2 CRÓNICAS 28 - Quichua Chimborazo Bible

Judá llajtata Acaz mandashcami(2 R 16.1-20)

1Acazca, mandai callarinapajca ishqui chunga huatayujmi carca. Paica chunga sujta huatatami Jerusalenpi mandarca. Paica Mandaj Diospaj ñaupajpica, paipaj ñaupa yaya David shina ima pandata mana rurajca mana carcachu.

2Ashtahuanpish Israel llajtata jatun mandajcuna millaita rurashcallatatajmi rurarca. Shinallataj fierrota yacuyachishpami, Baal dioscunaman rijchajcunata rurachirca.

3Chai rurashcalla dioscunaman cushpami, Hinompaj churicunapaj pambapi inciensota rupachij carca. Israelcunata cai llajtapi churangapaj Mandaj Dios cai llajtamanta anchuchishca gentecuna millanana ruranacunata ruraj cashca shina rurashpami paicunapaj churita rurashcalla diosman cushpa rupachircacuna.

4Shinallataj Acazca lomacunapi tiyaj altarcunapipish, urcucunapipish, uchilla lomacunapi tiyaj altarcunapipish, tucui p'angasapa yura ucucunapi tiyaj altarcunapipishmi sacrificiota cushpa inciensotapish rupachirca.

5Chaimantami paita Mandaj Diosca, Siria llajtata jatun mandajpaj maquipi churarca. Siriocuna mishashpaca, Judá llajtapi causajcunataca achcacunatami Damasco puebloman prezu aparcacuna. Mandaj Diosllataj Israel llajtata jatun mandajpaj maquipipish churajpimi, israelcunapish Judá llajtapi causajcunahuan macanacushpaca achcacunata huañuchishpa misharcacuna.

6Remaliaspaj churi Peka soldadocarin, paipaj soldadocunahuanca shuj punllallapimi Judá llajtapi causajcunataca, 120.000 soldadocunata huañuchirca. Paicunapaj ñaupa yayacunata Mandaj Diosmanta anchurishcamantami, c'ari c'aricuna cajpipish, chai tucuita huañuchircacuna.

7Efraín llajtamanta caj Zicri soldadomi, jatun mandaj Acazpaj churi Maasiastapish, mandana huasita ricuj Azricam mandajtapish, jatun mandajpaj q'uipa tucui mandanata ricuj Elcanatapish huañuchirca.

8Chai tucuita huañuchishca jahuami, Israel soldadocunaca Judá llajtapi causajcunataca prezu aparcacuna. Chai apashcacunaca huarmicunandij, c'ari huahuacunandij, huarmi huahuacunandij tandachishpa yupajpica, 200.000mi carca. Shinallataj achca charinacunatapishmi Samaria puebloman aparcacuna.

9Chai Samaria pueblopica, profeta Obed runami causarca. Paimi Samaria puebloman tigracuj soldadocunahuan tupashpaca cashna nirca:

–Cancunapaj ñaupa yayacunata Mandaj Diosca p'iñarishpallami, Judá llajtapi causajcunataca, cancunapaj maquipi churashca. Chashna rurajpica cancunaca jahua pachaman chayajta yallitaj p'iñarishpamari, achcacunata huañuchishcanguichij.

10Chai jahuamari Judá llajtapi, Jerusalén pueblopi causajcunataca c'aricunatapish, huarmicunatapish cancunapajta rurachun apamushcanguichij. ¿Cancunaca manachari cancunata Mandaj Diostaca p'iñachircanguichigari?

11Chashna cashcamantaca, ñuca nishcata cazuichij, prezu apamushca cancunapaj quiquin huauquicunataca tigrachishpa cachaichij. Mandaj Diosca paicunata cashna llaquichishcamantaca, yallitajmari cancunahuanca p'iñarishca– nircami.

12Efraín llajta soldadocunata mandajcunaca: Johananpaj churi Azariaspish, Mesilemotpaj churi Berequiaspish, Salumpaj churi Ezequiaspish, Hadlaipaj churi Amasapishmi carca. Paicunami chai huillaj chashna nijpica, macanacuimanta tigraj soldadocunapaj ñaupajpi shayarishpaca,

13cashna nircacuna:

–Prezu apamushcacunataca, ama caiman yaicuchimuichijchu. Chashna rurashpaca, Mandaj Diospaj ñaupajpica, yallitaj millaita rurajcunamari ricurishun. Cancuna yuyacushcata rurashpaca tucui ñucanchijpaj juchacunatamari ashtahuan mirachinguichij. Diosca yallitajmari israelcunahuanca p'iñaringa– nircacunami.

