ÉXODO 39 - Quichua Chimborazo Bible

Curacunapaj churanacunata rurashcami(Ex 28.1-43)

1Diospajlla ucupi Diospajta ruranapaj churanacunataca azul, morado, amsa puca puchcacunata ahuashpami rurarca. Aarón Diospajlla cura cashpa churarina churanatapish Mandaj Dios, Moisesta mandashca shinallatajmi rurarca.

2Efodtapish curimantami rurarca. Azul, morado, amsa puca puchcacunahuan, caupushca lino puchcahuanmi rurarca.

3Curita martillohuan tacashpa ñañujlla latata rurashpami, puchca shina ñañujllata p'itircacuna. Chai curi puchcahuanmi azul, morado, amsa puca puchcacunahuan, lino puchcahuan sumaj ricunacunayujta ahuarcacuna.

4Chai efod nishca churanapica ishqui rigra jahuatami ñaupaj ladohuan huasha ladohuan tandachingapaj ishqui mirga linsocunata rurarca.

5Efod jahuata chumbillirina chumbipish efodta shinallataj rurashcami carca. Mandaj Dios Moisesta mandashca shinallatajmi curihuan, azul, morado, amsa puca puchcacunahuan, caupushca lino puchcahuan rurashca carca.

6Ónice rumicunata labrashpami, chaicunataca canichinata curimanta rurashcahuan muyundijta canichirca. Chaipica yaya Israelpaj churicunapaj shuticunataca sellanapi quillcashpa churaj shinami quillcashpa churarca.

7Chaicunataca Mandaj Dios Moisesta mandashca shinallatajmi, Israelpaj churicunata yuyarinapaj cachun efod churana ishqui rigra jahuapi churarca.

8Pectoraltapish efodta shinallatajmi curi puchcahuan, azul, morado, amsa puca puchcacunahuan, caupushca lino puchcahuan sumajta bordashcayujta ahuarca.

9Chai pectoralca racuta ahuashca patarijpica, sunimanca ishqui chunga ishqui centímetro chaupihuan, anchomanpish ishqui chunga ishqui centímetro chaupihuanmi carca.

10Chai pectoralpica chuscu fila rumicunatami churarca. Punta filapica shujca sardio, caishujca topacio, chaishujca carbunclo rumicunami carca.

11Ishqui filapica shujca esmeralda, caishujca zafiro, chaishujca diamante rumicunami carca.

12Quimsa filapica, shujca jacinto, caishujca ágata, chaishujca amatista rumicunami carca.

13Chuscu filapica, shujca berilo, caishujca ónice, chaishujca jaspe rumicunami carca. Tucui chai rumicunaca curimanta cajonta shina rurashcapi churashpa canichishcami carca.

14Chai rumicunaca Yaya Israelpaj chunga ishqui churicunapaj shuticuna cashca shinallataj chai rumicunapish chunga ishquimi carca. Chai rumicunapica chunga ishqui aillucunapaj shuticunataca cada rumipi cada aillupaj shuticunata sellanapi quillcashca shinami carca.

15Pectoralpica ashtahuan alli curita ch'imbatajlla huatuta rurashcatami churarca.

16Ishqui canichinacunatapish, ishqui argollacunatapish curitami rurarca. Chai ishqui argollacunataca pectoralpaj jahua lado ishqui esquinacunapimi churarca.

17Curimanta rurashca ishqui argollacunataca pectoralpaj jahua lado ishqui esquinacunapimi churarca.

18Argollacunapi huatashca caishuj ishqui lado puntataca efod churana rigra jahua ñaupaj ladoman canichinacunata churashcapimi canichirca.

19Shujtaj ishqui curi argollacunatapish rurashpami, pectoralpaj ucu lado ishqui esquinacunapi churarcacuna. Efod nishca churanahuan tupanacun ishqui lado uripimi churarcacuna.

20Ishqui curi argollacunatapish rurashpami, efod churana ñaupaj lado ishqui ladoman churarcacuna. Chaitaca cintura jananijllapimi, sirashca c'uchullapi churarcacuna.

21Chaicunataca pectoralpi churashca argollacunahuan efodpi churashca argollacunahuanmi azul-lla puchcahuan tandachishpa huatarca. Chai pectoraltaca efod churana jahuamanta ama ch'icanyanacuchunmi chashna rurarca. Mandaj Dios Moisesta mandashca shinallatajmi rurarcacuna.

