HECHOS 15 - Quichua Chimborazo Bible

Mandajcunapuralla Jerusalenpi tandanacushca cashcami

1Chai punllacunallatajmi Judeamanta maijan shamujcunaca Jesusta caticujcunataca: “Moisés mandashca shina circuncisionta mana rurachishpaca, mana quishpiri tucunguichijchu” nishpa yachachircacuna.

2Chaimi Pabloca Bernabendij chai yachachijcunahuan rimanacushpa, jatunta p'iñarinacurcacuna. Mana allichipaj cajpimi, apostolcunahuan, cunaj yuyajcunahuan parlanacushpa allichichun Pablotapish Bernabetapish caishuj crijcunandij Jerusalenman cachanata yuyarircacuna.

3Tandanacushca crijcuna paicunata cachajpimi, Feniciata, Samariata pasacushpaca, mana judiocunapish ñaupa causaita saquishpa Jesusta crishcata parlashpa rircacuna. Chaita uyashpaca Jesusta caticujcunaca achcatami cushicurcacuna.

4Jerusalenman chayajpica, tandanacushca crijcunapish, apostolcunapish, cunaj yuyajcunapish allimi chasquircacuna. Pablopish Bernabepish Taita Dios paicunata imallata rurachishcatami parlarcacuna.

5Chaimi fariseocunapuramanta maijan crijcuna shayarishpaca:

–Chai mana judiocunapish crij tucujpica circuncisionta rurachinatajmi, Moisés mandashcatapish cazuchun mandanami– nircacuna.

6Chaita uyashpaca apostolcunapish, cunaj yuyajcunapish alli yuyarinacungapajmi tandanacurcacuna.

7Chaipi tandanacushpa ña achcata rimanacushca q'uipami, Pedro shayarishpaca cashna nirca:

–Huauquicuna, mana judiocunapish alli huillaita ñuca huillajpi crijpi quishpichingapajmi taita Diosca sarunman ñucataca agllarca. Chaitaca cancunallataj yachanguichijmi.

8Tucuicunapaj shunguta rijsij Taita Diosca mana judiocunatapish chasquishcata ricuchingapajmi, paicunamanpish ñucanchijman shinallataj jucha illaj Espirituta curca.

9Jesusta crishcallamanta paicunapaj juchacunata perdonashpami ñucanchijtapish paicunatapish chai shinallataj Quishpichij cashcata Taita Diosca ricuchirca.

10Chaimanta cunanca ñucanchij ñaupa yayacunapish, ñucanchijpish mana pajtachi tucushcataca cunanlla crijcunatapish rurachun nishpaca, Taita Diostami p'iñachicunguichij.

11Ñucanchijtaca Mandaj Jesusca mana c'uyaipaj cajpipish crijllapimi quishpichirca. Paicunatapish chashnallataj crijllapimi quishpichin– nircami.

12Chaita uyashpa chaipi caj achcacuna upallashpaca Bernabepish, Pablopish imalla parlashcatami uyarcacuna. Paicunaca pi mana ruraipajcunatapish, mancharinacunatapish mana judiocunapaj ñaupajpi paicunata Taita Dios rurachishcatami parlarcacuna.

13Paicuna ña tucui parlajpica, Jacobomi cashna nirca:

–Huauquicuna, ñucata uyapaichij.

14Simonllataj mana judiocunata Taita Dios ima shina agllai callarishcata, paicuna Taita Diospaj huahuacuna tucushcatapish ñami ñucanchijman parlan.

15Profetacunata Taita Dios Quillcachishpa huillashca shinami tucushca. Chaipica:

16“Chai q'uipa tigramushpaca Davidpaj carpa huasi urmashcataca, cutinmi shayachisha.

Urmashcatapish allichishpa cutin shayachishami.

17Chashna rurajpimi tucui saquirishcacunapish, ñuca agllashca mana judiocunapish Jatun Diostaca mashcangacuna.

18Ñaupa huatacunamantapacha tucuita huillachij Jatun Diosmi chashna” nin.

19Chaimanta ñuca yuyaipica, mana judiocunapish ñaupa causaita saquishpa Jesusta crijpica ima chaicunata nishpa mana p'iñachinachu canchij.

20Chashna ninapaj randica paicunamanca: “Rurashcalla dioscunaman ima cushcatapish ama micunguichij, ama huainayanguichij, sipishpalla huañuchishca aichatapish, ima yahuartapish ama micunguichij” nishpa quillcashpa cachashunchij ninimi.

