EFESIOS 2 - Quichua Chimborazo Bible

Mana c'uyaipaj cajpipish c'uyashpa quishpichishcacunami

1Cancunapaj millai juchacunapi huañushcacuna cajpipish, Diosmi cancunaman causaita curca.

2Ñaupa punllacunaca cai pacha munaicunata catishpami, huairapi mandaj munashcata rurashpa, chaipi purircanguichij. Cunanca mana cazujcunapimi, chai espirituca millaita rurachicun.

3Ñaupa punllacunaca tucui ñucanchijpish aicha munaicunapi purishpami, aichapaj munaita rurashpa, yuyashcata rurashpa, millaita rurajcunapurapi causarcanchij. Shujtajcuna shinallatajmi ñucanchijpish huachari pachamanta, Dios p'iñarishpa llaquichina huahuacuna carcanchij.

4Ashtahuanpish Diosca llaquij canapi charij cashpami, paipaj jatun c'uyaihuan ñucanchijtaca c'uyarca.

5Juchapi ñucanchij huañushca cajpipish, Cristohuan shujllata rurashpami, ñucanchijtaca causachirca. (Mana c'uyaipaj cajpipish c'uyashpa quishpichishcacunami canguichij).

6Paihuan shujllata rurashpami ñucanchijtaca causachirca. Chashnallatajmi ñucanchijtaca, Cristo Jesushuan jahua pachapi tiyachirca.

7Paipaj mana c'uyaipajta c'uyaj canahuan yallitaj charij cashcata shamuj punllacuna, Cristo Jesusmanta ñucanchijman ricuchingapajmi chaipi tiyachirca.

8Crishcamantami mana c'uyaipajta c'uyashpa quishpichishcacuna canguichij. Mana cancunallatajchu quishpirircanguichij. Ashtahuanpish chaica, Dios cushcallami.

9Pi ama jatun tucuchunmi, rurashcacunamantaca mana quishpichishca.

10Ñucanchijca Dios rurashcami canchij. Allicunata rurachun Cristo Jesuspi mushujyachishcacunami canchij. Chashna allicunata rurashpa purichunmi, Diosca ñaupaman allichirca.

Cruzmantami Dioshuanca alli tucuna

11Chaimanta cancunaca, ñaupa ima shina cashcata yuyarichij. Circuncisionta aichapi maquihuan rurachishcacunaca, mana judiocunataca, aichapi mana circuncisionta rurachishcacuna nishcami carcanguichij.

12Ñaupaca Cristo illajcuna, Israel canamantapish carupi, Dios cusha nishpa ari nishcatapish imata mana charijcuna, cai pachapica shuyana illaj, Dios illajcunami carcanguichij.

13Ashtahuanpish cancunaca ñaupa punllacuna carupi cashca cashpapish, cunanca Cristopaj yahuarmanta, Cristo Jesushuan shujllata rurashpa Diosman c'uchuyachishcacunami canguichij.

14Cristomi ñucanchijpaj sumaj causai. Judiocunahuan, mana judiocunahuan ch'icanchij patata urmachishpami, paica shujllata rurarca.

15Cristomi p'iñanacushcataca paipaj aichapi chingachirca. (Mandashcacunapaj mandashcata pajtachichun nishcata chingachishpami) ishquindijmanta shujllata rurashpa, mushuj runata paillapitaj callarichirca. Chashnami sumajta causajcunata rurarca.

16Shinallataj cruzmanta Dioshuan alli tucuchunmi, p'iñanacushcacunata paillapitaj chingachishpa, ishquindij llajtacunata shujlla cuerpota rurarca.

17Pai shamushpami cancuna Diosmanta carupi cajcunaman, c'uchullapi cajcunamanpish, sumaj causaipaj alli huillaita huillarca.

18Paimantami caishujpish, chaishujpish shuj Espiritullamanta Yayapajman yaicunata charinchij.

19Chaimantami cancunaca ña mana shujtaj llajtamanta shamushcacunalla, pasacujcuna shinallapish mana canguichij. Ashtahuanpish jucha illaj llajtapurataj, Diospaj familiapuratajmi canguichij.

20Apostolcunahuan, profetacunahuan callarichishca jahuapi sinchita huasichishcacunami canguichij. Chai callaripi churashca rumica Jesucristomi.

21Cristopi huasichicushcacunaca alli yuyarishpa shayachishca cashpami, Diospaj jucha illaj huasi tucungacama, Mandaj Jesuspi huiñashpa catin.

22Cancunapish Espiritupi Dios causana huasi cangapajmi, chaipi tandalla huasichicushcacuna canguichij.