi Hanunca, Davidpajta rurajcunata japishpa, shuj lado barbasta tucui raspashpa, churanacunatapish shuj lado uritaca siqui patacama lliquishpa paicunataca tigrachishpa cacharca.

5Chaita Davidman yachaj chayachijpica, paicunaca yallitaj pingaihuan cana cashcata yachashpami jatun mandajca maijancunata tupanaman cachashpaca: “Cutinllataj barbas huiñangacama Jericopi saquirichij. Barbas huiñajpica tigramunguichijllami” ninaman cacharca.

6Amonitacunaca chaimanta David paicunahuan p'iña cashcata yachashpami, Bet-rehobpi causaj siriocunata, Sobapi causaj siriocunata chaquillahuan purij 20.000 runacunata, jatun mandaj Maacapaj 1.000 runacunata, Is-tobpaj 12.000 runacunata pagashpa pushamuchun cacharca.

7Chaicunata David uyashpaca, c'ari c'ari tucui soldadocunahuanmi Joabta cacharca.

8Amonitacunaca macanacungapaj llujshishpaca paicunapaj puebloman yaicuna pungullapimi macanacunalla tucushpa shayarircacuna. Sobamanta caj siriocunapish, Rehobmanta cajcunapish, Is-todmanta cajcunapish, Maacamanta cajcunapish shujtaj pambapimi shayarircacuna.

9Joabca ñaupaj ladomantapish, huasha ladomantapish amonitacuna quimimugrijta ricushpami, israelcunapuramantaca ashtahuan alli soldadocunata agllashcahuan, siriocunahuan macanacungapaj macanacunalla tucushpa shayarirca.

10Caishuj soldadocunataca amonitacunahuan macanacunallata rurashpa shayachishpami, paipaj huauqui Abisaiman cushpa cashna nirca:

11“Siriocuna ñucata mishagrijpica, can ayudanaman shamungui. Amonitacuna canta mishagrijpica, ñucami canta ayudanaman shamusha.

12Taita Diospaj agllashcacunamanta, ñucanchij pueblomantaca c'ari c'ari cailla, c'ari c'ari cashunlla. Mandaj Dios paipaj ima shina alli canapaj rurachunlla” nirca.

13Joabca, paihuan caj israelcunahuanmi siriocunahuan macanacungapaj c'uchuyagrirca. Ashtahuanpish siriocunaca paicunata miticushpa rircallacunami.

14Amonitacunaca siriocuna miticushpa rijta ricushpaca, paicunapish Abisaita miticushpa rishpami, paicunapaj puebloman yaicushpa pacatucurcacuna. Chaita ricushpaca Joabca, Amonitacunahuan macanacunata saquishpa Jerusalenman tigrarcallami.

15Siriocunaca, israelcuna paicunata mishajpi pingai tucucunchij nishpami, cutinllataj tandanacurcacuna.

16Hadad-ezer, Éufrates yacu ch'imba ladoman caj siriocunata pushanaman cachajpimi, pushanaman rijcunaca Helam puebloman chayarcacuna. Paicunaca paicunata mandaj Sobacta pushashcami chayarca. Sobacca Hadad-ezerpaj soldadocunata mandajmi carca.

17Chaita Davidman huillajpica, paica tucui israelcunata tandachishpami Jordán yacuta ch'imbashpa Helamman shamurca. Chaipimi siriocunaca macanacunalla tucushpa shayarishpa Davidhuan macanacurca.

18Ashtahuanpish siriocunaca israelcunapaj ñaupajmanta miticushpami callparca. Chaipica Davidca 700 carrocunapi caj soldadocunata, caballopi tiyarij 40.000 soldadocunatapishmi huañuchirca. Soldadocunata mandaj Sobactapish chugrichijpimi, paica chaillapitaj huañurca.

19Hadad-ezerta ayudacuj tucui jatun mandajcunaca chaita ricushpami, ña paicunata israelcuna mishashca cashcata yuyarcacuna. Chaimi paicunaca israelcunahuan alli tucushpa, paicunapaj ucupi tucurcacuna. Chaimantapachami siriocunaca, amonitacunata ayudashpa israelcunahuan macanacunataca mancharcacuna.