EFESIOS 1 - Quichua Chimborazo Bible

Allillachu canguichij nishcami

1Taita Dios munashcamanta Jesucristopaj apóstol Pablomi cani. Cristo Jesushuan shujlla tucushpa, Éfeso pueblopi alli caticuj jucha illajcunahuanca:

2Dios ñucanchij Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninimi.

Cristomantami jahua pachapi tiyaj allicunata cushca

3Ñucanchijta Mandaj Jesucristopaj Yaya Diostaca, alli nishca cachun.

Cristomantami jahua pacha llajtacunapi tiyaj allicunata ñucanchijmanca cushca.

4Cai pachata manaraj rurashpami, Cristohuan shujlla tucushpa, paipaj ñaupajpi jucha illaj, mapa illajcuna cachun ñucanchijtaca ña agllarca.

5Pai c'uyashcamantami Jesucristohuan shujlla tucujpi ñucanchijtaca, paipaj huahuacunata rurangapaj, pai munashca shinallataj ñaupaman agllarca.

6Paipaj sumaj mana c'uyaipajta c'uyaj cashcata alabachunmi, paipaj c'uyashca Churimanta ñucanchijtaca chasquirca.

7Diosca, mana c'uyaipajta c'uyaj canata charij cashcahuanmi, juchacunata perdonashpa, Cristopaj yahuarhuan cutin randishpa quishpichirca.

8Chai jahuami, ñucanchijmanca tucui yachaisapa canata, yuyaisapa canatapish yallitaj curca.

9Alli yuyarishca pi mana yachashca pai munashca shina rurasha nicushcataca ñucanchijmanmi ricuchirca.

Chaitaca ñaupamanmi paillataj rurasha nishca carca.

10Pai yuyarishca punllacuna pajtajpimi, jahua pachacunapi cajcunata, cai pachapi cajcunata, tucui ima tiyajta tandachishpa Cristopaj ucupi churanga.

11Ñaupaman agllashca cashcamantami, Cristomantaca japina cashcata charircanchij.

Tucui imatapish rurajca, pai munashpa yuyarishca shinallatajmi pajtachicun.

12Ñucanchijraj Cristota shuyacujcuna cashca cajpimi, pai sumaj cashcata alabachun chashna agllarca.

13Cancunapish chai Jesusllatataj crishpa quishpirichunmi, mana llulla alli huillaitaca huillarcanchij.

Chaita uyashpa crincami, Diosca pai cusha nishca jucha illaj Espirituhuan sellarca.

14Tucuimanta quishpichishpa pushajpi ñucanchij japina cashcata japingacama ricuchij cachunmi, chai Espiritutaca churarca.

Pai sumaj cashcata alabachunmi chashna rurarca.

Yachaisapa yuyaita cuchun Diosta mañashcami

15Mandaj Jesusta crishcamanta cancunaca, jucha illaj tucuicunata c'uyacun nijta uyashpami ñucapish,

16cancunamantaca Taita Diosta pagui ninata mana shaicuni. Diosta mañacushpaca cancunata mana cungashpami,

17ñucanchijta Mandaj Jesucristopaj sumaj Yaya Diosca, yachaisapa cana yuyaiyujta rurashpa, paimanta ashtahuan alli yachajta rurachun mañacuni.

18Pai Diosca, cancunapaj yuyaipaj ñahuita achijyachishca cachunmi mañacuni. Chashna achijyachijpimi, cancunaca imata shuyanapaj cayashca cashcata, jucha illajcunahuan achcata charina sumaj herenciapish ima cashcata yachanguichij.

19Shinallataj mana ch'imbapuraipaj paipaj jatun poderta ñucanchij crijcunaman cushcaca, tucui imatapish rurai tucuj poder cashcata ricuchichunmi mañacuni.

20Cristotaca huañushcacunapaj chaupimanta causachishpami, jahua pacha paipaj alli ladoman tiyachishpa, chai poderyuj cashcataca ricuchirca.

21Poderyujcunapaj, mandanata charijcunapaj, poderhuan mandajcunapaj, tucui laya shutichishcacunapaj jahuapipishmi paica mandacun. Mana cunan punllacunallapichu, ashtahuanpish q'uipa punllacunapipishmi mandanga.

22Shinallataj tucui imatapish Cristo cazuchichunmi, paipaj chaquicuna ucupi churarca. Tandanacushca crijcunapajpish uma cachunmi, paillatataj churarca.

23Crijcunaca paipaj cuerpomi, paillatajmi tucuicunapi yallijta jundan.