2 SAMUEL 22 - Quichua Chimborazo Bible

Macanacuipi mishashpa David cantashcami(Sal 18.1-50)

1Davidca tucui paita p'iñajcunapaj maquimantapish, Saulpaj maquimantapish quishpichishcamantami Mandaj Diostaca cai cantohuan,

2cashna alabarca:

“Mandaj Diosca ñuca miticuna jatun rumimari.

Ñucata huaquichijmari, ñucata quishpichijmari.

3Ñuca Taita Dioslla, ñuca pacatucunalla, paipimi shunguta churani.

Paica ñuca escudomi.

Tucuita rurai tucujhuan ñucata quishpichijmi.

Tucuimanta yalli jahuaman ñuca miticunami.

Ñuca quishpichijmi cangui.

Llaquihuan cajpica canmi ñucata quishpichircangui.

4Mandaj Diostami mañasha. Paica alabana cajmi.

Canmantami ñucata p'iñajcunamantaca quishpirisha.

5Yacu jahuajta jatarishpa tapaj shinami huañuica ñucataca pilluchirca.

Millaicunaca jatun huaicuta yacu t'imburicuj shinami manchachirca.

6Seolpaj laziyanaca, lazyashpami charicurca.

Huañuipaj laziyanataca ñuca jahuapimari shitarca.

7Chai llaquipi cashpami, Mandaj Diosta mañarcani.

Ñuca Diostami caparircani.

Ñuca caparishcataca paica paipaj huasimantami uyarca.

Ñuca caparishcaca paipaj rinrincunamanmi chayarca.

8Pambapish cuyurcami. Allpapish chujchurcami.

Jahua pachata aparijcunapish cuyurircami.

Pai p'iñarijpica tucuimi cuyurirca.

9Paipaj singamantaca cushnimi llujshirca, paipaj shimimantaca tucuchij nina t'itacujmi llujshirca.

Carboncunapish pai japichishcami lunyacurca.

10Jahua pachata cumurichishpami uriyamurca.

Paipaj chaqui ucupica, amsa amsami carca.

11Paica shuj querubinpi tiyarishpami volarca.

Huairapaj alaspi tiyarishpami volarca.

12Paica paipaj muyundijta amsata churashpami pacatucurca.

Yana yacu sangu p'uyumi muyushpa paitaca jarcarca.

13Paipaj ñaupajmantaca achijnicujmi llujshirca.

Chai achijnicujca carboncunata japichishpami nina lunyacujta rurarca.

14Mandaj Diosca jahua pachamantami c'ulun nirca.

Jahua pacha Diosca chashnami rimarca.

15P'iñajcunataca paipaj puntajlla caspita shitashpami caita chaita cacharca.

Paipaj relampacunata cachashpami chingachirca.

16Mandaj Dios p'iñarishpa rimajpi pai singahuan p'ucujpica, mama cucha yacu asientopish, ricurircami.

Cai pacha allpapaj shungupish ricunallami tucurca.

17Diosmi ñucataca jahuamanta maquita chutashpa japihuarca.

Millpucuj jatun yacumantami llujshichihuarca.

18Ñucata p'iñaj c'ari c'aricunamantami quishpichirca.

Ñucata p'iñajca ñucata yalli c'ari c'aricunami carca.

19Paicunaca ñuca llaquihuan cai punllamari japishpa llaquichircacuna.

Ashtahuanpish Mandaj Diosmi ñucataca ayudahuarca.

20Ñucataca canmi jatun pambaman llujshichij shina quishpichircangui.

Can munashca cajpimi quishpichircangui.

21Ima shinami cashcata rurarcani, chai shinallatajmi Mandaj Diosca curca.

Ñuca chuya maqui cashca shinallatajmi, paipish ñucaman cuna cashcata curca.

22Ñucaca Mandaj Diospaj ñanpimi purircani.

Millaita rurashpa Diosmantaca mana caruyashcanichu.

23Tucui imalla pai mandashcacunaca ñuca ñaupajpimi.

Can mandashcacunamantaca manataj caruyarcanichu.

24Mana allita ruranamantaca huaquichirircanimi.

Paipaj ñaupajpica ima pandata mana rurarcanichu.

25Ñuca ima shinami cashcata rurarcani, chai shinallatajmi Mandaj Diosca ñucaman cuna cashcataca curca.

Paipaj ñaupajpi ima shinami ñuca maqui chuya carcani, chai shinallatajmi cun.

