ÉXODO 4 - Quichua Chimborazo Bible

1Chaimi Moisesca:

–Ñuca chashna nijpipish paicunaca mana cringacunachu, ñuca nishcataca mana uyangacunachu. Ashtahuanpish: Mandaj Diosca maitataj canman ricurinman carcari ningacunami– nirca.

2Mandaj Diosca:

–¿Cambaj maquipi charicunca imatagari?– nijpi Moisesca:

–Shuj caspillatami charicuni– nirca.

3Mandaj Dios:

–Pambapi shitai– nijpi Moisés pambapi shitajpica, chai caspi culebra tucujpimi, Moisesca chaimanta anchushpa callpai callarirca.

4Chaimi Mandaj Diosca Moisestaca:

–Cambaj maquihuan chupapi japi– nijpi Moisesca maquita chutashpa chai culebrata chupapi japijpica, caspillataj tucurca.

5Can chashna rurajta ricushpami paicunapaj ñaupa yaya Abrahampaj, Isaacpaj, Jacobpaj Mandaj Dios canman ricurishcata cringacuna.

6Mandaj Diosca cashnapishmi nirca: –Cunanca cambaj maquita ñuñu ucui– nijpi, maquita ñuñu ucushpa cutin llujshichijpica, paipaj maquica rasu shina yurajlla leprahuan cajtami ricurca.

7Mandaj Diosca:

–Cutinllataj cambaj maquita ñuñu ucui– nijpi cutinllataj maquita ñuñu ucushpa ñuñu ucumanta cutin llujshichijpica paipaj cuerpo cashca shinallataj cajtami ricurca.

8Punta señalta ricushpa mana crishpa mana cazushpapish, q'uipa señalta ricushpaca cringacunami.

9Cai ishqui señalcunata ricushpapish mana crijpi, can rimashcatapish mana uyajpica, jatun yacumanta yacuta japishpa allpapi tallingui. Chai yacuca allpapica yahuarmi tucunga– nircami.

10Chaimi Moisesca, Mandaj Diostaca:

–¡Aij, Jatun Dioslla! Cambajta ruraj ñucahuan quiquin manaraj rimajpipish cunanpish saruncunamanpish ñucaca manamari alli rimaj canichu. Ñucaca mana utca rimai tucuj imata rimangapajpish c'allu huataricujmari cani– nircami.

11Mandaj Diosca:

–¿Pitaj runamanca shimita curcari? ¿Mana rimajtapish, mana uyajtapish, ñahui ricujtapish, mana ricujtapish pitaj rurarcari? Chaicunataca ¿Manachu Mandaj Dios ñuca rurarcani?

12Ashtahuanpish cunanca rilla. Ñucami cantaca rimachisha. Imallata rimanatapish ñucami yachachisha– nircami.

13Chaimi Moisesca:

–¡Aij, Jatun Dioslla, ñucapaj randica shujtajta cachapailla!– nirca.

14Mandaj Dios Moiseshuan p'iñarishpaca:

–¿Manachu ñucaca levitapura caj cambaj huauqui Aarontaca alli rimaj cajta rijsini? Paimi canta tupanaman llujshinga. Canta ricushpaca jatuntamari cushicunga.

15Paihuan rimangui. Ñuca imalla nishcacunatapish paiman yachachingui. Can rimanapipish, pai rimanapipish ñucami cancunahuan casha. Imalla rurana cashcatapish ñucami yachachisha.

16Israelcunamanca paimi can rimacushca shinallataj cambaj randi rimanga. Aaronmanca canmi Diospaj randi rimangui.

17Cai caspitaca apangui. Chaihuanmi milagrocunata rurashpa ricuchingui– nircami.

Egiptoman Moisés tigrashcami

18Chai q'uipaca Moisesca paipaj suegro Jetropajman tigrashpami:

–Cunanca ñuca huauquicuna causacushcata mana causacushcata ricungapajmi Egiptoman tigragrini– nijpimi, Jetroca Moisestaca:

–Alli ripangui– nirca.

19Mandaj Diosca Moisestaca Madianpica:

–Egiptoman tigrailla. Canta huañuchisha nicujcunaca ñami tucuicuna huañun– nircami.

20Chaimi Moisesca paipaj huarmita, paipaj huahuacunatapish burropi tiyachishpa Egiptoman tigrarca. Moisesca Taita Diospaj caspitapish aisashcami rirca.

21Mandaj Diosca Moisestaca:

–Egiptoman tigrashpaca, jatun mancharinacunata rurachun ñuca cambaj maquipi churashcataca faraonpaj ñaupajpi tucuita rurashpa ricuchingui. Ashtahuanpish paipaj shunguta ñuca sinchiyachijpimi, israelcuna richunca mana saquinga.

22Mana cacharisha nijpica faraontaca: Mandaj Diosca cashnami nin: Israelca ñuca punta churimi.

23Ña nishca shinaca ñucapajta rurachun ñuca churi richun saqui ninmi. Ashtahuanpish paicuna richun mana saquijpica ñucaca cambaj punta churitami huañuchisha ninmi ningui– nircami.

24Egiptoman Moisés tigracujpimi, shuj tutaca Mandaj Diosca pai samaricunman shamushpa paita huañuchisha nirca.

25Chaipimi Moisespaj huarmi Seforaca rumimanta rurashca filojlla cuchillota japishpa, paipaj churi charishca aicha mirga carata p'itishpa, Moisespaj chaquipi tupachishpaca: “Cunantajca ñuca quiquin yahuar cusami cangui” nirca.

26Chashna rurajpimi Mandaj Diosca, Moisestaca Egiptoman richun saquirca. Séfora huarmica circuncisionta rurashcamanta cunanca ñuca quiquin “yahuar cusami cangui” nircami.

27Mandaj Diosca Aarontaca: “Shitashca pambapi Moiseshuan tupanaman ri” nijpi Aarón rishpaca, Taita Diospaj urcupi Moiseshuan tupashpami paita mucharca.

28Chaipimi Moisesca Aaronmanca, Mandaj Dios imallata nichun nishcacunatapish, imalla milagrocunata rurashpa ricuchichun nishcatapish tucuita huillarca.

29Chai q'uipaca Moisespish, Aaronpish rishpami israelcunata cunaj yuyajcunataca tucuicunata tandachircacuna.

30Chaipimi Aaronca, Mandaj Dios Moisesman imalla nishcacunata tucuita huillashpa, milagrocunatapish tucuicunapaj ñaupajpi rurashpa ricuchirca.

31Chaita ricushpami, israelcunaca Mandaj Diosca paicuna llaquita apacujpi ricunaman shamushcata uyashpa, crishpa Mandaj Diosta cumurishpa adorarcacuna.