ROMANOS 10 - Quichua Chimborazo Bible

1Huauquicuna, israelcuna quishpirishca canaman chayachun nishpami, ñuca shungupica chai yuyailla Diosta mañacuni.

2Paicuna Dios yuyailla cashcataca, ñucapish huillai tucunimi. Chashna cashpapish Diosta rijsina cashca shinatajca mana rijsincunachu.

3Paicuna munashca shinapi justificashca cashun nishpami, Dios justificashca canataca mana yachashun nircacuna. Chashnami Dios justificashca canataca mana cazurcacuna.

4Mandashcata pajtachijca Cristomi. Tucui paita crijcunataca Dios justificachunmi chashna rurarca.

5Mandashcata rurajcunata justificanamantaca, Moisés quillcashcapica: “Maijanpish cai nishcacunata rurashpami, chaicunamanta causanga” ninmi.

6Ashtahuanpish crishcamanta justificanamantaca cashnami nin: Ama cambaj shungupica: “¿Pitaj jahua pachaman huichiyangari?” ningui. (Chashna nishpaca, Cristota uriyachisha nishca shinallatajmi tucungui).

7“¿Pitaj ucujta jutcumanca uriyangari?” nishpapish ama ningui. (Chashna nishpaca, Cristota huañushcacunapaj chaupimanta huichiyachisha nishca shinallatajmi tucungui).

8Ashtahuanpish ¿Mandashcaca imatataj nin? “Diospaj Shimica cambaj c'uchupi, cambaj shimipi, cambaj shungupipishmi” ninmi. Chaica crinamanta huillaj shimimi, chaitami huillacunchij.

9Cambaj shimihuan Jesusca ñucata Mandajmi nishpa, huañushcacunapaj chaupimanta Taita Dios paita causachishcata cambaj shungupi crishpaca, quishpichishcami cangui.

10Shunguhuanca justificashca cangapajmi crina, ashtahuanpish shimihuanca quishpichishca cangapajmi crinimi nina.

11Quillcachishcapica: “Maijanpish paipi crijtaca, mana pingachishcachu canga” ninmi.

12Judiocunapish, griegocunapish chai shinallatajmi. Paillataj tucuicunapaj Mandaj Jesús cashpami, tucui paita mañajcunaman cungapajca achcata charin.

13Pi cashpapish Mandaj Jesuspaj shutipi mañajtaca, quishpichingami.

14Paita manaraj crij cashpaca ¿ima shinataj paitaca mañangacunari? Manaraj paimanta uyashpaca ¿ima shinataj cringacunari? Pi manaraj huillajpica ¿ima shinataj uyangacunari?

15Cachajcuna mana tiyajpica ¿ima shinataj huillagringacunari? Cashnami quillcashca tiyacun: “¡Sumaj causaita huillajcunapaj, alli huillaita huillajcunapaj chaquicunaca sumajmari!” ninmi.

16Ashtahuanpish alli huillaitaca, mana tucuicuna cazurcacunachu. Chaimantami Isaiasca: “Jatun Dios, ¿pitaj ñucanchij huillashcataca crishcari?” nin.

17Chashna cajpica crinaca huillashcata uyashcamantami shamun, chai uyashcaca Diospaj Shimimanta huillashcami.

18Ashtahuanpish caita tapusha: ¿Manachari uyarcacunari? Ari uyarcacunatajmari:

“Tucui cai pachapimi, paicuna rimashcaca uyarirca.

Cai pacha tucuricamami, paicuna huillashcaca uyarirca” ninmi.

19Caitapishmi tapuni: Israelcunaca ¿manachu chaitaca yachashca canga? Puntaca Moisesrajmi:

“Manapish ñucapaj caj, yuyai illajcunata ñucapajmi canguichij nishpami, cancunataca p'iñachisha” ninmi.

20Isaiaspish mana manchashpami:

“Ñucata mana mashcajcunarajmi japircacuna.

Ñucata mana tapujcunamanrajmi ricurircani” ninmi.

21Ashtahuanpish israelcunamantaca: “Ñucata mana cazushpa c'ariyajcuna cajpipish, punllantami maquita chutashpa cayacurcanilla” ninmi.