1Ñucaca: “Ñuca c'alluhuan ama juchallingapajca, alli yuyaihuan causanatami yachasha.
Ñuca shimipi frenota churashpami jarcarisha.
Diosta mana rijsijcuna ñuca ñaupajpi cajpimi chashna rurasha” nircanimi.
2Ñucaca shimi mana llujshij shina tucushpami upajlla saquirircani.
Allita rimana cajpipish mana shimi llujshircanichu.
Ashtahuanpish ñuca nanaica
ashtahuanmi anchayarca.
3Ñuca shunguca, ñuca ucupica ruparircami.
Ñuca yuyarinapica, ninami japirirca.
Chaimi ñuca c'alluhuanca
cashna nircani:
4“Mandaj Dioslla, ñuca causai
tucurinata huillahuayari.
Mai punllacunacama causanata
huillahuayari.
Ñuca ñalla tucurinata yachasha ninica.
5Ñuca causana punllacunataca utca tucurinallatamari curcangui.
Ñuca causaica quiquinpaj ñaupajpica ima mana canchu.
Tucui runacunapaj causaica samaita aisana shinallamari. Selah
6Alli ricujpica, runapaj causaica llandu
shinallami.
Imata chai yuyai rurashcapish yangallami.
Charinacunataca montonanllami.
Pi japina cashcatapish mana
yachanchu.
7Cunanca Jatun Dioslla,
¿imatataj shuyashari?
Quiquinllapimi ñuca shunguta churani.
8Juchata ruranamantaca llujshichihuayari. Ñucataca yuyai illajcuna chanzata rurana tucuchunca ama saquihuaichu.
9Quiquinllataj rurasha nishcamanta ruracujpica,
imata mana rimashpa, mana rimaj runa shina upajlla saquirircanillami.
10Quiquin llaquichicushcataca ñucamanta anchuchihuayari.
Quiquinpaj maquihuan huajtashcamantaca
tucuricunimari.
11Runa juchallishcamantaca
llaquichishpami allichingui.
Pai yallitaj c'uyacushcataca polilla shinami tucuchingui.
Runapaj causaica samai aisai shinallami. Selah
12Mandaj Dioslla, ñuca mañashcata
uyahuayari.
Ñuca caparishcata uyahuayari.
Huacacujta ricushca jahuaca,
ama upajlla saquiripaichu.
Quiquinpajca shujtaj llajtamanta pasacuj shinallami cani.
Ñuca ñaupa yayacuna shinallataj
pasacujllami cani.
13Cai pachamanta manaraj rishpa, manaraj chingarishpa ñuca ashahuan fuerzata japingapaj saquihuayari”.
Who We AreWhat We EelieveWhat We Do
2025 by iamachristian.org,Inc All rights reserved.