22Efod ucuta churarina churanataca, azul puchcata sumajta ahuashpami rurarca.

23Chaupipi jutcushpa chai jutcu muyundij ama lliquirichunmi chai muyundijtaca racuta ahuarca.

24Chai churana muyundijtaca azul, morado, amsa puca puchcacunahuan, caupushca lino puchcahuan granada nishca sumaj bolacunata rurashpami huarcurca.

25Alli curimanta uchijlla campanillacunatapish rurashpami, chai churana chaqui filo muyundijta granadacunahuan chagrushpa churarca.

26Diospajta rurangapaj churarina churana filopica shuj campanilla, shuj granada, shuj campanilla, shuj granadata muyujta churashcami carca.

27Aaronpajpish, paipaj churicunapajpish túnica churanataca ashtahuan alli linota ahuashcami carca.

28Metratapish, tiaracunatapish, calzoncillocunatapish caupushca ashtahuan alli linohuanmi rurarca.

29Chumbillinatapish Mandaj Dios Moisesta mandashca shinallatajmi caupushca linohuan, azul, morado, amsa puca puchcacunahuan sumajta bordashcacunayujta ahuanata yachajmi ahuarca.

30Ashtahuan alli curimanta cintatajlla diadematami rurarca. Chaipica: MANDAJ DIOSCA JUCHA ILLAJMI nishcatami sellanapi quillcaj shina quillcarca.

31Mandaj Dios Moisesta mandashca shinallataj mitra jahuata pilluchishpa huatangapajmi chai diademapica azul huatuta churarca.

Diospaj carpa huasita tucuchishcami(Ex 35.10-19)

32Chashnami Diospaj carpa huasita shayachinapajca tucuita rurarcacuna. Dioshuan tupanacuna carpa huasita shayachinapajca Mandaj Dios Moisesta mandashca shinallatajmi israelcunaca tucuita rurarcacuna.

33Diospaj carpa huasita shayachinacunatapish, chaipi imallata runapaj cajcunatapish, Moisespajmanmi apamurcacuna. Chaicunaca: Ganchocuna, tablacuna, quinriman churana suni caspicuna, pilarcuna, pilarcunata shayachina basacuna,

34Diospaj carpa huasita c'atanapaj pucajllata tinishca carnero caracuna, tejonpaj caracuna, Diospajlla ch'icanchishca ucuta churana cortina,

35Dioshuan ari ninacushca quillcata huaquichina arca, chai arcata huanduna caspicuna,

36chai arcapaj propiciatorio, meza, chai mezapaj vasocuna, Diospaj ñaupajpi churana tanda,

37ashtahuan alli curita rurashca candelero, candeleropaj lamparacuna, chai lamparacunata allichinacuna, chaipi imallata ruranapaj cajcuna, achijyachichun lamparapi churana aceite,

38curi altar, Diospajlla cachun ch'icanchina aceite, mishquijllata ashnaj incienso, Diospaj carpa huasi pungupi churana cortina,

39bronce altar, chai altarpi churana bronce parrilla, chai altarta huanduna caspicuna, chaipi imallata ruranapaj cajcuna, yacupaj tanque, chai tanqueta tiyachina basa,

40Diospaj carpa huasi canlla muyundij cortinacuna, chai cortinacunata churanapaj pilarcuna, chai pilarcunata shayachina basacuna, Diospaj carpa huasi canllaman yaicunapi churana cortina, huascacuna, ishtacacuna, Diospaj carpa huasipi imallata ruranacuna, Dioshuan tupanacuna carpa huasipi imallata ruranacuna,

41Diospajlla ch'icanchishca ucupi Diospajta ruracushpa churarina churanacuna, Mandaj Diospajlla caj Aarón cura churarina churanacuna, paipaj churicuna Diospajta ruranapi churarina churanacunatapishmi Moisespajman apamurcacuna.

42Mandaj Dios Moisesta tucui imallata rurachun mandashca shinallatajmi israelcunaca tucuita rurarcacuna.

43Moisesca tucui chaicunataca, Mandaj Dios mandashca shinallataj sumajta rurashcatami ricurca. Chaimantami paicunataca allitami rurashcanguichij nirca.