ÉXODO 28 - Quichua Chimborazo Bible

Curacunapaj churanacunata rurachun mandashcami(Ex 39.1-31)

1Cambaj huauqui Aarontaca paipaj churicuna Nadab, Abiú, Eleazar, Itamarndij cambaj ñaupajman cayai. Tucui israelcunamantaca paicunami ñucapaj curacuna canga.

2Cambaj huauqui Aaronpajca sumaj alli ricurichun curacuna cashpa churana sumaj churanata rurachi.

3Aaronpaj churanacunata rurachunca yachaisapa espirituta ñuca jundachishca yachaisapa shungu runacunahuan rimai. Chashna rurajpimi Aarontaca ñucapajta ruraj cura cachun ch'icanchisha.

4Chai churanacunataca: Pectoralta, efodta, jahuamanta ucu chaquicama churarina capata, sumajta bordashca tunicata, umapi churarina mitrata, chumbillirinatapishmi rurachina cangui. Cambaj huauqui Aaronpaj, paipaj churicunapajca curacuna cashpa churarinacunataca chaicunatami rurachina cangui.

5Chai churanacunata rurajcunaca, curita, azul, morado, amsa puca puchcata, caupushca lino puchcata japishpa rurachuncuna.

6Curi Efodta rurachun. Chaitaca azul, morado, amsa puca puchcahuan, caupushca lino puchcahuan ahuashpa sumajta bordashpa rurachuncuna.

7Ishqui mirga linsocunahuanca, ishqui lado rigra jahuata churashpa huasha ladohuan ñaupaj ladohuan tandachinallata saquichun.

8Efod jahuata chumbillirinatapish bordashcayujta ahuashca cachun. Chaica efodhuan shujllata rurashca cachun. Chaica curihuan, azul, morado, amsa puca puchcahuan, caupushca lino puchcahuan rurashca cachun.

9Ónice nishca ishqui rumicunata japishpa, chaipica yaya Israelpaj chunga ishqui churicunapaj shuticunata quillcangui.

10Sujta churicunapaj shuticunataca shuj rumipi, caishuj sujtapaj shuticunataca caishuj rumipi quillcashca cachun. Punta huacharishca churimanta callarishpa, tucuicunapaj q'uipa huacharishca churipaj shuticama quillcashca cachun.

11Yaya Israelpaj churicunapaj shuticunataca rumipi quillcanata yachajman ishqui rumipi quillcachingui. Chaica sellanapi quillcashca shina saquirichun. Chai rumicunataca canichishpa churanapaj curimanta rurashcapi muyundijta churangui.

12Chai rumicunataca israelcuna yuyarina cachun, efod churana ishqui lado rigra jahuapi sirashpa churangui. Aarón ñuca ñaupajpi cajpipish paipaj ishqui lado rigracunapi chai shuticunata ricushpami israelcunataca yuyarisha.

13Chai rumicuna muyundijtaca curimanta rurashcahuan muyundijta canichishpa churangui.

14Alli curillamantataj ishqui ch'imbata rurashpa, chai ch'imbashcahuanca canichishca jahuata pilluchingui.

15Ñuca rurachun nicushcata mana rurachun nicushcata yachangapaj tapuna pectoraltapish curi efodta rurashca shinallataj azul, morado, amsa puca puchcacunahuan, caupushca lino puchcahuan sumaj ricunacunayujta ahuangui.

16Chai pectoralca racuta ahuashca sunimanca ishqui chunga ishqui centímetro chaupihuan, anchomanpish ishqui chunga ishqui centímetro chaupihuan cachun. Chuscundij lado chai medidallataj cachun.

17Chaipica valij chuscu fila rumicunata jundachingui. Punta filapica shujca sárdica, caishujca topacio, chaishujca carbunclo cachun.

18Ishqui filapica shujca esmeralda, caishujca zafiro, chaishujca diamante cachun.

19Quimsa filapica shujca jacinto, caishujca ágata, chaishujca amatista cachun.

20Chuscu filapica shujca berilo, caishujca ónice, chaishujca jaspe cachun. Chai tucui rumicuna muyundijtaca curimanta rurashcahuan canichishpa churashca cachun.

21Yaya Israelpaj chunga ishqui churicunapaj shuticuna cashca shinallataj chai rumicunapish chunga ishqui cachun. Chai rumicunapica chunga ishqui aillucunapaj shuticunataca cada rumipi cada aillupaj shuticunata sellanapi quillcashca shina cachun.

22Pectoralpajca ashtahuan alli curita caupushpa ch'imbashcatajllata rurangui.

23Curi ishqui argollacunata rurashpa chaicunataca pectoralpaj jahua lado ishqui esquinacunapi churangui.

