PROVERBIOS 3 - Quichua Chimborazo Bible

Alli yachaita cazuchun cunashcami

1Ñuca huahualla, ñuca yachachishcataca,

ama cungaringuichu.

Ñuca mandashcacunatapish cambaj shungupi

huaquichingui.

2Chashna rurashpami, uni huatacunata

sumajta causangui.

3Llaquij canata, mana umaj canataca, amataj saquinguichu.

Cungapi aparishca shina, shungupi quillcashca shina chai yuyai puringui.

4Chashna alli cajpimi Taita Diospish, runacunapish c'uyashca, alli nishca

tucungui.

5Mandaj Diospi cambaj tucui shunguta churangui.

Ama can alli yuyaiyuj cashcallapi

shunguta churanguichu.

6Imata rurangapajpish, Diosta yuyaipi charingui.

Paimi cantaca alli ñanta pushanga.

7Canllataj yachaisapa cashcataca,

ama yuyanguichu.

Ashtahuanpish Mandaj Diosta manchashpa, tucui millaimanta anchuringui.

8Paita cazushcami cambaj aichatapish

jambinga.

Cambaj tullucunatapish samachingami.

9Can imalla charishcacunahuanpish,

Mandaj Diosta jatunyachingui.

Cambaj chagracunapi punta p'ucushca tucui

granocunamantapish paimanraj cungui.

10Chashna rurashpami, huaquichinacunapipish

tallirijta huaquichingui.

Llullu vinotapish yalli yallitami japingui.

11Ñuca huahualla, Mandaj Dios imamanta

llaquichijpica, ama mana alli ninguichu.

Imata jarcajpica, ama p'iñaringuichu.

12Yayaca paipaj churitaca c'uyashpamari,

mana allitaca jarcan.

Chashnallataj Mandaj Diospish, pai c'uyashca huahuatamari mana allitaca jarcashpa llaquichin.

13Maijanpish cai alli yachaita yachashpa, alli yuyaita charijca cushicunmi.

14Paicunapajca cullquita japishcatapish yallimari.

Ashtahuan alli curita japishpa

charijyashcatapish yallimari.

15Sumaj achij nicuj rumicunata charishcatapish yalli valijmari.

Chai yachashcahuanca, munanayaj sumaj

charinacunapish mana ch'imbapuraipajmi.

16Paipaj alli maquipica, uni causaitami charicun.

Lluqui maquipica, tucui laya

allicunatapish, alli nishca canatapishmi charicun.

17Paipaj ñancunaca, cushicushpa purina

ñancunami.

Pai cushca causaipish sumajmari.

18Chai yachanaca paipi charirijcunapajca,

causaita cuj yurami.

Paita ña chariracujcunaca cushicunmari.

19Mandaj Diosca alli yachaj cashpami, cai pachataca rurarca.

Alli yuyaiyuj cashpami, jahua

pachatapish sinchita churarca.

20Tucuita yachaj cashpami, jatun yacucunatapish ishquipi ch'icanchirca.

Paimantami jahua pachamantapish tamya

urman.

21Ñuca huahualla, caicunataca pajta

cambaj ñahuimanta anchuchinguiman.

Mandashcatapish, cunashcatapish

huaquichingui.

22Chaimi cambaj almamanca causaita cunga.

Cunga uripi ima sumaj ricunata aparishca shinami canga.

23Cambaj ñanta ricushpapish, ima

manchai illajmi puringui.

Chaquillapish imapi mana ñitcaringachu.

24Dormingapaj siririshpapish, imata

mana manchanguichu.

Siririshcahuan sumajta dorminguillami.

25Cungaillapi ima llaqui japinatapish mana sustaringuichu.

Diosta mana manchajcunapaj shamuj llaquitapish mana manchanguichu.

26Mandaj Diosllapimi shunguta churangui.

Ima mana allipi cambaj chaqui

huashicunamantapish paica huaquichingami.

27Huajchacuna canta ima allita rurachun mañajpica, ayudai tucushpaca, ama

huahuayashpa ayudanguilla.

28Pi imata mañajpipish maquipi charicushpaca, caya cushatajchari

nishpa, ama tigrachishpa cachanguichu.

29Maijancuna canpi shunguta

churashpa causajpipish, ama ima llaquita ruranata yuyaringuichu.

30Manapish canta p'iñachicujpica, pihuanpish ama canraj p'iñanacuita

mashcanguichu.

31Manapish cashcata ruraj runapaj ima charishcacunataca, ama munanguichu.

Charijyangapajlla pai imata rurajpipish, ama chaita catinguichu.

32Mandaj Diosca millaita rurajtaca, manataj ricunachinchu.

Ashtahuanpish cashcata rurajcunahuanca,

tandallami causan.

33Mandaj Diosca paita mana manchajpaj huasipica, llaquitamari churan.

Ashtahuanpish cashcata rurajcunapaj

huasipica, bendiciangamari.

34Mana cazushpa asijcunataca, Mandaj Diospish asingami.

Ashtahuanpish alli shungucunapajca,

c'uyashpa allita cunmi.

35Yachaisapacunaca, alli nishca canatami japingacuna.

Ashtahuanpish rumi shungucunaca, jatun pingai tucunatami japingacuna.