EZEQUIEL 24 - Quichua Chimborazo Bible

T'imbucuj mangamanta yuyachishpa parlashcami

1Iscun huata chunga quillapaj chunga punllapimi, Mandaj Diosca ñucataca cashna nirca:

2“Huañujlla aichayuj runalla, cunan ima punllapi cashcata quillcai. Cunan punllallatajmi Babilonia llajtata jatun mandajca, Jerusalenta llaquichijcunataca muyundijta churan.

3Chai mana cazuj ch'ahuan runacunamanca, yuyachij parlohuan cashna rimai: Mandaj Jatun Diosca cashnami nin: Tullpapi mangata tiyachishpa yacuta churangui.

4Shinallataj chai mangapica, changa aichatapish, huasha lomo aichatapish churangui. Tullucunatapish allicunallata agllashpa, chai mangallapitaj jundachingui.

5Chashna yanungapajca, alli ovejata agllashpa japingui. Mangapi mana churashca tullucunataca rupachingui. Chai mangapi churashca aichatapish, tullucunatapish apiyajta yanungui ninmi.

6Mandaj Jatun Diosca cashnapishmi nin: Huañuchijcuna causan pueblolla, ¡aij imachari tucungui! Cai puebloca fierro ishpashca manga shinamari tucushca, chaitaca mana anchuchi tucuipajmari. Ama suerteta rurashpa, mirga mirga aichacunata chai mangamantaca llujshichilla.

7Cai puebloca yahuarhuan jundamari. Chai yahuartaca lluchujlla rumipimari jichashcacuna. Chai yahuartaca ñutu allpa tapachunllapish, manamari allpa jahuapi jichashcachu.

8Chai yahuarta jichashcata ricushpa, jatunta p'iñarishpa llaquichingapajmi ama chingarichun, chai sinchi rumi jahuapi churarcani” ninmi.

9Mandaj Jatun Diosca cashnapishmi nirca: “Huañuchijcuna causan pueblolla, ¡aij imachari tucungui! Ñucapish cantaca ninata lunyachishpami rupachisha.

10Achca yantata churashpa ninata lunyachishpami, chai aichataca apiyajta yanushpa salsata rurasha. Shinallataj tullucunatapish tucuimi rupachisha.

11Chai chushajlla mangataca, rupacuj nina jahuapimi tiyachisha. Chaipimi chai mangapi tiyaj mapapish fierro ishpashcapish tucui rupashpa chingaringa.

12Fierro ishpashcata llujshichisha nishpa yangallamari shaicurca, chaica manataj llujshircachu. Ninapi rupachijllapimi, tucui rupashpa chingaringa.

13Jerusalén pueblolla, canca huainayana munailla causashcamantaca llaquitaca apanami cangui. Cambaj mapata ñuca p'iñajpipish, chai millaita ruranataca manataj saquisha nircanguichu. Ñuca ashtahuan p'iñarishpa llaquichingacama manataj mapa illaj canguichu.

14Mandaj Dios ñuca nishcataca pajtachishatajmi. Chai llaquica shamungatajmi. Mana cutirishachu, mana llaquirishachu. Can imallata rurashpa causashca shinallatajmi ricushpa llaquichingacuna” ninmi Mandaj Jatun Diosca.

Ezequielpaj huarmi huañushcamanta

15Mandaj Diosca ñucamanca cashnami nirca:

16“Huañujlla aichayuj runalla, cambaj c'uyashca huarmitaca, ñapish cungaillapimi huañuchisha. Paimantaca ama yupashpa yupashpa huacanguichu, ama huiquita shutuchinguichu.

17Allijlla shungu llujshinguilla, huañushcamanta churarina churanatapish ama churaringuichu. Ashtahuanpish umapica turbanteta churaringuilla, chaquipica zapatocunata churaringuilla, ñahuitapish ama pillurishca churanahuan taparinguichu, huañuipi yanushca micunatapish ama micunguichu” nircami.

18Chaitami tutamantamanca tucuicunaman huillarcani, ñapish chishipajca ñuca huarmica huañurcallami. Cayandij tutamantataca, Mandaj Dios mandashca shinallatajmi rurarcani.

19Chaita ricushpami tucui runacunaca: Can imalla rurashcacunaca ñucanchijpajca, imata ricuchij cashcataca ¿manachu huillangui? nishpami tapurcacuna.

20Shina nijpimi ñucaca Mandaj Diosmi paipaj shimihuantaj cashna nirca:

21“Tucui israelcunata cashna ningui: Mandaj Jatun Diosca cashnami nin: Riquichij, sumaj cashcata ricuchij ñucapajlla huasitaca chingachishami. Chai huasitaca sumaj cajllapimi, cancunaca ricunata munarcanguichij. Ñuca huasitaca sumaj cashcallamantami munanguichij. Shinallataj cancuna saquishca cancunapaj churicunapish, ushushicunapish espadapimi huañungacuna.

22Shinallataj cancunapish ñuca imalla rurashca shina ruraichij. Ama cancunapaj ñahuita pillurishca churanahuan taparichijchu. Huañuipi yanushca micunatapish ama micunguichijchu.

23Umapica turbanteta, chaquicunapica zapatocunata churaringuichijlla, ama yupashpa yupashpa huacanguichijchu. Ashtahuanpish cancunaca millaita rurashcamantami, chingarina canguichij. Shinallataj caishuj chaishujmi huacanguichij.

24Cancunamanca Ezequielmi imatapish rurashpa ricuchinga. Pai imalla rurashcatami cancunapish rurana canguichij. Chashna tucujpimi ñucataca, Mandaj Jatun Diostaj cashcata yachanguichij ningui” nircami.

25“Huañujlla aichayuj runalla, israelcuna paca tucuna ñuca huasitaca urmachishatajmi. Paicunaca ñuca huasi sumaj cajllapimi cushicuncuna, chaillamantami ricunatapish munancuna. Ñuca huasitaca, sumaj cashcallamantami munancuna. Paicunapaj churicunatapish, ushushicunatapish chingachishami.

26Chashna llaquichicui punllallatajmi, huañunamanta quishpirishpa shujca, ima tucushcata canman huillanaman shamunga.

27Chai punllallatajmi, huañunamanta quishpirishpa shamuj runahuanca rimangui. Chaimantaca ña mana ashtahuan upa tucunguichu. Canmi paicunamanca imatapish ricuchijca cangui. Chaimantami ñucataca, Mandaj Diostaj cashcata yachangacuna” nircami.