21Ñaupa yayacuna causai punllacunamantami tucui pueblocunapi caj sinagogacunapica samana punllacunapi Moisés mandashcata rezashpa huillajcunaca tiyan– nircami.

22Chashna nishcaca apostolcunapaj, cunaj yuyajcunapaj, tandanacushca tucui crijcunapaj yuyaipipish allimi carca. Chaimantami crijcuna alli nishca Barsabás nishca Judasta, Silastapish Pablohuan, Bernabehuan Antioquiaman richun agllarcacuna.

23Paicunamanca:

“Apostolcunapish, cunaj yuyajcunapish, Jesusta caticuj tucuicunapishmi Antioquia pueblopi, Siria llajtapi, Cilicia llajtapi caj mana judiocuna cashpapish Jesusta caticujcunataca allillachu canguichij nishpa quillcashpa cacharcacuna.

24Ñucanchijpuramanta maijancunami cancunapajman rishcata uyanchij.

Paicunami cancunataca circuncisionta ruranami canguichij, Moisés mandashcatapish cazunami canguichij nishpa muspachishcacuna.

Paicunataca mana ñucanchijchu cacharcanchij.

25Chaimantami tucuicuna shuj yuyailla tucushpa, ñucanchijpuramanta huauquicunata agllashpa cachana alli yuyachijpi, paicunataca ñucanchij c'uyashca Bernabehuan, Pablohuan cachanchij.

26Bernabehuan Pablohuanca huañuna causana cashpapish ñucanchijta Mandaj Jesucristomantaca huillarcallacunami.

27Tucui caicunataca Judaspish, Silaspish paicunapaj quiquin shimihuantajpish ima shina cashcatatajmi cancunamanca huillanga.

28Jucha illaj Espiritupish yuyachijpi, ñucanchij yuyaipipish chashna rurana alli cajpimi, cancunataca cai mandashcacunamanta ashtahuan shujtaj mana ruranata podipajcunataca mana rurachun mandashun ninchij. Ashtahuanpish cancuna yachaipajcunallatami nishun ninchij:

29Rurashcalla dioscunaman cushcata ama micunguichij, yahuartapish, sipishpalla huañuchishca aichatapish ama micunguichij, ama huainayanguichij. Caicunata cazushpaca, allitamari ruranguichij. Allilla cashca canguichij” nishpami quillcarcacuna.

30Chai cachashcacuna Antioquiaman chayashpaca, chaipi causaj tucui crijcunata tandachishpami chai quillcataca curcacuna.

31Chaita rezajpi uyashpaca, paicunata cunashpa quillcashcamantami achcata cushicurcacuna.

32Judaspish, Silaspish profetacunami carca. Chaimantami paicunapish Jesusta caticujcunataca sumaj shimicunahuan cushichishpa ashtahuan catina yuyaita curcacuna.

33Tauca punllacunata chaipi cashca q'uipami, paicunata cachajcunapajman tigrana tucurcacuna. Chaimi Antioquiapi caj tandanacushca crijcunaca sumajta cayacamachij ninacushpa cacharcacuna.

34Silasca chaipi saquirinatami yuyarirca.

35Pablohuan Bernabehuanca shujtajcunandij tucushpami Antioquiallapitaj Jatun Diospaj Shimita ashtahuan yachachishpa, alli huillaitapish huillashpa catircacuna.

36Tauca punllacunata chaipi cashca q'uipami Pabloca, Bernabetaca:

–Sarunman mai pueblollapi Jatun Diospaj shimita huillajpi crishcacuna ima shina caticujta jacu ricumushun– nirca.

37Chaimi Bernabeca, Marcos nishca Juantapish paicunahuan pushashun nirca.

38Sarunman huillashpa puricujpimi, Juan Marcosca paicuna maillata huillagrina cashcata manaraj tucuchishpa Panfilia llajtapi saquishpa tigramushca carca. Chaimi Pabloca paitaca mana pushasha nirca.

39Chaimanta mana shuj yuyailla tucushpami, caishujmanta chaishujmanta ch'icanyarishpa Bernabeca, Marcosta pushashpa barcopi huichiyashpa Chipre llajtaman rirca.

40Pabloca Silasta agllashpa rigrijpimi, Antioquiapi caj tandanacushca crijcunaca Jatun Dios mana c'uyaipajta c'uyaihuan alli pushachun nishpa Taita Diosman mingarcacuna.

41Paicuna rishpaca Siriapi, Ciliciapi caj tandanacushca crijcunataca ashtahuan alli catina yuyaita cushpami rircacuna.