14Chashna nijpica, soldadocunaca prezu apamushcacunataca cacharircacunami. Shinallataj paicunallatataj quichumushca charinacunatapish mandaj soldadocunapaj ñaupajpi, tucui caishujcunapaj ñaupajpimi tigrachircacuna.

15Chai q'uipaca, ña ñaupaman shuticunata huillashca mandajcunami prezu apamushcacunatapish, paicunallatataj quichumushca charinacunatapish tigrachircacuna. Paicunami chai apashcacunapurapi lluchulla cajcunamanca churanata churachircacuna. Pargate illajlla cajcunamanpish pargatetami churachircacuna. Shinallataj cararcacunapish, ubyachircacunapishmi, chugririshcacunatapish aceitehuan jambircacunami. Chashna rurashpaca, mana puri tucujcunatapish, burrocunapi tiyachishpami, palmera yuracuna tiyan pambapi caj Jericó pueblopi saquigrircacuna. Chaipimi chai prezu apashcacunataca, paicunapaj familiacunaman tigrachishpa saquircacuna. Chai q'uipami, Samariaman tigrarcacuna.

16Chai punllacunallatajmi jatun mandaj Acazca, Asiria llajtata jatun mandajcunapajmanca: “Ayudahuai” nichun nishpa maijancunata cacharca.

17Edom llajtapi causajcunami Judá llajtaman shamushpa paicunahuan cutin macanacushpa mishashca carca. Paicunapish taucacunatami prezu apashcacuna carca.

18Shinallataj filisteocunapish, Judá llajtapi caj Sefela pamba pueblocunapi causajcunatapish, Neguev llajtapi caj pueblocunapi causajcunatapishmi huañuchishcacuna carca. Chai pueblocunaca Bet-semes, Ajalón, Gederot shuti pueblocunami. Shinallataj Soco, Timna, Gimzo shuti pueblocunatapish muyundij llajtacunandijmi quichushcacuna carca. Chashna quichushpaca paicunami chai pueblocunapi causangapaj tiyarishcacuna carca.

19Israel llajtata jatun mandaj Acazca, paipaj shungu munashca shinataj millaita rurashpami, Mandaj Diostaca manataj cazushpa yallitaj p'iñachirca. Chaimantami Judá llajtapi causaj israelcunataca, chashna llaquichishpa cumurichirca.

20Asiria llajtata jatun mandaj Tiglat-pileserpish ayudanapaj randica, macanacushpa ashtahuan llaquichinamanmi shamurca.

21Acazca Mandaj Diospaj huasimantapish, mandana huasimantapish, mandajcunapaj huasicunamantapish achca valij charinacunata llujshichishpami, Asiria llajtata jatun mandajmanca curca. Chashna cujpipish, chai jatun mandajca mana ayudarcachu.

22Jatun mandaj Acazca, chashna llaquipi cashpapish ashtahuan millaita rurashpami, Mandaj Diostaca ashtahuan p'iñachirca.

23Paica llaquipi cashpaca, Damasco pueblopi causajcunapaj dioscunamanmi animalcunata cushpa huañuchirca. Chai diosllatajmi paita llaquipi churarca. Paica: “Chai dioscunaca chai llajtata jatun mandajcunataca ayudarcami. Ñucapish animalta cushpa huañuchisha, ñucatapish ayudahuangami” yuyashpami chashna rurarca. Ashtahuanpish chai dioscunata cungurishcamantami paillatajpish, tucui israelcunapish jatun llaqui tucurcacuna.

24Acazca, Diospaj huasipi tiyaj charinacunata tandachishpaca, tucuimi ñuturca. Diospaj huasi pungucunatapish ña mana ashtahuan pi yaicuchun huichcarcami. Chashna rurashpaca, Jerusalén pueblo tucui esquinacunapimi shujtaj altarcunata rurachirca.

25Judá llajtapi caj tucui caishuj pueblocunapipishmi, shujtajcunapaj dioscunaman inciensota cushpa rupachingapaj altarcunata rurachirca. Chashna rurashpami paipaj ñaupa yayacunata Mandaj Diostaca yallitaj p'iñachirca.

26Paipaj causaipi ashtahuan imallata rurashcataca Judá llajtata jatun mandajcuna imallata rurashcata, Israel llajtata jatun mandajcuna imallata rurashcata quillcashca libropimi ricuna.

27Acaz huañushpa paipaj ñaupa yayacunahuan dormijpica, Jerusalén pueblollapitajmi pambarcacuna. Shina cashpapish, Israel llajtata jatun mandajcunata pambashcapica, mana pambarcacunachu. Paipaj randica paipaj churi Ezequiasmi mandarca.