1Jatun mandajcunataca tucuicuna cazuchun. Mandajca Dios churashcamantami tiyan. Dios mana churashca mandajca, mana tiyanchu.
2Chaimanta maijanpish mana cazujca, Dios churashca mandajtami c'ariyan. Chai mana cazujcunaca, paicunapaj llaquipajllatajmi chashna ruran.
3Mandajcunaca allita rurajta manchachingapaj mana canchu, ashtahuanpish millaita rurajta manchachingapajmi. ¿Mandaj mana manchachishca causasha ninguichu? Shinashpaca allita ruraiyari, alli nishcami cangui.
4Mandajca cambaj allipajllataj Diospajta rurajmi. Chaimanta millaita rurashpaca manchanami cangui, espadataca mana yanga apanchu. Mana allita rurajta cashcatataj ricuchishpa llaquichingapajmi apan.
5Mana llaquichishca canallamanta cazunachu cangui, ashtahuanpish cambaj yuyaillapitaj cazunaca alli cashcamantami cazuna cangui.
6Chaimantami tributotapish paganguichij. Mandajcunaca, Diospajta rurajcuna cashpami, tucui chai ruranacunataca punllanta ruracuncuna.
7Imallamanta pagana cashcata pagaichij: Tributotaca, tributota japijman, impuestotaca, impuestota japijman, cumurina cajtaca cumurichij, alli nina cajtaca alli nichij.
8Piman ama imata debichijchu, ashtahuanpish caishuj chaishuj c'uyanacunallata debinguichij. Shujtajta c'uyajmi Mandashcataca pajtachishca.
9Mandashcapica: “Ama huainayangui, ama huañuchingui, ama shuhuangui, ama llullashpa huillangui, shujtajcunapajta ama munangui” ninmi. Ima shujtaj mandashca tiyajpipish: “Quiquin c'uyarij shinallataj shujtajcunatapish c'uyangui” nishcallapimi pajtan.
10C'uyajca, shujtajtaca ima millaita mana ruranchu. Chashna cajpica shujtajta c'uyajmi, Mandashcata pajtachin.
11Cunanca ima punllacuna cashcata yachashcamantaca, ñamari dormicushcamanta jatarina canchij. Ñucanchijta quishpichina punllaca, cri punllapi cashcata yalli c'uchupimari.
12Tutaca pacarigrinmari, punllapish chayamugrinmari. Amsapaj ruraicunataca shitashunchij, achijpaj macanacunata churarishunchij.
13Punllapi shina alli purishunchij. Jatun micui ubyaitapish ama rurashunchij, ama machashunchij, aicha munailla canata jarcarishunchij, cacharishcacuna ama cashunchij, ama macanacushunchij, ama envidiashunchij.
14Chaipaj randica Mandaj Jesucristota churarichij. Aicha munaicunata rurashpa cushicujcunaca ama caichijchu.
Who We AreWhat We EelieveWhat We Do
2025 by iamachristian.org,Inc All rights reserved.
