2 CRÓNICAS 30 - Quichua Chimborazo Bible

Ezequiasca Pascua fiestata rurashcami

1Ezequiasca, israelcunata Mandaj Diosta yuyarishpa Pascua fiestata rurangapajmi, Jerusalenman shamushpa Diospaj huasipi tandanacuchun tucui israelcunamanpish, tucui Judá llajtapi causajcunamanpish huillaj cacharca. Shinallataj Efraín aillupajpish, Manasés aillupajpish quillcacunatami cacharca.

2Jatun mandajca pai churashca mandajcunahuanpish, Jerusalenpi tandanacushcacunahuanpishmi, Pascua fiestata yuyarina quillapaj q'uipa quillapi ruranata yuyarinacushca carca.

3Chai jatun punllata yuyarina punllapitaj chaita rurangapajca, curacunami Diospajta rurangapajca mana achcacuna allichirircacuna. Judá llajtapi causajcunapish, Jerusalenmanca mana tandanacurcacunachu. Chaimantami q'uipa quillapi chaita ruranata yuyarircacuna.

4Jatun mandajpish, tucui caishujcunapish chaita yuyarinacushpaca alli cashcatami ricurcacuna.

5Chaimantami israelcunata Mandaj Diosta jatunyachingapaj Jerusalenpi Pascua fiestata yuyaringapaj shamuchun, tucui israelcunata cayaj cachanata yuyarircacuna. Beersebamantaca, Dancamami huillachun cacharcacuna. Ña uni huatacunatami Pascua jatun punllataca, mandashcapi nicushca shinatajca mana yuyarircacuna.

6Cachashca huillajcunaca jatun mandaj pai churashca mandajcunandij quillcashca quillcacunata apashpami, tucui Israel llajtatapish, tucui Judá llajtatapish rircacuna. Chashna rishpaca, jatun mandaj yachachishpa cachashca shinallatajmi cashna huillarcacuna: “Israelcuna, Abrahamta, Isaacta, Israelta Mandaj Taita Diosman cutirichij. Asiria llajtata jatun mandajpaj maquimanta quishpirishpa saquirishca cai ashallacunapish pai Diosman cutirijpica, paipish cancunataca chasquingami.

7Cancunapaj yayacunapish, cancunapaj huauquicunapish paicunapaj ñaupa yayacunata Mandaj Diostaca c'ariyarcacunami, ama cancunapish paicuna shinallataj caichijchu. Chaimantami paicunataca p'iñajcunaman cushpa, jatun llaquipi churarca. Chaitaca cancunallataj ricucunguichijmi.

8Cancunapish ama paicuna shina sinchi shungucuna caichijchu. Ricushca jahuaca ama cancunapaj yayacuna shina ch'ahuanyashcacuna caichijchu. Chashna canapaj randica Mandaj Diospajlla cachun huiñaipaj ch'icanyachishca huasiman shamushpa, cancunata Mandaj Diospajta ruraichij. Chashna rurajpica, paica cancunahuan alli tucungami.

9Cancunata Mandaj Diosca c'uyaj, llaquij Diosmari. Cancuna paiman cutirijpica, mana huashata ricuchingachu. Cancuna paiman cutirijpica, cancunapaj huauquicunata, cancunapaj huahuacunata prezu charicujcunamanpish paicunata llaquina yuyaita cungami. Chashnajpica, cai llajtaman tigramungacunamari” nishpami huillarcacuna.

10Chai huillajcunaca Efraín, Manasés shuti llajtacunapi caj tucui pueblocunapi causajcunamanmi huillarcacuna. Zabulón llajtacamami chashna tucui pueblocunapi huillashpa rircacuna. Ashtahuanpish uyajcunaca, paicuna huillajpica, chanzata rurashpami asircacuna.

11Shina cajpipish Aserpaj, Manasespaj, Zabulonpaj aillucunapuramantaca taucacunami juchayuj cashcamanta, llaquirishpa Jerusalenman shamurcacuna.

12Mandaj Diosca Judá llajtapi causajcunatapishmi, pai Dios mandashca shinata rurachun jatun mandajhuan, caishuj mandajcunahuan mandashcata cazuna yuyaita curca.

13Chashna yuyaita cujpimi, levadura illajlla tandata micuna fiesta punllata yuyaringapajca, chaita rurana quillapaj cati quillapica, yallitaj achcacuna Jerusalenpi tandanacurcacuna.

