DEUTERONOMIO 23 - Quichua Chimborazo Bible

Diospaj tandanacuipica picunalla mana yaicuipaj cashcami

1Lulun llapirishca cashpa, mana cashpaca paipaj charishca aichata p'itishca cashpaca Mandaj Diospaj tandanacuimanca ama yaicuchun.

2Mandaj Diospaj tandanacuimanca huainapaj huahuacunaca mana yaicungacunachu. Chunga huahua huahuacunacamapish, Mandaj Diospaj tandanacuimanca mana yaicungacunachu.

3Mandaj Diospaj tandanacuimanca amonitacunapish, moabitacunapish mana yaicungacunachu. Chunga huahua huahuacunacamapish Mandaj Diospaj tandanacuimanca nunca manataj yaicungacunachu.

4Egiptomanta llujshishpa cancuna paicunapaj ñanta pasacujpica yacutapish, micunatapish mana curcacunachu. Ashtahuanpish Mesopotamia llajtapi caj Petor pueblopi causaj Beor runapaj churi Balaamman cullquita cushpami, cancunataca ima llaqui tucushpa alli canman nichun cacharcacuna.

5Chashna cajpipish Mandaj Dios cancunapaj Taita Diosca Balaam imata nishcata mana uyashpami llaqui tucushca canman nishca canataca Mandaj Dios cancunapaj Taita Diosca alli cashca cachun nishca canaman tigrachirca. Mandaj Dios cancunapaj Taita Diosca cancunata c'uyashcamantami chashna rurarca.

6Paicunahuan sumaj causaita charinatapish, paicunapaj ima allita ruranatapish ama mashcanguichijchu. Cancunapaj tucui causaipimi chashna cana canguichij.

7Edomitacunataca cancunapurallataj cashcamanta ama p'iñanguichijchu. Cancunaca Egiptopica shujtaj llajtamanta purij runa shinallami causarcanguichij. Chaimanta egipciocunataca ama p'iñanguichijchu.

8Paicunapuramanta huacharishcacunaca quimsa huahua huahuacuna cashpami Mandaj Diospaj tandanacuimanca yaicungacuna.

Sano canapaj imata rurachun mandashcami

9Cancunata p'iñajcunahuan macanacungapaj carpa huasicunata shayachishpa tiyarigrishpaca, tucui mana allimanta huaquichiringuichij.

10Cancunapurapica maijanca yuraj yacu tuta cacharirishpa mapayashcamanta mapacuna tiyanguichijchari. Chaicunaca carpa huasicunamanta canllaman llujshishpa ama cutin yaicugrichun.

11Shina cajpipish chai runaca chishiyamujpi yacuhuan maillarishpa inti ña huashicugrijpica carpa huasicunaman cutin yaicui tucunmi.

12Cancuna mapanacunatapish, carpa huasicunamanta caruman charinguichij.

13Cancuna apana macanacunacunapica shuj ishtacatapish apanguichij. Cancuna mapaj tiyarigrishpaca chai ishtacahuan pambata jutcushpa chaipi mapashpa, allpahuan tapachinguichij.

14Mandaj Dios cancunapaj Taita Diosca cancunata quishpichingapaj, cancunata p'iñajcunata cancunapaj ñaupajpi churangapajmi carpa huasicuna chaupipi puricun. Chaimantami cancunapaj carpa huasicuna tiyanca ima mapa illaj cana can. Cancunapaj chaupipi ima mapata mana ricushpaca paica cancunapaj chaupimantaca mana anchungachu.

Caishuj chaishuj ima shina causanata mandashcami

15Amopajta ruraj cancunapajman miticushpa rijpica, ama paipaj amoman tigrachinguichijchu.

16Cancunapaj llajtapi caj pueblocunamanta maijan pueblopi causanata pai agllajpica, chaipi cancunahuan causachun saquinguichijlla. Paitaca ama p'iñanguichijchu.

17Israelcunapurapica huainayashcahuan causaj huarmica ama tiyachun. C'aricunapish c'aripurallataj siririjcunaca ama tiyachun.

18Mandaj Dios cancunapaj Taita Diosman imata cushatajmi nishcataca cullqui jahua huainayaj huarmi cushca cullquitapish, allcu shina runa cushca cullquitapish ama apamunguichijchu. Chaicunaca caishujpish chaishujpish Mandaj Dios millanachinami.

19Cancunapurallatatajca cullquita mañachishpapish ama huahua cullquita cobranguichijchu. Granota mañachishpapish ima shujtajta mañachishpapish ama yallihuan cobranguichijchu.

20Mana cancunapura cajcunataca huahua cullquita cobrai tucunguichijmi. Ashtahuanpish cancunapurallataj caj israelcunataca ama chashna ruranguichijchu. Chashna rurajpimi Mandaj Dios cancunapaj Taita Dios cancunapaj cachun cushca llajtapica cancunapaj maquihuan imata rurashcapipish allicunata cunga.

21Mandaj Dios cancunapaj Taita Diosman imata cuna tucushpaca ama uniyashpa utca pajtachinguichij. Cancuna mana pajtachijpica, Mandaj Dios cancunapaj Taita Diosca llaquichingami. Paipaj ñaupajpica juchayujmi tucunguichij.

22Can imata mana cuna tucushca cashpaca, mana juchayuj tucunguichu.

23Ashtahuanpish cambaj quiquin munaimanta Mandaj Dios cancunapaj Taita Diosman imata cushatajmi nishcataca cancunapaj shimihuan nishca shinallataj chai yuyailla tucushpa pajtachinguichij.

24Maijanpaj uva chagraman yaicushpaca, huijsa pajtata micui tucunguichijmi. Ashtahuanpish cancunapaj canastapica ama imata apanguichijchu.

25Maijanpaj cozichanalla trigo chagraman yaicushpaca trigo caspacunataca maquillahuan p'itinguichij. Ama hoceshuan c'uchunguichijchu.