26Llaquij runamanca canpish llaquij cashcallatatajmi ricuchingui.

Tucuita alli rurajpajca canpish allita ruranguimi.

27Chuya cajmanca canpish chuya cashcallatatajmi ricuchingui.

Llaquichijcunapajca canpish llaquichij cashcallatatajmi ricuchingui.

28Llaquihuan cajcunataca canmi quishpichingui.

Jatun tucushcacunata cumurichingapaj paicunataca cambaj ñahuica ricuracunmi.

29Mandaj Dioslla, canca ñuca lamparami cangui.

Ñuca Dioslla amsapi cajpipish canmi achijyachingui.

30Canhuanca achca soldadocunatapish urata janajta cachashallami.

Ñuca Dioshuanca jatun pircacunatapish urmachishpa llaquichingapaj yaicushallami.

31Mandaj Diospaj ñanpica ima panda mana tiyanchu.

Mandaj Diospaj shimica, rupachishpa tucui mapata anchuchishca cullqui shinami.

Paipi shunguta churashpa shuyajcunapajca escudo shina pacajmi.

32Mandaj Diosmanta shujtaj Diosca ¿pitaj tiyangari?

Mandaj Diosllamari Diosca.

¿Pitaj rumica cangari? Ñucanchij Diosmari chai rumica.

33Taita Diosmi paipaj poderhuan chumbillichin.

Paimi ñuca ñantaca allichishcata charin.

34Paimi ñuca chaquicunataca taruga chaqui shina callpajta ruran.

Jahua urcucunapi cajpipish ima manchai illajllatami charihuan.

35Macanacungapaj ñuca maquicunata yachachijpish paimari.

Bronce arcota ñuca rigrahuan muyurijta chutachunpish paimi fuerzata cun.

36Ñucata quishpichij escudotapish canmi cungui.

Cambaj c'uyaihuanmi jatunyachishcangui.

37Canmi ñuca purichunpish ñantaca purinajllata rurashcangui.

Chaimi ñuca chaquicunapish mana lluchcarishca.

38Ñucata p'iñajcunataca catirashpami llaquichigrisha.

Tucuitami tucuchisha.

Tucuita tucuchingacama mana tigrashachu.

39Ñuca tucuchijpica, ñuca ñutuchijpica manataj jataringacunachu.

Ñuca chaqui ucupimi urmangacuna.

40Jatun macanacuipi macanacuchunpish, fuerzatami chumbillichishcangui.

Ñucata p'iñajcunataca, cumurichishpami ñuca maquipi churashcangui.

41Ñucata p'iñajcunataca, tigrachishpami cacharcangui.

Ñucata p'iñajcunata ñuca tucuchichunmi chashna rurarcangui.

42Paicunaca caparicurcami.

Pi mana quishpichircachu.

Mandaj Diosta caparijpipish mana uyarcachu.

43Ñutu allpa shina tucujtami cutarcani.

Ñancunapi sirij lodota shinami sarurcani.

Tucuimi ñutuchircani.

44Ñuca llajtapi causajcuna p'iñacunmantapish quishpichircanguimi.

Llajtacunata mandaj cachunmi ñucataca huaquichircangui.

Mana rijsishca runacunami ñucapajta rurangacuna.

45Mana rijsishcacunamari ñuca mandana ucupi tucungacuna.

Ñuca rimajta uyashpaca cazungallacunami.

46Mana rijsishcacunaca fuerza illajmi tucungacuna.

Paicuna pacatucushca cashcamantapish chujchushpami llujshingacuna.

47Mandaj Diosca, huiñaita causacuchunlla.

Ñuca jatun rumica alli nishca cachun.

Ñucata quishpichij Diosca jatunyachishca cachun.

48Paica ñucata llaquichijcunata llaquichij Diosmi.

Gentecunata ñuca ucupi churaj Diosmi.

49Paica p'iñajcunapaj maquimanta ñucata quishpichijmi.

Ñucata llaquichingapaj huaicashpa jataricujpipish ñucata paicunapaj jahuapi churajmi.

Yallitaj millai runapaj maquimantami quishpichihuarcangui.

50Mandaj Dioslla, chaimantaca tucui llajtacunapimi canmanta huillasha.

Cambaj shutitaca cantacushallami.

51Pai churashca jatun mandajtaca cushicushpami quishpichin.

Pai churashca mandajtaca llaquicunllami.

Davidtapish, paipaj huahuacunatapish huiñaitami chashna pushanga” nircami.