COLOSENSES 2 - Quichua Chimborazo Bible

1Cancunamanta jatun macanacuita ñuca charishcata yachachunmi munani. Laodiceapi cajcunamantapish, ñahui ñahui ñucata mana ricuj tucuicunamantapishmi macanacucuni.

2Paicunapaj shungucunapi cushicuchun, c'uyaipi shujlla cashpa alli entendij canata charij canaman chayachunmi macanacucuni. Chashna cashpami Dios Yayamanta, pi mana yachashca pacalla cajca Cristo cashcata alli yachangacuna.

3Yachaisapa canahuan, yuyaisapa canahuan charij canaca Cristopimi pacashca tiyacun.

4Caitaca catinanqui shimicunahuan huillaj tucushpa cancunata pipish ama umachunmi chashnaca nini.

5Cuerpondij cancunahuan mana cashpapish, espiritupica cancunahuanmi cani. Cristota crishcapica mana maipish cachun, alli sinchitaj cajta ricushpami yallitaj cushicuni.

6Chaimanta ima shinami Mandaj Jesucristota chasquircanguichij, chai shinallataj paihuan shuj shinalla purichij.

7Cristopi sapiyachishca, paipaj jahuapi huasichicuncunami canguichij. Ima shina yachachishca cashca shinallataj, crinapi sinchi caichij, Diosta pagui nicujllacuna caichij.

Cristohuan shujlla cajcunaca mushuj causaihuan jundami nishcami

8Riquichij yanga yachaicunahuan, ñaupamanta runacuna apamushca chushaj yuyaicunahuan, manapish Cristopaj caj, cai pacha yuyaicunahuanca pipish cancunataca ama umachun.

9Dios tucui ima shina cashcaca, Cristopaj cuerpopimi causan.

10Cancunapish Cristohuan shujlla cashcamantaca, tucui pai ima shina cashcatami charinguichij. Paica tucui punta mandajcunapaj, poderyujcunapaj umami.

11Cancunaca paipimi circuncisionta rurashcacuna canguichij. Chai circuncisionca mana runacunapaj maquihuan rurashcachu. Ashtahuanpish Cristollatajmi circuncisionta rurarca. Chaimantami cancunapaj juchata ruranamantaca anchuchishcacuna canguichij.

12Cancunaca Cristopaj bautizmopimi, paihuan pambashca carcanguichij. Huañushcacunapaj chaupimanta Diospaj poderhuan causachishcata crishcamantami, paihuan causarircanguichij.

13Cancunaca juchamantapish, aichapi mana circuncisionta rurachishcamantapish huañushcami carcanguichij. Chashna cajpipish, tucui juchacunata perdonashpami, Cristohuan shujllata rurashpa causachirca.

14Quillcashca mandashcatami ñucanchijca mana pajtachi tucurcanchij. Chaimantami debe cajpi quillcashca tiyacujta Cristota cruzpi clavashpa ñucanchij debetaca anchuchirca.

15Cristota cruzpi chacatashpa, tucuita mishashpami punta mandajcunatapish, mandanata charijcunatapish anchuchishpa tucuicunata paipaj ñaupajpi cumurichirca.

16Chaimanta cancunataca ima micunamanta, ima ubyanamanta, fiesta punllacunamanta, llullu luna punllacunamanta, samana punllacunamantapish pi ama imata nishpa juchachichun.

17Tucui chaicunaca, shamuna cashcata ricuchij llandumi. Ashtahuanpish chai shamujca Cristomi.

18Mana jatun tucushca shinalla, angelcunata adorajcuna shina tucushpa cancuna japina cashcata ñataj pi umashpa quichunman. (Paicunaca manapish ricushpami muscuipi shina ricunchij nishpa) quiquin yuyaillamanta surcushpa jatun tucuncuna.

19Paicunaca uma caj Cristohuanca mana shuj shinalla canchu. Ashtahuanpish Cristomari paipi cajcunataca mucucunahuan, angucunahuan shujllata rurashpa, carashpa, sinchiyachishpa, Dios cushcahuan huiñachicun.

20Cai pacha millai ruraicunata ama rurangapajca Cristohuan huañushcami canguichij. Chashna cashca jahuaca ¿ima nishpataj cai pachapaj cajcuna shinallataj chai mandashcacunata cazunguichij?

21“Ama japingui” “Ama micungui” “Ama tuparingui” nishcacunataca ¿ima nishpataj cazucunguichijraj?

22Chai mandashcacuna, yachachishcacunaca runacunallamantami, micujpi, ubyajpica tucurijllacunamantami yachachin.

23Chaicunaca yachajtajlla cangapaj, Diosta yuyaricujtajlla cangapaj, mana jatun tucushcatajlla cangapajca alli shinatajmari yuyachin. Chashna cashcamanta cuerpota llaquichirinapajllami. Ashtahuanpish aicha munaitaca mana jarcai tucunchu.