FILIPENSES 1 - Quichua Chimborazo Bible

Allillachu canguichij nishcami

1Pablopish, Timoteopish Jesucristopajta rurajcunami canchij. Filipospi caj obispocunahuan, diaconocunahuan Cristo Jesushuan shujlla caj tucui jucha illajcunahuanca:

2Dios ñucanchij Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

Pabloca crijcunamanta Diosta mañashcami

3Cancunamantaca maipi yuyarishcapimi, ñuca Diostaca pagui nicunilla.

4Diosta ñuca mañanapica, tucui cancunamantaca cushicuihuanmi rogacunilla.

5Callari punllamanta cunancama alli huillaipaj ayudacujpimi cancunamantaca mañacunilla.

6Alli ruranata cancunapi callarichij Diosca, Jesucristo shamuna punllacamami ashtahuan alli rurachicungalla. Chaitaca allitajmi yachani.

7Tucui cancunamanta ñuca chashna yuyanaca allitajmari. Prezupi ñuca cashpa, alli huillaimanta shayarishpa chashnataj cashcata huillacushpaca, cancuna rurashcatami shungupi yuyarini. Tucui cancunapish mana c'uyaipajta c'uyaipimi ñucahuan canguichij.

8Jesucristopaj c'uyaihuan ñuca tucui shunguhuan, tucui cancunata ñuca ima shina c'uyacushcataca, Diosca ricucunmi.

9Diosta mañacushpaca caitami mañani: Cancunapaj c'uyaica yachaipi, entendinapipish ashtahuan ashtahuan yallitaj mirarichun,

10imapish alli cajllata agllachun, Cristo shamuna punllapajca mana nij tucuj, pi mana juchachipaj cachunpish,

11Diosta alabashpa sumajyachichun, Jesucristomanta cashcata rurashpa granota p'ucuj shina junda cachunpishmi mañacuni.

Ñuca causaica Cristopajmi nishcami

12Huauquicuna, caita yachachunmi munani. Ñucapi imalla tucushcacunaca, alli huillai ashtahuan miranapajmi chashna tucushca.

13Chaimantami mandana huasipi guardiajcuna, tucui shujtajcunapish Cristomanta prezupi ñuca cashcataca, allitaj yachaj chayancuna.

14Chaupi yalli huauquicunami prezupi ñuca cajpipish, Mandaj Jesuspi sinchiyashpa Diospaj shimitaca ashtahuan mana manchashpa huillancuna.

15Maijancunaca ñucata mishasha nishpami, envidiallamanta Cristomantaca huillancuna. Ashtahuanpish shujtajcunaca alli shunguhuanmi huillancuna.

16Shujcunaca ñucata mishashun nishpa, prezupi ñuca cajtapish ashtahuan llaquichishun nishpallami, Cristomanta huillaj tucucuncuna.

17Ashtahuanpish alli huillaitaca chashnataj cashcata huillaj cachun Dios ñucata churashca cashcata yachashpami, shujtajcunaca c'uyaihuan huillancuna.

18Chashna llaquichishun nishpa huillashcapish ñucataca imata mana llaquichinchu. Jarcangapaj huillashpapish, ima shina cashpapish, nij tucushpallapish, huillanamantataj huillashpapish, Cristomantaca huillashcacunami. Chaimi ñucaca cushicuni. Chaimantaca cushicucushallami.

19Cancuna Diosta mañashcamanta, Jesucristopaj Espíritu ayudashcamanta alli cana cashcataca yachanimi.

20Ñuca munashca, ñuca yuyacushca shinallataj imapi mana pingachishca cashachu. Chaitaca chashnataj cana cashcatami yuyani. Ñucapi ricuchij cashca shinallatajmi causajpipish huañujpipish Cristo jatun cashcataca, ñuca cuerpopi ricuchishca canga.

21Chaimanta ñucapaj causaica Cristomi. Huañunapish tucuita mishanami.

22Ashtahuanpish Cristopajta rurangapajca aichapi causanami ñucapajca alli. Chaimantami maijanta mana agllai tucuni:

23Chai ishquindij yuyaicunami ñucataca llapiracun. Shina cajpipish, Cristohuan cangapaj huañushpa rinami ñucapajca yallitaj alli.

24Ashtahuanpish cancunapaj allipajca, aichapi saquirinarajmi yallitaj alli.

25Cancuna crishcapi cushicuchun ayudangapaj, tucui cancunahuan catinaraj cashcataca, allimi yachani.

26Cutinllataj cancunapurapi ñuca cajpimi, ñucamantaca Cristo Jesuspi yallitaj cushicunguichij.

27Cancunataca Cristopaj alli huillaipi nishca shinataj purichunllami rogani. Ricunaman rijpipish, mana rijpipish shujlla Espiritupi sinchiyarishpa, alli huillaita crishcapi shuj shinalla macanacucujtami uyasha nini.

28Jarcajcuna manchachichunca, ama saquinguichijchu. Chashna rurashpaca, paicuna chingarinaman ricushcata, cancunaca quishpichishca cashcatami ricuchicunguichij. Chaica Diosmantami shamun.

29Cancunamanca Cristota crinallataca mana curcachu. Ashtahuanpish paimanta llaquita apanatapishmi curca.

30Llaquita ñuca apajta ricushca shinallatajmi, llaquita apacunguichij. Cunanpish ñuca llaquipi cajtaca ñami uyashcanguichij.