14Tucui paicuna jatarishpami, Jerusalenpi tiyaj shujtaj altarcunatapish, inciensota rupachina altarcunatapish tucui anchuchishpa, Cedrón huaicupi shitarcacuna.

15Pascua punllapi huañuchina malta c'ari ovejataca, chai punllata yuyarina quillapaj cati quilla chunga chuscu punllapimi, Diosman cushpa huañuchircacuna. Curacunapish, levitacunapish paicuna quiquinllataj pingai tucushpami, Diospajta rurangapaj allichirishpa Diospajlla tucurcacuna. Shinallataj Diosman cushpa tucui rupachingapajmi, animalcunata apamurcacuna.

16Shinallataj Diospajta rurangapajca, Diospajta ruraj Moisés mandashca shinallatajmi huashan huashan yaicuna tucurcacuna. Curacunaca animalcunapaj yahuarta levitacuna cushcata japishpami, altar jahuapi tsiraparcacuna.

17Chai tandanacuipica, achcacunami manaraj allichirishcacuna carca. Chaimantami levitacunaca tucui chaicuna Mandaj Diospajlla tucuchunca chai Pascua punllapi achca animalcunata Diosman cushpa huañuchircacuna.

18-19Efrainpaj, Manasespaj, Isacarpaj, Zabulonpaj aillucunamantami Pascua punllata yuyarishpa, Pascua micuita micungapaj shamurcacuna. Paicunaca quillcashcapi nicushca shina chai micuita micungapajca, mana allichirishcacuna carcachu. Shina cajpipish Ezequiasca paicunamantaca cashnami Diosta mañarca: “Mandaj Dioslla, canca allimi cangui. Tucui caicunaca cambaj cai huasiman shamunapaj allichirishca cana shina mana allichirishca cashpapish, tucui shunguhuanmi paicunapaj ñaupa yayacunata Mandaj Diosta mashcashpa shamushcacuna. Paicunapaj tucui juchacunata perdonapangui” nishpami mañarca.

20Ezequías chashna mañashcata uyashpami, Mandaj Diosca tucuicunapaj juchata perdonarca.

21Chashnami Jerusalenpi tandanacushca israelcunaca, jatun cushicuihuan canchis punllacama levadura illajlla tandata micurcacuna. Shinallataj levitacunahuan curacunahuanca Mandaj Diospaj tocanapaj rurashca tocanacunapi sinchita tocashpa, Mandaj Diostaca punllanta cantarcacuna.

22Ezequiasca, Mandaj Diospajta rurangapaj alli yuyaiyuj tucui levitacunatami sumaj shimicunahuan rimashpa alli nirca. Canchis punllatami Pascua punllacunapi micuna aichataca micurcacuna. Shinallataj Dioshuan alli cangapajpish animalcunata cushpa huañuchircacunami. Chashnami paicunapaj ñaupa yayacunata Mandaj Diostaca, pagui nishpa alabarcacuna.

23Chai canchis punlla q'uipaca, tucui chaipi cajcunami shujtaj canchis punllahuan jatun micuita rurashpa cushicunata yuyarinacurca. Chai punllacunapipish cushicuihuanmi chaita rurarcacuna.

24Chaipajca Judá llajtata jatun mandaj Ezequiasmi, chaipi tandanacushcacunamanca, 1.000 huagracunata, 7.000 ovejacunata cushca carca. Shinallataj mandajcunapish, 1.000 huagracunata, 10.000 ovejacunatami curcacuna. Chai punllacunapipish achca curacunami allichirishpa, Diospajlla tucurcacuna.

25Judá llajtapi causaj tucuicunapish, curacunapish, levitacunapish, Israel llajtamanta shamushca israelcunapish, chai llajtapi causaj mana israelcunapishmi jatunta cushicurcacuna.

26Israel llajtata jatun mandaj Davidpaj churi Salomón mandacui punllacunamantapacha, chai shinatajca mana rurashcacunachu carca. Chaimantami chai Pascua punllata yuyarishpaca, Jerusalenpica chashna jatunta cushicurcacuna.

27Chai q'uipaca curacunahuan, levitacunahuanca shayarishpa sinchita caparishpami, tucui chaipi cajcunata bendiciarcacuna. Paicuna mañashcataca, Taita Diosca pai causacun jahua pachamanta uyarcami.