1 TIMOTEO 5 - Quichua Chimborazo Bible

Shujtajcunapaj allita ruranami

1Yuyajcunataca ama sinchita rimangui, ashtahuanpish quiquin yayata shina yuyachishpa rimangui. Q'uipa huiñaicunatapish quiquin huauquicunata shina yuyachishpa rimangui.

2Yuyaj huarmicunataca, quiquin mamata shina, q'uipa huiñai huarmicunatapish, quiquin panicunata shina chuya yuyaihuan rimangui.

3Viudacunataca sapalla cajpitaj, ayudangui.

4Ashtahuanpish maijan viuda huahuacunata, nietocunata charijpica, paicunaraj quiquinpura cashcamanta, ayudanata yachachun. Paicunata huiñachishcamanta yaya mamaman tigrachij cachun yachachingui. Chashna rurachunmi Taita Diosca munan.

5Ashtahuanpish sapalla caj viudaca, tutapish, punllapish Diosta rogana, mañana yuyaillami causan.

6Maijan viudaca aichata cushichina yuyailla puricushpaca, huañushca shinallatajmi.

7Ama pi juchachishca cachun, caitapish mandangui.

8Maijanpish quiquinpurapaj, ashtahuantajca paipaj huasi familiapaj imallata rurana cashcata mana rurajca, crishcata saquishpa mana crijtapish yallimi tucushca.

9Viudacunapaj shutita churanapica sujta chunga yalli huatata charijllapi, shujlla cusapaj huarmi cashca cajllapi,

10allicunata rurashpa ricuchij cashca cajllapi, huahuacunatapish alli huiñachij cashca cajllapi, puzachij cashca cajllapi, jucha illajcunapaj chaquicunata maillaj cashca cajllapi, llaquihuan cajcunata ayudaj cashca cajllapi, tucui imatapish allicunata ruraj cashca cajllapimi churana.

11Viudacunapaj shuticunata churanapica, q'uipa huiñai viudacunapaj shuticunata churachunca ama saquingui. Paicunaca cazarana munaicuna atijpi Cristota p'iñashpa cazarasha ninllacunami.

12Chashna rurashpaca paicuna nishcata mana pajtachishcamantaca llaquimi tucuncuna.

13Shinallataj huasin huasin purishpami, q'uilla tucuncuna. Mana q'uillallapish tucuncunachu, ashtahuanpish parlaricujcuna, maipipish satirijllacuna, mana rimana cashcata rimajcunapishmi tucuncuna.

14Ashtahuanpish q'uipa huiñai viudacunaca cazarashpa, huahuacunata alli huiñachishpa, paipaj huasi familiata mandachunmi munani. P'iñajcuna juchachishpa cushicuna ama tucuchunmi chashnaca nini.

15Maijancunaca crishcata saquishpami, Satanasta ña caticuncuna.

16Maijan crij huauqui cashpa, pani cashpapish viudacunata charishpaca paicunallataj ima illashcata cuchun. Chashna rurajpimi, tandanacushca crijcunaca familiata mana charij viudacunapaj pajtata charingacuna.

17Tandanacushca crijcunata alli mandaj ancianocunaca, ishquiman cuna cashcata japichun. Ashtahuantajca huillana yuyailla, yachachina yuyailla cajcuna chashna japichun.

18Chaitami Quillcachishcapica: “Trillaj huagrataca, ama shimita huatangui” nin. Taita Diospajta rurajpish pai rurashcamantaca japinatajmi can.

19Shuj ancianota juchachijpi, ishqui cashpa, quimsa cashpa huillajcuna mana tiyajpica, ama chasquingui.

20Juchata rurashpa caticujllacunataca, caishujcunapish manchachun tucuicunapaj ñaupajpi sinchita rimai.

21Taita Diospaj, Mandaj Jesucristopaj, pai agllashca angelcunapaj ñaupajpimi, c'uyaihuan cantaca mingani. Pita ama llaquichishpa, shujllaman ama tucushpa caicunapi nishca shina rurangui.

22Manaraj alli ricushpaca, maijanpaj jahuapipish maquicunata ama utca churangui. Ñataj shujtajcunapaj juchacunapi chagruringuiman. Ashtahuanpish chuya catingui.

23Canca huijsa nanaihuan ungushcalla cashcamanta, yacullataca ama ubyangui, ashtahuanpish asha vinotapish ubyangui.

24Maijancunapaj juchacunaca, pi manaraj tapujpimi ricurin. Ashtahuanpish shujtajcunapajca, q'uipatami yacharin.

25Shinallatajmi allita rurashcacunapish ricurin. Shujtaj shina rurashcacunapish, mana pacalla saquiri tucunchu.