JEREMÍAS 31 - Quichua Chimborazo Bible

Israelcuna q'uipa punllacunapi cutin quiquin llajtapi causanamanta

1Mandaj Diosca cashnami nin: “Chai punllacunapica tucui Israel aillucunapaj Diosmi casha. Paicunaca ñucapajlla runacunami canga.

2Israelcunaca espadamanta quishpirishpami, samarinata mashcashpa tigracurcacuna. Shitashca pambata chashna puricujpimi, ñucaca llaquircani” ninmi Mandaj Diosca.

3Mandaj Diosca achca huatacuna sirijpirajmi, ñucaman ricurishpa cashna nirca: “Ñucaca can israelcunataca huiñaita mana tucurij c'uyaihuanmi c'uyani. Chaimanta cancunataca llaquicunillami.

4Israelcunalla, cancunaca ñuca cutin llajtata rurashpa shayachijpimi, llajta tucunguichij. Cancunapajca sumajta allichirishpa, panderocunapi huajtashpa cushicuihuan tushuna punlla cutin tiyangamari.

5Samarina urcucunapipish uvata cutin tarpunguichijmi. Sumaj chagracunata rurashpami, chaipi p'ucushcata micushpa cushicunguichij.

6Shuj punllaca pueblota cuidajcunaca Efraín urcumantami: Tucuicuna tandanacushpa jacuchij, ñucanchijta Mandaj Diospajman Sión urcuman huichiyashunchij nishpa caparingacuna” ninmi.

7Mandaj Diosca cashnami nin: “Jacobopaj huahuacunamanta jatunta cushicuichij. Tucui llajtacunapaj uma caj llajtataca jatun cushicuihuan cantaichij. Tucuicuna alabashpa uyarichigari: Mandaj Dioslla, can agllashcacunamanta causaihuan saquirishca israelcunata quishpichishcanguimari nichigari.

8Ñucami paicunataca janaj llajtamanta tigrachimusha, tucui cai pacha llajtacunamantami tandachimusha. Ñahui mana ricujcunatapish, patojocunatapish, chichu huarmicunatapish, llullu huahuayujcunatapish tucuicunatamari tandallata caiman tigrachimunga.

9Caimantaca huacashpami, llujshishpa ringacuna. Shina cajpipish, ñucaca jatun c'uyaihuanmi tigrachimusha. Sumaj yacu tiyan pugrucunatami purichisha. Ima ñitcarina illaj sumaj ñanpimi churasha. Ñucamari israelcunapajca yaya cani, Efrainca ñuca punta churimari” ninmi.

10Tucui llajtacunapi causajcuna, Mandaj Dios rimashcata uyaichij. Caitaca mama cucha uripi caj ashtahuan caru llajtacunapipish cashna huillaichigari: Israelcunata llujshichishpa caita, chaita cachajca cutin tandachingami. Chashna tandachishpaca shuj michij paipaj canlla ovejacunata cuidaj shinamari huaquichinga nichigari.

11Mandaj Diosmari Jacobopaj huahuacunataca quishpichirca. Paicunata yalli c'ari c'aripaj maquimantamari randirca.

12“Paicuna tigramushpaca, jatun cushicuihuan cantashpamari, Sión urcuman huichiyangacuna. Mandaj Dios cushca allicunata chasquingapajmi, callpashpa shamungacuna. Pai cushca tucui laya sumaj micunahuan, vinohuan, aceitehuan, ovejacunahuan, huagracunahuanmi cushicungacuna. Punllanta yacuta regashca huerta shina cushijllatami causangacuna. Manataj cutinca ima llaquita charingacunachu.

13Chaipitajca solteracunaca cushicushpa tushungami. Mosocunapish, yuyajcunapish chashnallatajmi cushicunga. Paicuna huacacushcataca asinamanmi tigrachisha. Jatun nanaihuan causacushcamanta samachishpa cushichishami.

14Curacunatapish, ashtahuan sumaj micunacunata cushpami cushichisha. Tucui ñuca agllashcacunapish alli micuchunmi, tucui laya allicunata cusha” ninmi Mandaj Diosca.

15Mandaj Diosca cashnapishmi nin: “Ramá shuti pueblopica, sinchita caparishpa aij nishpa huacashca uyarinmi. Raquel huarmimari paipaj huahuacuna huañushcamanta huacacun. Ama yalli huacaichu nijpipish, huahuacuna huañushcamantaca manataj upallanchu” ninmi.

16Mandaj Diosllatajmi paitaca cashna nin: “Ña ama ashtahuan huacaichu. Cambaj ñahuimanta huiquita p'icharilla. Can llaquita apashcamantaca, allita cushami. P'iñajcunapaj llajtamantaca tigramungacunami” ninmi Mandaj Diosca.

17Mandaj Diosca cashnapishmi nin: “Cambajca q'uipa punllacuna cushicuna tiyangami. Cambaj huahuacunaca quiquin llajtaman tigramungami.

18Efraín huacashpa cashna caparijtami uyani: Canmari ñucataca macashpa huanachihuangui. Quita huagra shina cashcamantamari cambaj maquita aparini. Cutin cambajman tigrachihuayari, ñucaca cambajman tigrarishallamari. Canmari ñucata Mandaj Dios cangui.

19Canmanta anchurishca cashpapish, cunanca llaquirinimi. Ñucallataj mana allita rurashcata cunan yuyaita japishpamari, ñuca changata chugrichirini. Manataj cungaripaj, yallitaj pingai tucunica. Huambraraj cashpa juchata rurashcamantamari cashna pingai tucuni ninmi.

