1Mandaj Dios quiquinpimi ñucaca miticurcani.
Ñucataca nunca ama pingaichihuangui.
2Cashcata ruraj Taita Dios, ñucata ayudahuai, quishpichihuai.
Ñuca mañashcata uyashpa quishpichihuai.
3Quiquinca ñuca miticuna jatun rumi caiyari.
Chaimi ñucaca quiquinpi miticunaman callpacushalla.
Ñucata quishpichingapajca quiquinpaj mandashcacunatami curcangui.
Quiquinca ñuca rumimi cangui.
Ñuca muyundij pircami cangui.
4Taita Dioslla, Diosta mana rijsijcunapaj maquimanta llujshichihuai.
Millaita rurajcunapaj maquicunamanta quishpichihuai.
Llaquichijni shitajcunapaj maquimanta quishpichihuai.
5Quiquinca Mandaj Jatun Dios, ñuca shuyanami cangui.
Huambramanta pacha ñucata huaquichijmi cangui.
6Mamapaj huijsapi cai pachamantami, quiquinpi chariracurcani.
Ñuca mamapaj huijsamantapish quiquinmi llujshichircangui.
Quiquinmi huiñaita ñuca alabana cangui.
7Achcacunapajmi jatun mancharina ñucaca carcani.
Quiquinca ñucata pacaj, sinchi rumimi cangui.
8Ñuca shimica quiquinta alabanahuan junda cachun.
Quiquinpaj sumaj cashcahuan tucui punlla junda cachun.
9Ñuca ña yuyaj cajpipish ama shitangui.
Fuerza illaj tucujpipish ama ñucallata saquingui.
10Ñucata p'iñajcunaca ñucamantami parlanacucun.
Ñucata huañuchishun nicujcunaca paicunapurami yuyarinacucuncuna.
11Paicunaca: “Taita Diosca paitaca shitashcami.
Catichigari, japichigari.
Paita quishpichijca pi mana tiyanchu” nincunami.
12¡Taita Dios, ñucamanta ama caruyaichu.
Taita Dioslla, ñucata ayudanaman utca shamuyari!
13Ñucata p'iñajcunaca pingaichishca cachun.
Ñuca causaita chingachishun nicujcunaca chingarishca cachun.
Ñucata llaquichingapaj mashcacujcunataca pingaihuan tapachishca cachun.
Musparinahuan tapachishca cachun.
14Ashtahuanpish ñucaca quiquinllatami shuyasha.
Ñucaca quiquinta ashtahuan ashtahuan alabacushallami.
15Ñuca shimica quiquin cashcata rurashcatami huillanga.
Quiquin rurashcacuna mashna cashcatapish mana yachanichu.
Shina cashpapish quishpichinapaj quiquin rurashcacunataca tucui punllami huillacushalla.
16Mandaj Jatun Dios mancharinacunata rurashcatami yuyarisha.
Quiquin cashcata rurashcatami yuyarisha.
Quiquin rurashcacunallatami yuyarisha.
17Taita Dios ñucataca huambramanta pachami yachachircangui.
Mancharinacunata quiquin rurashcataca cunancama huillacunillami.
18Taita Dios, ñuca ña yuyaj cajpipish ama shitahuaichu.
Yuraj uma cajpipish, ama saquihuaichu.
Quiquin tucuita rurai tucuj cashcata, q'uipa huiñaicunaman huillangacama ama saquihuaichu.
Quiquin jatun cashcataca, q'uipa huahua huahuacunaman huillangacama ama saquihuaichu.
19Taita Dios quiquin cashcata rurashcaca jahua pachacamami.
¡Quiquinca jatun allicunatami rurashcangui!
Taita Dios ¿pitaj quiquin shinaca rurangari?
20Quiquinca achca llaquicunatami curcangui.
Achca nanaicunatami apachircangui.
Quiquinllatajmi cutin jatarichingui.
Cai pachapi ucujta caj jutcumantapish llujshichinguimi.
21Ñuca jatun canataca mirachinguiyari.
Ñucataca cutin cushichinguiyari.
22Ñuca Dioslla ñucapish chashnallatajmi quiquintaca alabasha.
Salteriopi tocashpami alabasha.
Quiquin pajtachij cashcataca arpapi tocashpami cantasha.
Israelcunapaj jucha illaj Diostaca cantashami.
23Quiquinta cantashpaca ñuca shimica cushicungami.
Ñuca causaita quishpichishcamantaca ñuca almaca cushicungami.
24Ñucata llaquichina yuyailla cajcunataca pingaichircanguimi, muspachircanguimi.
Chashna cashcata rurashcamantaca ñuca c'alluca tucui punlla huillacungallami.
Who We AreWhat We EelieveWhat We Do
2025 by iamachristian.org,Inc All rights reserved.
