NÚMEROS 27 - Quichua Chimborazo Bible

Zelofehadpaj ushushicuna allpata mañashcami

1Josepaj churi Manasesmanta mirarishca familiacunaca: Manasespaj churi Maquir. Maquirpaj churi Galaad. Galaadpaj churi Hefer. Heferpaj churi Zelofehadmi carca. Zelofehad runaca ushushicunallatami charirca. Paicunaca Maala, Noa, Hogla, Milca, Tirsa shuticunami carca. Paicunami Moisespajman rishpa,

2Dioshuan tupanacuna carpa huasi pungupi Moisespaj, Eleazar curapaj, israelcunata pushajcunapaj, tucui israelcunapaj ñaupajpi shayarishpa cashna nircacuna:

3“Ñucanchij yayaca shitashca pambapimi huañurca. Paica Coré runahuan tucushpa, Mandaj Diosta p'iñashpa c'amijcuna huañuipica mana huañurcachu. Ashtahuanpish paipaj quiquin juchamantami huañurca. Paica churicunataca mana charircachu.

4Ñucanchij yaya churicunata mana charishcallamanta, paipaj shutita anchuchishpa familiacunata chingachinaca mana allichu. Ñucanchij yayapaj familiacuna ama chingarichunca, ñucanchij yayapaj huauquicuna japishca allpamanta ashata chaupishpa ñucanchijman cuichij” nircacunami.

5Moisesca chai huarmicuna mañashcataca Mandaj Diostami tapugrirca.

6Mandaj Diosca Moisestaca cashnami nirca:

7“Zelofehadpaj ushushicunaca paicuna japina cashcallatatajmi mañacuncuna. Paicunapaj yaya japina cashcataca paicunapaj yayapaj huauquicuna japishca allpamanta chaupishpa chai ushushicunaman cuichij.

8Israelcunataca cashna ni: Israelcunamanta maijan cashpapish c'ari huahuata mana charishpa huañujpica, pai japina cashcataca ushushicuna japichun.

9Ushushitapish mana charishpa huañujpica, pai japina cashcataca huañuj runapaj huauquicuna japichun.

10Huauquicunapish mana tiyajpica, huañujpaj yayapaj huauquicuna japichun.

11Huañujpaj yayapaj huauquicunapish mana tiyajpica, pai japina cashcataca c'uchulla familia japichun. Chaicunaca paipajmi canga” nircami. Cai mandashcacunaca israelcuna chashnataj ruracuchunlla mandashcami. Moisesca Mandaj Dios mandashca shinallatajmi rurarca.

Moisespaj randi israelcunata pushaj cachun Josueta churashcami(Dt 31.1-8)

12Mandaj Diosca Moisestaca cashnami nirca:

–Abarim urcu jahuaman huichiyai. Chaiman huichiyashpa israelcunaman ñuca cushca llajtata ricui.

13Chai llajtata ricushca q'uipaca, cambaj huauqui Aarón shinallataj cambaj ñaupa yayacunahuan tandanacugringuillami.

14Zin shuti shitashca pambapi israelcuna yacu illan nishpa p'iñachijpimi cancunaca ñuca mandashca shina mana rurashpa ñuca ima jucha illaj cashcataca israelcunapaj ñaupajpi mana ricuchishpa, ñuca mandashcataca mana cazurcanguichij– nircami.

Chai yacucunaca Cadespi yacu illan nishpa p'iñanacushcami. Chaica Zin shuti shitashca pambapimi.

15Mandaj Dios chashna nijpimi, Moisesca:

16–Mandaj Dios tucuicunaman causaita cuj Dios, israelcunata pushachunca shuj runata churahuai.

17Mandaj Dios agllashca israelcunaca michij illajlla ama saquirichun shuj pushajta churahuai. Paica israelcunapaj puntapi llujshichun. Israelcunapaj puntapi yaicuchun. Maiman llujshichishpapish maiman yaicuchishpapish pai pushachun churahuai– nirca.

18Chaimi Mandaj Diosca Moisestaca:

–Nunpaj churi Josuemi ñucata cazuj, c'ari c'ari runa. Paipaj uma jahuapi cambaj maquita churai.

19Chai q'uipaca Eleazar curapaj ñaupajman, tucui israelcunapaj ñaupajman pushashpa paicunapaj ñaupajpi canmi paicunataca pushangui nishpa churai.

20Tucui israelcuna Josueta cazuchunca, canpi tiyaj alli nishca canata chaupishpa paipi churangui.

21Josueca Eleazar curapajman richun. Eleazarca Urimhuan Mandaj Diosta tapushpa, chai ricuchishca shina huillachun. Eleazar cura ima nishcallata rurashpa Josuepish, tucui israelcunapish maiman llujshina cajpipish llujshichun, maiman yaicuna cajpipish yaicuchun– nircami.

22Moisesca Mandaj Dios ima shina mandashca shinallataj rurashpami Josuetaca, Eleazar curapaj ñaupajpi, tucui israelcunapaj ñaupajpi churarca.

23Chaipimi Moisesca Mandaj Dios paita ima shina mandashca shinallataj Josuepaj jahuapi paipaj maquicunata churashpa israelcunataca canmi pushangui nishpa churarca.