JOB 5 - Quichua Chimborazo Bible

1Cunanca sinchita capariyari,

maijan cutichinchu imami.

¿Maijan angelpajmantaj tigrashpa

rigringuiyari?

2Rumi shungu runataca, p'iñarina

yuyaillami huañuchicun.

Charina yuyailla causajcunataca,

shujtajcuna charishcata munana

yuyaillami tucuchicun.

3Ñucaca, rumi shungu runataca

sapiyashpa yallitaj jatun tucujtami

ricurcani.

Chaimantami chai ratollataj pai

causana huasitaca, llaqui tucushca

canman nircani.

4Paipaj huahuacunaca mana ashtahuan

sumajta causai tucungacunachu.

Puebloman yaicuna pungullapimi

huañuchingacuna.

Paicunata quishpichijca, pi mana

tiyangachu.

5Paipaj granocunataca yaricaihuan

cajcunami micungacuna.

Casha chaupicunamantapish mashcashpami

apangacuna.

Yacunaihuan cajcunapish paipaj

haciendamantami ubyangacuna.

6Llaquica mana allpamanta llujshinchu.

P'iñana yuyaica, mana pambamanta

huiñanchu.

7Ashtahuanpish rupacuj ushpa jatarishpa,

huairata callpaj shinami tucun.

Chashna llaquipajllami runaca huacharin.

8Ñucaca Taita Diostachari mashcaiman,

paimanchari ñuca llaquitaca mingaiman.

9Paica achca allicunatapish, pipish

mana rurai tucuipajcunatapish, mana

yupai tucuipaj sumaj allicunatapish rurajmi.

10Cai pachamanca tamyatami cachan,

tarpushcacunamanca yacutami cachan.

11Yangacunatapish jatuntami ruran.

Llaquilla cajcunataca mana urmanapi

churashpa cushichinmi.

12Millaita rurangapaj yuyaisapacunataca,

paicunapaj maquicunahuan ama imata

rurai tucuchunmi muspachin.

13Jatun yachajcunataca, paicuna

yachashcallapitaj japishpa muspachinllami.

Millai runacunataca, paicuna

yuyashcallapitaj pandachinllami.

14Punllapica amsahuanmi tsagnaringacuna.

Chaupi punllapimi tutapi shina

tantiashpa purincuna.

15Chashnami Diosca huajcha runataca,

espadapi huañunamantapish, paita mana

manchajcunapaj shimimantapish,

huañuchijcunapaj maquimantapish quishpichin.

16Huajcha runaca paillatami shuyan.

Millaicunataca millaita rurashcallatajmi

shimitaca huichcanga.

17Ricuiri, Taita Dios llaquita cachashca

runaca cushicunmari.

Chaimanta Tucuita Rurai Tucuj Dios ima

shinapish llaquichijpica, mana p'iñarinichu.

18Paillatajmi caracha ungüitaca churarca,

chaitaca paillatajmi maillashpa huatanga.

Pai chugrichishcataca, paipaj

maquicunallahuantajmi jambin.

19Sujta cutin jatun llaquicunata

apacujpipish quishpichingami.

Ña canchis cutinpica, ima mana allipish

cantaca mana japingachu.

20Cantaca yaricaihuan huañunamantapish

quishpichingami.

Jatun macanacuipipish espadapi

huañunamanta quishpichingami.

21Millaita rimaj c'allucunamantapish

pacashcami cangui.

Chingachij jatun llaqui shamujpipish,

mana manchanguichu.

22Canca llaqui japijpipish, yaricai

japijpipish asinguimi.

Sachapi causaj p'iña animalcunatapish

mana manchanguichu.

23Shinallataj allpapi sirij rumicunapish

cambaj chagra p'ucunataca mana jarcangachu.

Sachapi causaj p'iña animalcunapish

canhuanca sumajtami causangacuna.

24Cambaj huasipica sumaj causai

tiyashcatami yachaj chayangui.

Can causana huasita ricunaman yaicushpaca,

imapish mana illashcatami ricungui.

25Chashnallataj canca, cambaj huahua

huahuacuna achca cashcatapishmi ricungui.

Cambaj huahua huahuacunaca allpapi

huiñaj q'uihua shinami cangacuna.

26Trigota tandana punlla tucujpi,

tandachishca shinami ña yuyaj tucushpaca,

pambana jutcupi pambarinaman rina cangui.

27Riqui, cai tucuitami yuyachishcanchij.

Chaica chashnallatajmi tucunga.

Uyashpapish cambaj quiquin allipajllataj

yachayari nircami.