20Efrainca mana ñuca c'uyashca huahua cajpichu, mana ñuca cushicuna huahua cajpichu mana llaquishari. Paimanta rimashpaca, paitaca punllanta yuyaricunillami. Ñuca paita yuyarishpaca, shungumantami llaquirini. Paitaca llaquishatajmi.

21Can maita rishca ñantaca, jatun rumicunata churashpa ringui. Maillata rishca ñantaca yuyaipi cangui. Israel huarmilla, can maita rishca ñanllatatajmi cambaj cashca cai pueblomanca tigrangui.

22Sinchi shungu huarmilla, ¿ima horascamachari chashna uri huichi puricunguilla? Mandaj Diosca cai llajtapica mushujtamari ruragrin. Huarmica cusapaj c'uchupimi canga” ninmi.

23Tucuita Mandaj, israelcunapaj Diostajmi cashna nin: “Prezu apashcacunataca ñuca tigrachimujpi, cai Judá llajta quiquin pueblocunapi cashpaca: Cashcata ruraj causana pueblolla, Diospajlla ch'icanchishca urculla, cantaca Mandaj Dios bendiciashca cachun ningacunami.

24Judami chai pueblopica canga, tucui caishuj pueblocunapipish tarpujcuna, michijcunami causanga.

25Shaicushcacunamanca tucui ima illashcatami cusha. Yaricaihuan urmacujcunamanca huijsa pajtajtami carasha” nircami.

26Chashna nijta uyashpaca, rijcharishpa ñahuita pascarcanillami. Chashna muscushcamantaca, cushicurcanimi.

Mandaj Diosca israelcunahuanca mushuj ruranata ari ninacushami nishcamanta

27Mandaj Diosca cashnami nin: “Shamuj punllacunapica Israel llajtapipish, Judá llajtapipish runacunata, animalcunata mirachishpa jundachishami.

28Ñucaca paicunataca sapimanta aisashpa shitanata, tucui urmachinata, jatun llaquita ruranata, tucui ima tiyajta chingachinata huanachinata yuyarishpaca, rurangacama chai yuyaimi carcani. Q'uipataca, chai shinallataj chai yuyaimi cutin tigra shayachimushpa tarpusha.

29Chai punllacunapica: Yayacuna jayaj uvata micushcamantami, huahuacunaca quiru ungüihuan canchij nishpaca, ña mana ningacunachu.

30Ashtahuanpish juchata rurajca, paillatajmi chai juchamantaca huañunga. Maijanpish jayaj uvata micujpica, paillatatajmi quiru nanai japinga” ninmi.

31Mandaj Diosca cashnami nin: “Shamuj punllacunapica israelcunahuanpish, Judá runacunahuanpish mushuj ruranatami ari ninacushun.

32Paicunapaj yayacunahuan ari ninacushcata shinaca mana rurashachu. Paicunahuanca maquimanta aisashpa Egipto llajtamanta llujshichimucushpami, ari ninacurcanchij. Paicunami ñucahuan chaipi ari ninacushcataca p'aquircacuna. Ñuca paicunapaj cusa cajpipish, mana cazurcacunachu” ninmi Mandaj Diosca.

33Mandaj Diosca cashnapishmi nin: “Shamuj punllacunapica israelcunahuan ari ninacushpaca, cashnami rurasha: Ñuca mandashcataca paicunapaj yuyaipi churashami, paicunapaj shungupi quillcashami. Chashna rurashpaca ñucaca paicunapaj Diosmari casha, paicunapish ñucapajllamari canga.

34Chaipica c'uchullapi causajcunapurapish, huauquindijpurapish: Mandaj Diosta rijsi nishpa yachachinacuna mana cangachu. Ñucataca uchillamantapacha jatuncunacama, tucuicunami rijsingacuna. Ñucallatajmari paicunapaj tucui juchacunata perdonasha. Paicuna mana allita rurashcataca, manataj cutinca yuyarishachu” ninmi Mandaj Diosca.

35Mandaj Diosca punllata achijyachichun intita churajmi, tutaca achijyachichun lunata, luzerocunata mandajmi, mama cucha yacucunata jatarichishpa manchanayajta huajiachijmi. Paica tucuita Mandaj shutimari. Paica cashnamari nin:

36“Ñuca tucui chaicunata mandashca ñuca ñaupajpi imapish tucujpica, israelcunatapish ama huiñaita ñucapaj cachun saquishachari.

37Maijanpish jahua pachata medi tucujpi, cai pachatapish ucuman maicama cashcata medi tucujpica, ñucapish israelcunataca paicuna juchata rurashcamanta shitashachari” ninmi Mandaj Diosca.

38Mandaj Diosca caitapishmi nin: “Shamuj punllacunapica Jerusalén puebloca Hananeel shuti torremantapacha, esquinapi caj pungucama ñucapajmi shayachishca canga.

39Chai pungumantapacha Gareb shuti lomacama cordelta chutashpami, medishca canga. Chai lomamantami Goa shuti pambaman muyunga.

40Shinallataj huañushca aichacunata pambana, ushpata shitana pugru pambapish, chai tucui lado pambapish cedrón shuti huaicucama, inti llujshin ladoman caj caballocuna yaicuna pungucamami ñuca, Mandaj Diospajlla ch'icanchishca pueblo tucunga. Chaimanta cai pueblopi causajcunaca, ña mana llujshichishpa cachashca cangacunachu, cutinca mana urmachishca cangachu” ninmi.