24Chai curi ch'imbatajllacunataca, chai pectoralpaj ishqui esquinacunapi churashca ishqui curi argollacunapi huatangui.

25Chai ch'imbatajllacunapaj caishuj ishqui puntacunataca, efod churana ishqui rigra jahua ñaupaj ladoman churashca curi huatucunapi alli huatashca cachun.

26Shujtaj ishqui curi argollacunatapish rurashpa, chaicunaca pectoralpaj ucu lado ishqui esquinacunapi churanapaj cachun.

27Shujtaj ishqui curi argollacunatapish rurashpa efod churana jahuapi ñaupaj ladoman churangui. Chai efod churanapica chumbillishca jahua lado sirashca filo janaj ladollapi churangui.

28Chashna rurashpaca pectoralpi churashca argollacunahuan efod churanapi churashca argollacunahuanmi tandachishpa moradojlla puchcacunahuan huatana cangui. Chashna rurajpimi, pectoralca efodmanta mana ch'icanyarishpa chumbillishca jahuanijllapitaj tiyanga.

29Chashna cashpami Aaronca Yaya Israelpaj chunga ishqui churicunapaj shuticunata ñuca rurachun nicushcata mana rurachun nicushcata yachangapaj, tapuna rumicunata pectoralpi paipaj shungu jahuapi aparishca Diospajlla ch'icanchishca ucuman yaicunga. Tucui israelcunata Mandaj Dios yuyaricuchunllami chashna canga.

30Ñuca imata rurachun nicushcata mana rurachun nicushcata yachangapaj tapuna Urim nishca, Tumim nishca rumicunataca pecho jahuapi aparina pectoralpi churangui. Mandaj Diospaj ñaupajman Aarón yaicujpica, Mandaj Dios rurachun nishcata mana rurachun nishcata tapuna rumica Aaronpaj shungu jahuapimi Mandaj Diospajman yaicunga. Chashnami Aaronca Mandaj Dios rurachun nicushcata mana rurachun nicushcata tapuna rumicunata paipaj shungu jahuapi aparishca Mandaj Diospaj ñaupajpi puringa.

31Efod ucuta churarina churanataca azulta rurangui.

32Chaupipi jutcushpa chai jutcu muyundij ama lliquirichun chai muyundijtaca racuta ahuangui.

33Ucu lado filo muyundijtaca azul, morado, amsa puca puchcacunahuan granadacunatajllata rurashpa huarcungui. Uchilla curi campanacunatapish rurashpa, tucui muyundijpi chai granadacunahuan chagrushpa churangui.

34Chai churana chaqui muyundijpica shuj uchilla campanata, chai huashapica shuj granadata, granadapaj huashapica shujtaj campanata chashna huashan huashan muyujta churangui.

35Aaronca ñucapajta rurangapajca tucui chaicunata churarishca cachun. Mandaj Diospajlla ch'icanchishca ucuman Mandaj Diospajman yaicujpica chai campanacuna ch'ilin nishcami uyaringa. Chashna cashpami mana huañushpa llujshinga.

36Ashtahuan alli curimanta shuj uchilla ñañujlla latata rurangui. Chaipica: MANDAJ DIOSCA JUCHA ILLAJMI nishcata sellanapi quillcaj shina quillcangui.

37Chai ñañu latataca mitrapi cachun shuj azul cordonhuan mitra ñaupaj ladoman huatangui.

38Chaica Aaronpaj frentepitaj cachun. Israelcuna Diosman cungapaj tandachishpa cushcacunamantaca Aaronmi tucuicunapaj juchacunata anchuchinga.

39Shuj tunicatapish lino puchcahuan sumaj ricunacunayujta ahuangui. Mitratapish lino puchcahuan ahuangui. Chumbillinatapish sumaj ricunacunayujta ahuangui.

40Paipaj churicunapajpish tunicacunata, chumbillinacunata, tiaracunata ahuangui. Alli nishca sumajcuna cachunmi chashna rurana cangui.

41Cambaj huauqui Aaronmanpish, paipaj churicunamanpish chashna churanacunatami churachina cangui. Ñucapajlla curacuna cachun aceitehuan churashpa ch'icanchingui.

42Paicunapajca cinturamanta mama changacama tapaj lino calzoncillocunata rurangui.

43Aarón cashpa, paipaj churicuna cashpa Dioshuan tupangapaj tandanacuna carpa huasiman yaicunapaj, mana cashpaca altarpi ñucapajta rurangapaj c'uchuyashpapish chaita churashca c'uchuyashpallami mana juchallishpa mana huañungacuna. Cai mandashcacunaca Aaronpajpish paipaj q'uipa huahua huahuacunapajpish huiñaipaj mandashcami.