NÚMEROS 5 - Quichua Chimborazo Bible

Mapayashcacunataca carpa huasicunamanta caruman cachachun nishcami

1Mandaj Dios Moisesta mandashpaca cashnami nirca:

2“Israelcunataca: Leprahuan cajcunatapish, yuraj yacu cacharirishpa ungushcacunatapish, huañushcapi tuparishcamanta mapayashcacunatapish cancuna causacun carpa huasicunamanta caruman churachun mandai.

3Chashnacunataca c'aricunatapish, huarmicunatapish llujshichishpa cachaichij. Cancunapaj chaupipi ñuca causacunta ama mapayachichunmi cancuna causacun carpa huasimanta caruman churana canguichij” nircami.

4Israelcunaca chashnataj rurashpami: Paicuna causacun carpa huasicunamanta caruman churarca. Mandaj Dios Moisesta ima shina mandashca shinallatajmi rurarca.

Maijanpajta imata llaquichishpaca yallihuan cutichichun mandashcami

5Mandaj Dios Moisesta mandashpaca cashnami nirca:

6“Israelcunataca cashna ni: Maijan c'ari cashpa, huarmi cashpapish maijanpajta imata llaquichishpaca, Mandaj Diostami p'iñachin. Paica juchayujmi tucun.

7Chai juchallijca pai juchallishcataca cashna rijsirichun. Maijanpajta imata llaquichishcataca tucuimanta pagachun. Chai jahua pichcahuan pagachun.

8Chai paganataca familiapish mana tiyajpica, llaquichishcamanta paganataca, Mandaj Diosman cushpa curaman cuchun. Juchamanta cushpa rupachichunpish carnerota cuchun. Chaimi curaca carnerota Diosman cushpa chai juchallijmanta rupachinga.

9Israelcuna paicuna imalla charishcacunamanta, Mandaj Diospajlla ch'icanchishpa apamushpa curaman cushcacunaca curapajmi canga.

10Tucui imatapish ch'icanchishpa Mandaj Diosman cungapaj apashpa curaman cushcaca curapajmi canga” nircami.

Huarmita cusa shujtajman juchachijpi ima shina ruranata mandashcami

11Mandaj Dios Moisesta mandashpaca cashnami nirca:

12Israelcunataca cashna nishpa mandai: Maijanpaj huarmipish paipaj cusapi mana shunguta churashpa, paipaj cusata umacungachari.

13Chai huarmihuanca shujtaj c'ari causacungachari. Chaitaca paipaj cusaca mana yachangachari. Chai huarmi chashna pacalla mapayashcataca pi huillaj mana tiyangachari. Chai huarmica mana allita ruracushcapi mana japi tucungachari.

14Chai huarmi huashalla mapayashcata mana yachashpapish, paipaj cusapaj yuyaipi shujtajman juchachina yuyai shamujpi juchachingachari. Mana cashpaca manapish mapayashca cajpi paipaj cusapaj yuyaipi shujtajman juchachina yuyai shamungachari.

15Chashna cashpaca, paipaj huarmita curapajman pushachun. Chai huarmimanta Diosman cungapajca shuj efata chungapi chaupishca shuj mirga cebada cutata apachun. Juchachishcamanta cushca cashcamanta chai jahuapica aceitetapish ama tallichun, inciensotapish ama churachun. Chai cushcaca, juchata Dios ricuchichun cushcami canga.

16Chai huarmitaca Mandaj Diospaj ñaupajman cura pushashpa richun.

17Chai q'uipaca allpamanta rurashca vasopi Diospajlla ch'icanchishca asha yacuta cura japishpa, Diospaj carpa huasi ucu pambamanta ñutu allpatapish japishpa, chai yacuhuan chagruchun.

18Mandaj Diospaj ñaupajpi shayacuj huarmitaca chaipi shayacujllapitajmi, curallataj umata llatanashpa, maquicunapica juchata Dios ricuchichun cushca cutata churanga. Chaica juchamanta cushca cutami. Juchamanta llaquita apamuj jayaj yacutaca cura paipaj maquipi charichun.

19Chai huarmita cura alli alli tapushpa cashna nichun: Canhuan pi mana dormishca cajpi, cambaj cusapi mana shunguta churashpa mana umashca cajpi, can mana mapayashca cajpica, juchamanta llaquichij cai jayaj yacuca cantaca mana llaquichingachu.

20Ashtahuanpish cusapi shunguta churaj cashca jahua, mana chashna rurashpa mapayashca cajpi, manapish cambaj cusa caj shujtaj canhuan dormishca cajpica,

21curaca chai huarmitaca cashna nichun: Cantaca Mandaj Diosca mana allita rurashcamanta llaquichishpa cambaj llajtapi causajcunaman mana alli cashcata ricuchishca cachun. Mandaj Diosca cambaj changata tandachichun. Cambaj huijsatapish p'unguichichun.

22Juchamanta llaquichij cai jayaj yacuta ubyajpica cambaj huijsataca p'unguichingami. Cambaj changataca tandachingami nichun. Shina nijpica chai huarmica: Chashna cachun, chashna cachun nichun.

23Juchamanta llaqui tucuna cashcacunataca curami shuj libropi quillcanga. Chaitaca curallatajmi jayaj yacuhuan tucuita p'ichanga.

24Juchamanta llaquita apamuj jayaj yacutaca chai huarmiman ubyachichun. Juchallishca cajpi llaquichij yacuta ubyajpica, juchamanta jayajyachingapajmi yaicunga.

25Chai q'uipaca juchallishcamanta cushca cutata chai huarmipaj maquimanta cura japishpa, Mandaj Diospaj ñaupajpi huichi ricuchishpa cuyuchishpa altarman apachun.

26Chai cutamanta cura shuj lutsajta japishpa altarpi rupachichun. Mandaj Dios chai huarmita yuyarichunmi chashna ruranga. Jayaj yacuta cura chai huarmiman ubyachishca q'uipaca,

27chai huarmi mapa cajpi, paipaj cusata umashca cajpica, juchamanta llaquichij yacuca, paipaj huijsata jayajyachishpami paipaj huijsata p'unguichinga, changatapish tandachinga. Pai causacun llajtapica chai huarmica mana alli nishcami canga.

28Ashtahuanpish chai huarmi manapish juchayuj, chuya cashpaca, ima mana tucungachu. Huahuacunatapish ashtahuan charingallami.

29Maijan huarmipish mana paipaj cusapajlla tucushpa shujtaj c'arihuan mapayashcamanta cusa juchachijpi imallata ruranata mandashcaca chaicunami.

30Mana cashpaca, maijan cusapish paipaj huarmi mana alli cajpi shujtajhuan causacushcata yuyashpa juchachina yuyai shamujpica, cusaca paipaj huarmitaca Mandaj Diospaj ñaupajman apachun. Chaipica curami, chai mandashcapi nishca shina ruranga.

31Huarmillataj mana alli cajpi shujtajhuanmi yuyashpa juchachishcamantaca, cusaca mana llaquita apangachu. Huarmimi llaquita apanga nircami.